Mako 5 - Amazwi Yakwe Leza 2013

Yesu wafumya mipasi yankota mu muntu

¹ Yesu na alondezi yakwe yafika ku mbalama yuze yakwe yemba waku Galile, ku mpanga ya Gelasa.

² Lino Yesu wapatuka mu wato, umuntu uwali ni mipasi yankota afuma ku malindi amukomanya.

³ Wene wikalanga ku malindi. Kutali nanti umwi uwakuti angamusunga nanti kumunyepa mu minyololo,

⁴ pano nsita zyonsi ndi yamunyepa, waputolanga minyololo nu kuvuna ivyela ivyali ku ngazo zyakwe. Wali na maka avule caleka kutali nanti umwi wakumulema.

⁵ Musanya nu usiku wapitananga sile mu malindi nu mu myamba, ala akupunda nu kuitemola ku mawe.

⁶ Wali katalamukila lino waweni Yesu, alino asimula aya amufukamila,

⁷ apunda ni zwi likulu ati, “Yesu, we Mwana wakwe Leza uwa papelapela, uzye ukulonda cani kunondi? Lapa pa manso yakwe Leza, ukuti, utakuncuzya!”

⁸ Wene wavwanzile cii, pano Yesu wavwanzile ati, “Mupasi wankota, fuma mu muntu wii!”

⁹ Caleka Yesu amuuzya ati, “Uzye izina lyako wewe weni?” Nawe amwaasuka ati, “Izina lyane nene Mazimbi, pano tuli aingi!”

¹⁰ Lyene mipasi yankota ipapata Yesu kuti ataizingila ku mpanga yuze.

¹¹ Lyene kwali ufyo wakwe yakapoli ukulu mupipi, ala ukulya umu mbali ya mwamba.

¹² Caleka mipasi yankota ipapata Yesu iti, “Tuzingile muli yakapoli amuno tukingile.”

¹³ Wailesile ipita, alino mipasi yankota ifuma mu muntu iya iingila muli yakapoli. Alino ufyo onsi kulingana na mazimbi yaili, utantamukila ku lwema, uponela muli yemba umwela.

¹⁴ Acemanga yakapoli, yasimula yaya yalanda vintu vii mu musumba nu mu mizi iyapalime. Alino antu yapita kuyalola icati cicitika.

¹⁵ Lyene lino iiza kuli Yesu, yalola umuntu uwali ni mipasi yankota, atenzi papa kwene, watazwala, nupya wali na mano ya untu. Alino yonsi yuvwa intete.

¹⁶ Yao aciweni yanena antu cati cicitika ku muntu uwali ni mipasi yankota, nga ni cati icicitika kuli yakapoli.

¹⁷ Alino yapapata Yesu kuti afume mu mpanga yao.

¹⁸ Lino wapatama mu wato, umuntu wino mipasi yankota yafumilemo amupapata ati, “Leka nkulondele!”

¹⁹ Lelo Yesu atamuzumilizye. Lyene amunena ati, “Pitanga ku muzi ku mwinu ku akazi kako ukayanene cino Mwene watakucitila na vino wakukumbusuka.”

²⁰ Muntu wiyo apita mu misumba ikumi yonsi, ala akunena antu pali cino Yesu watamucitila. Lyene na yonsi acuvwile yazunguka cuze.

Yesu wapozya mwana Yailo nu mwanaci umwi

²¹ Lino Yesu walamba ku mbalama yuze yakwe yemba, lino acili mu nkumba iumba lya antu limuzinguluka.

²² Yailo, intunguluzi yamu ng'anda yamapepo aiiza. Lino walola Yesu, amufukamila

²³ amupapata cuze ati, “Mwanane kaci umulwalisye ali pipi nu kufwa. Nakulenga kuti wize umwikepo makasa yako, pakuti apole aye nu umi.”

²⁴ Yesu apita nawe, nga iumba likulu lilondela Yesu limuunganila.

²⁵ Kwali umwanaci umwi uwalwile cendamongo pa myaka ikumi na iili.

²⁶ Nanti angala wapitanga muli yasing'anga aingi, nu kusumba impiya zyonsi, mu cifulo cakuti aye ningo, indwala yayanga sile pa nkolelo.

²⁷ Lino uvwile ilandwe lya pali Yesu, aiiza mwi umba afyenka afika cisila cakwe Yesu, nga akumya ku nsalu yakwe,

²⁸ ala akwelenganya ati, “Ndi ningakumya nanti ku nsalu yakwe sile, namapola.”

²⁹ Lilyo kwene cendamongo cisila, nga auvwa mu mwili wakwe ukuti wapoziwa kufuma ku ndwala yakwe.

³⁰ Papo kwene Yesu amanya ukuti maka yapungukako mu mwili wakwe. Lyene aseleukila kwi umba auzya ati, “Uzye aweni wakumya ku nsalu yane?”

³¹ Alondezi yakwe yamwasuka yati, “Watulola vino antu yati yakuunganila, Lyene nawe ukuuzya uli uti, ‘Aweni wankumya?’”

³² Lelo Yesu acelecensya manso monsi kuti alole uwatamukumya.

³³ Umwanaci lino wamanya cati cicitika kunoli, alino aiiza, ala akuzakaza ni ntete, amufukamila, amunena cumi consi.

³⁴ Yesu nawe amunena ati, “Kaciwe, utailo wako wakupozya. Pita ulumi, uposiwe ku ndwala yako.”

³⁵ Lino Yesu acili akuvwanga vii, inkombe zyafumile ku ng'anda yakwe Yailo, zinena Yailo ziti, “Mwana wako kaci watafwa. Pacani cino ukusakamika Kasambilizya?”

³⁶ Nawe Yesu atasumvile amano pali vino yalandanga, lelo anena Yailo ati, “Utuvwa intete, taila sile.”

³⁷ Nupya atazumilizye umuntu nanti umwi kuti alondele, suka sile Petulo na Yakobo na Yoane mwina wakwe Yakobo.

³⁸ Lino yafika ku ng'anda yakwe Yailo, Yesu alola icimvulunganya, na antu ala yakulosya ni mpoma ikulu.

³⁹ Aingila mu ng'anda nu kuyuzya ati, “Pacani cino mukwangula nu kupongomoka impooma? Ala umwana atafwile, lelo watakasula sile.”

⁴⁰ Lelo yene yamuseka. Pacisila ca kufumya antu yonsi panzi, atoola isi na nyina wa mwana pamwi na alondezi yakwe yatatu, iingila mu muputule muno mwana wali.

⁴¹ Amulemelela ikasa amunena ati, “Talita kumi,” kuli kuti, “Kaci we nakunena nati katuka!”

⁴² Lilyo kwene mukazyana akatuka apitana monsi monsi. (Wali ni myaka yakuvyalwa ikumi na iili.) Lino cii cacitike, antu yonsi yazunguka cuze.

⁴³ Lelo Yesu ayapeela ilamulo kuti yatanena umuntu nanti umwi. Alino ayanena ati, “Mupelini cimwi cakuti alye.”