Mako 4 - Amazwi Yakwe Leza 2013

¹ Nupya Yesu atandika kuyasambilizya mu nkumba yakwe yemba. Iumba ilyakongine kunoli lyali likulu, caleka apatama mu wato umwi, amuno aikala. Uwato wali pali yemba, iumba lyene lyali ku cituntu cakwe yemba.

² Atandika kuyasambilizya vintu vingi mu milumbe ati,

³ “Uvwini! Kwali kata wa mbezu uwaile ku kuta imbezu.

⁴ Lyene lino akuta, imbezu zimwi ziponela mu nzila, ni vyunyi viiza vizikompa.

⁵ Zimwi ziponela pa lwala, apali musili unono, zimela zuwa, pano musili utavuzilepo.

⁶ Lyene lino ilanzi lyasanzama nu kuwala, ilyoca ivimelwa navyo vyuma, pano misisi itingile pansi.

⁷ Imbezu zimwi ziponela mu myunga. Lyene myunga ikula, izitotola, nazyo zitafukwile.

⁸ Lelo imbezu zimwi ziponela pa musili uvunde, nga lino zyamela zikula nu kuseeka vizao vivule. Zimwi makumi yatatu, zimwi makumi mutanda, nga na zimwi umwanda onga.”

⁹ Lyene Yesu ayanena ati, “Ali na matwi yakuuvwa, auvwe!”

Imilimo ya milumbe

¹⁰ Lino Yesu wapaatuka mwi umba, alondezi ikumi na yaili nga na yamwi ali mu pipi nawe iiza kunoli yamuzya kuti ayalondolwele vino milumbe ikusenula.

¹¹ Yesu nawe ayanena ati, “Mwemo mwapelwa amano ya kumanya nkama zya Wene wakwe Leza. Lelo yano asyala yene yakauvwila mu milumbe,

¹² pakuti, ‘Kulola yangalola, lelo yatangailuke. Nu kuuvwa yanguvwa, lelo yatangamanya ningo. Pano iyamanya yangazenzuka, nga Leza ayelele.’”

Yesu wilula mulumbe wakwe kata wa mbezu

¹³ Lyene Yesu ayauzya ati, “Ndi mutamanyile mulumbe uu, uzye lyene mulamanya uli milumbe yuze yonsi?

¹⁴ Kata wa mbezu awiyo akata mazwi yakwe Leza.

¹⁵ Antu yamwi yakoline wa mbezu izyaponile umu mbali ya nzila, muno mazwi yatewa. Lilyo kwene lino yuvwa mazwi yakwe Leza, Ciwa nawe aiiza afumya mazwi munoyali.

¹⁶ Antu yamwi yakoline wa mbezu izyaponile pa lwala. Lino yuvwa mazwi yakwe Leza, lilyo kwene yayapokelela nu luzango.

¹⁷ Lelo yasiingila nu kwika misisi mukasi ka myenzo yao nupya yasyaikalilila. Caleka lino ucuzi nanti kuzunyiwa viiza pamulandu wa mazwi yakwe Leza, lilyo kwene yanenuka.

¹⁸ Antu yamwi yakoline wa mbezu izyaponile mu myunga. Yaa, ali yano akauvwa mazwi yakwe Leza.

¹⁹ Lelo masakamiko ya wikazi wamu nsi ii, kusombwa nu ukama, nu kulonda kwa vintu vyuze, vikaingila nu kutotola mazwi. Alino yasyaseeka vizao.

²⁰ Lelo antu yamwi yakoline wa mbezu izyaponile pa musili uvunde. Yakauvwa mazwi yakwe Leza, nu kuyapokelela, nu kuseeka vizao, yamwi makumi yatatu, yamwi makumi mutanda, na yamwi umwanda onga.”

Kutupika ilampi mu nyungu

²¹ Yesu atwalilila kuvwanga ati, “Uzye umwi angatola ilampi nu kulitupika mu nyungu nanti kuliika mwi zungu? Uzye atangaliike pa sanzame?

²² Pano cino consi icafiswa cilasokololwa, na cino consi ca nkama cilaumbulwa paswe.

²³ Ali na matwi yakuuvwa, auvwe!”

²⁴ Nupya ayanena ati, “Ikini amano pali vino mukuuvwa! Pano cilingilo cino mukalingila auzo acino namwe Leza alamulingila nu kuluta.

²⁵ Pano wino wensi akweti wene alapeelwa navyuze, na wino wensi atakweti cimwi nawe alapokwa nu tunono tuno akwelenganya kuti akweti.”

Mulumbe wa lumbezu lukukula

²⁶ Yesu nupya avwanga ati, “Uwene wakwe Leza ukoline na vii! Umuntu watile imbezu mu calo cakwe.

²⁷ Alala nsita ya usiku, nga lino waca azyuka azana vino imbezu zyati zimela zikukula. Lelo atamanyile icikucitika.

²⁸ Umusili ukakuzya ivyakulya, inkolelo umwenje ukaloleka alino umutwe, nga ku mpela musante uzilemo impece.

²⁹ Lino ivyakulya vyaca, umuntu atandika kusinza ni cikwakwa cakwe, pano nsita ya uzombozi yatifika.”

Mulumbe wa lumbezu lwakwe musunta

³⁰ Yesu ayauzya ati, “Uzye Wene wakwe Leza tumaukolanya na cani? Uzye mulumbe ci uno tumaomvya pa kuulondolola?

³¹ Ukoline wa lumbezu lwakwe musunta, luno lwacepesya pa mbezu zyonsi zino zikatewa mu musili.

³² Lelo pacisila cakumela lukula luya wa cimuti, nga cikulisya kuluta vilimwa vyonsi vya mu calo. Cimuti ciya ni misambo ikulu cuze cakuti vyunyi viluka vinsanzo mu misambo ya cisao cauko.”

³³ Mu milumbe iingi wakwe uu, amuno wakosolanga mazwi yakwe Leza kunoyali, kulingana vino yangiluka.

³⁴ Atayasambilizyanga cimwi kwaula kuomvya milumbe, lelo ndi wikala pamwi na alondezi yakwe ataomvyanga milumbe, lelo walondololanga vyonsi kunoyali.

Yesu walesya cipupu

³⁵ Uwanda uwa kwene manguzi Yesu anena alondezi yakwe ati, “Tuini tulambe ku mbalama yakwe yemba.”

³⁶ Lyene lino yasya iumba, alondezi yapatama mu wato uno Yesu watenzimo, nga yamusenda. Amato nayauze yalondile.

³⁷ Mukupumikizya cipupu cikatuka, na maimbi yatandika kupuma mu wato, cakuti wato wali pipi nu kuzula manzi.

³⁸ Yesu wali ku mpinda ya wato, ala watakasula asamile musamilo. Alondezi yakwe yamuzyula yati, “Kasambilizya, uzye utasakamile ndi vino tuli pipi nu kuundwa?”

³⁹ Yesu akatuka, alesya cipupu ati, “Myalala!” Alino anena na maimbi ati, “Lalini!” Lyene cipupu cimyalala, nga kuya cele.

⁴⁰ Alino Yesu auzya alondezi ati, “Uzye pacani muvwa intete? Uzye na ndakai musi na utailo?”

⁴¹ Lelo yamangala yatandika nu kuuzyanya yati, “Uzye umuntu wi aweni, wino cipupu na maimbi vyamuyela?”