Mako 3 - Amazwi Yakwe Leza 2013

¹ Nupya Yesu waswilile mu ng'anda ya mapepo, umwali umuntu uwali ni cizanza cilemale.

² Lyene antu yamwi ali penepo yalondelezyanga mulandu wakupeela Yesu. Caleka yamucevya kuti yalole ndi amapozya umuntu pa Sabata.

³ Yesu anena umuntu uwali ni cizanza cilemale ati, “Katuka iza kuno ku nkolelo.”

⁴ Lyene auzya antu ati, “Uzye Masunde itu yazumilizya kucita cani pa Sabata? Uzye ukuombela antu visuma nanti kuyaombela viipe? Uzye ukutuula umi wa muntu nanti kuulovya?” Lelo yataswike nanti cimwi.

⁵ Yesu acelecensya pano yali nu ukali, lelo wakweti ulanda pa kuluvyanya kwao panoyali akome myenzo. Alino anena umuntu ati, “Ololola cizanza cako.” Nawe aololola, nga ciya icipuma nupya.

⁶ Acino Afaliseo yafuma mu Ng'anda yakwe Leza yaya yakongana na amu kaungwe kakwe Helodi, yumana kapi kuti yamukome.

Iumba likulu lyalondela Yesu kuli Yemba wa Galile

⁷ Yesu na alondezi yakwe yafumako yaya kuli Yemba wa Galile, ni umba likulu cuze kufuma ku Galile lyamulondile.

⁸ Lyene antu aingi afumile ku Yudeya, nu ku Yelusalemu, nu ku Idumeya, nu ku mbalama yuze yakwe Yodani, nu ku ncende yakwe Tuli na Sidoni, lino yuvwile vintu vino wacitanga, iiza kunoli.

⁹ Iumba lyali likulu cuze, caleka Yesu anena alondezi yakwe kumuteyanyizizya uwato mwakwikala pakuti antu yatamuunganila.

¹⁰ Lyene apozya antu aingi, na yonsi alwale yapupumilanga kuya kunoli pakuti yamukumye sile.

¹¹ Na lyonsi lino antu yano ali ni mipasi yankota yamulola yafukamilanga Yesu nu kulaizya yati, “Wewe Mwana wakwe Leza!”

¹² Yesu apeela ilamulo ku mipasi yankota kuti itamumanyisya ku muntu nanti umwi.

Yesu wasolola atumwa ikumi na yaili

¹³ Yesu akwela umwamba, aama yano mwine walondanga, nao iiza kunoli.

¹⁴ Alino asola penepo alondezi ikumi na yaili, yano wapile mulimo wakuya atumwa, kuti yaya pamwi nawe nupya kuti ayatuma ku kukosola

¹⁵ nu kuya na maka akufumya mipasi yankota.

¹⁶ Yaa, ali atumwa ikumi na yaili yano wasolwile. Simoni (Wino Yesu watemile zina lyakwe Petulo),

¹⁷ Yakobo na Yoane mwina wakwe, yano ali ana aonsi yakwe Zebedi (Yano Yesu watemile zina lyakwe Boanego, cikusenula ukuti “Alumendo ali ni lango likalale wa kupangalansya kwa nkuwa”).

¹⁸ Andeleya, Filipo, Batolomeo, Mateo, Tomasi, Yakobo mwana Alufeo, Tandeo, Simoni kalwisya wa untungwa,

¹⁹ na Yuda Iskalyoti uwakoofile Yesu.

Yesu na Belezebu

²⁰ Yesu apita kuno wikalanga. Nupya iumba likulu likongana. Yesu na alondezi yakwe yatakweti nsita yakuti yalye.

²¹ Lino akazi kakwe yuvwile pali cii, iiza kuti yamutole, pano antu yatangi, “Watapena!”

²² Lyene yakasambilizya ya Masunde yamwi afumile ku Yelusalemu yavwanga yati, “Ali na Belezebu munoli! Mu maka ya mwanangwa wa mipasi yankota amuno akafumizya mipasi yankota.”

²³ Alino Yesu ayaama kuti iize kunoli nga ayanena mu milumbe ati, “Uzye Ciwa angafumya Ciwa uli?

²⁴ Antu amu wene ndi yakatukilana aisikulu nu kuilwisya, uwene uo ulapaatukana.

²⁵ Antu amu ng'anda imwi ndi yakatukilana aisikulu nu kuilwisya, yene yalapaatukana.

²⁶ Caleka wene wakwe Ciwa ndi waikatukila uwisikulu, wene utangakoma ulapaatukana, nupya ilaya mpelelekezyo yakweo.

²⁷ “Kusi umuntu umwi angazanza ing'anda ya muntu wa maka nu kusenda vino wakwata suka inkolelo wanyepa umuntu wa maka, alino lyene angazanza ing'anda yakwe.

²⁸ “Cumi namunena vino maifyo ya antu na mazwi yao a misuli kuli Leza yonsi yangelelwa.

²⁹ Lelo wino wensi alavwanga mazwi ya misuli pali Mupasi Wamuzilo wene atalelelwa, pano ale watacita iifyo litalatala lyelelwe.”

³⁰ Yesu wavwanzile cii pamulandu wakuti antu yamunenyile yati, “Ali nu mupasi wankota munoli.”

Nyina na ina yakwe Yesu

³¹ Lyene lino nyina na ina yakwe Yesu yafika, iimilila panzi yatuma umwi kuti akamwame.

³² Mwali ni umba likulu ilyatenzi ala limuzingulwike, nga yamunena yati, “Ala nyoko na anyonko yaimi panzi yakukulonda.”

³³ Yesu ayauzya ati, “Uzye mayo na ina yane aaweni?”

³⁴ Alino acelecensya pa antu yano amuzingulwike, nga ayanena ati, “Lolini, yaa, ali yamayo, na yaa, ali ina yane.

³⁵ Pano wino wensi akacita vino Leza akalonda, wene ali mwina wane, na kaci wane, na mayo.”