Mako 2 - Amazwi Yakwe Leza 2013

¹ Pacisila ca manda yanono Yesu aswilila ku Kapenaumu, nga antu yuvwa ukuti ali mu ng'anda.

² Alino antu aingi iiza yazula ing'anda kufika nu mu mulyango kwene. Ala akukosola mazwi yakwe Leza kunoyali.

³ Lyene kwizile na antu yamwi ala yasenzile umuntu uwali cite, yamuleta kuli Yesu.

⁴ Lelo pamulandu ni umba ciyaposya kumufisya kunoli. Alino yavimbula pi paala kulingana na pano Yesu wali, kuti ingizye icintamba apali umuntu cite.

⁵ Lino Yesu walola utailo wao, anena icite ati, “Mwanane, maifyo yako yelelwa.”

⁶ Lyene yakasambilizya ya Masunde yamwi alipo yelenganya mu myenzo yao yati,

⁷ “Icani cino wene akuvwanga vii? Yaa, a mazwi ya misuli kuli Leza! A Leza wenga sile angelela maifyo?”

⁸ Lilyo kwene Yesu amanya vino yakwelenganya mu myenzo yao, alino ayauzya ati, “Uzye pacani mukwelenganya vii mu myenzo inu?

⁹ Uzye icangupala icani, kunena umulwale kuti, ‘Maifyo yako yelelwa,’ nanti kuti, ‘Katuka, nyemula icintamba cako utandike nu kupita.’

¹⁰ Nkasi musininkizye ukuti Mwana wa Muntu ali na maka muno nsi akwelela amaifyo.” Alino avwanga ku cite ati,

¹¹ “Nakunena, katuka, nyemula icintamba cako, pitanga ukwako!”

¹² Lino yonsi yacili lolekesya, umuntu akatuka, lilyo kwene anyemula icintamba cakwe, apita. Onsi yazunguka cuze yalumbanya Leza yati, “Tutatala twalola cintu cimwi wakwe cii!”

Yesu waama Levi

¹³ Yesu aswilila ku nkumba yakwe yemba wa Galile. Iumba likulu cuze liiza kunoli, nawe atandika kulisambilizya.

¹⁴ Lino wapitanga, alola kasonkisya, Levi mwana Alufeo, ala atenzi mu ng'anda ya musonko. Yesu nawe amunena ati, “Ndondela.” Levi nawe akatuka amulondela.

¹⁵ Lino Yesu na alondezi yakwe yali pa cakulya mu ng'anda yakwe Levi, yakasonkesya aingi na yakaifya kwene, yatenzi ala yakulya nawe, pano kwali aingi amulondile.

¹⁶ Lyene lino yakasambilizya ya Masunde amwi umba lya Afaliseo yaweni Yesu akulya pamwi na yakaifya na yakasonkesya, yuzya alondezi yakwe yati, “Uzye pacani cino akalila pamwi na yakasonkesya na yakaifya?”

¹⁷ Pa kuvwa cii, Yesu nawe ayanena ati, “Antu apuma yasilonda sing'anga, suka sile alwale. Ntiza ku kwama aololoke, lelo nizila yakaifya.”

Kuizilizya ukulya.

¹⁸ Pa kasita kamwi alondezi yakwe Yoane Kawatizya pali pamwi na Afaliseo yaizilizyanga ukulya. Antu yamwi izile kuli Yesu yamuzya yati, “Uzye pacani cino alondezi yakwe Yoane Kawatizya na alondezi ya Afaliseo yakaizilizya ukulya, lelo alondezi yako yene yasyaizilizya ukulya?”

¹⁹ Yesu nawe aasu ka ati, “Uzye asukilizi ali pa cimulo ca winga yangaizilizya ukulya lino yali pamwi na siwinga? Citangaya vivyo! Lino yali pamwi na siwinga yatange yaizilizye.

²⁰ Lelo manda yaliza lino siwinga alasendwa kufuma panoyali, lyene alino yalaizilizya ukulya.

²¹ “Kusi umuntu akakampika cikampa cipya pa nsalu yampiti, pano cikampa cipya cilakambatuka nu kulepula insalu yampiti, nu kukuzya icipongo penepo.

²² Nanti uzye antu yangitulwila waini mupya mu nyambi zyampiti, pano waini mupya angalepula inyambi, nga waini pamwi ni nyambi vingononeka. Lelo waini mupya alinzile kwitulwilwa mu nyambi zipya.”

Iuzyo lya pamulandu wi Sabata

²³ Uwanda umwi pa Sabata Yesu wapitanga asalala mu vyalo vya ngano. Na alondezi yakwe yali nawe, Lino yakupita alondezi yatandika kutinkula misakinta ya ngano yala yakulya.

²⁴ Afaliseo yayalola, iyuzya Yesu yati, “Lola, alondezi yako yakucita cii citalingine na Masunde itu kucita pa Sabata?”

²⁵ Yesu nawe aasuka ati, “Uzye mutawelenga cino Davidi wacisile lino wene na antu yano wali nao yulilwe nupya yuvwile inzala?

²⁶ Mu manda yano Abiata wali a Simapepo Mukulu, Davidi wingile mu ng'anda yakwe Leza nu kulya mikate iyaziliziwe kuli Leza, ino masunde yazumilizya yasimapepo sile ukulya. Alino wapile na antu yano wali nao.”

²⁷ Lyene Yesu amalila na mazwi yakuti, “Sabata lyacitilwe ukwazwa umuntu. Muntu ataumvilwe ku kutekwa uzya ni vikumile Sabata.

²⁸ Acino Mwana wa Muntu wakwata maka akupingula vya kucita na pa Sabata kwene.”