Mako 15 - Amazwi Yakwe Leza 2013

Yaleta Yesu kwi Tengo lyakwe Pilato

¹ Lyene katondo, yasimapepo akalamba, aikolo Ayuda, yakasambilizya ya Masunde, pamwi ni nkombe zya mwi Tengo zyonsi, yakongana, yalanzyanya vya kucita. Alino yamunyepa, yamusenda nu kumupeela kuli Pilato.

² Pilato nawe amuuzya ati, “Uzye wewe uli Mwene wa Ayuda?” Yesu nawe aasuka ati, “Watuvwanga.”

³ Alino yasimapepo akalamba yamulongwela milandu iingi,

⁴ caleka Pilato nupya amuuzya ati, “Uzye usi na cakuvwanga? Silola milandu uwingi ino yakulongwela!”

⁵ Lelo Yesu nupya atavwanzile cimwi, caleka Pilato azunguka.

Yesu wapingwilwa ukufwa

⁶ Pa nsita ya kuzevya Cimulo ca Ucilo lwali ulutambi lwakwe Pilato kusapwila antu munyepwe wenga wino yakasi.

⁷ Lelo pali umuntu umwi, zina lyakwe a Balaba, wino wali mu ng'anda yaminyololo pamwi na antu asangukile uteko nu kukoma antu mu mpanzela.

⁸ Lyene lino iumba lyakongana, litandika kulenga Pilato kuti acite vino akayacitila.

⁹ Pilato nawe ayauzya ati, “Uzye mukulonda kuti musapwile Mwene wa Ayuda?”

¹⁰ Uzizye cii pano wamanyile vino yasimapepo akalamba yapile Yesu kunoli pamulandu wa uzuwa wao.

¹¹ Lelo yasimapepo akalamba yatunkola iumba kuti lilenge Pilato kuyasapwila Balaba.

¹² Nupya Pilato auzya iumba ati, “Uzye icani cino mukulonda kuti ncite kuli wino mukuti Mwene wa Ayuda?”

¹³ Nao yasanzika mazwi yao, yati, “Atanwe pa lupanda!”

¹⁴ Pilato ayauzya ati, “Uzye pacani? Uzye wataifya cani?” Nao yasanzika mazwi yao nu kuluta, yati, “Atanwe pa lupanda!”

¹⁵ Pilato walondanga kuzanzya iumba. Caleka ayasapwila Balaba. Lyene apingula kuti yume Yesu vikoti, nga ayapeela kuti yamutane pa lupanda.

Asilika yasoweka Yesu

¹⁶ Asilika yatwala Yesu mukasi ka musolo wi sano lya mulasi nu kwama impuka zya asilika.

¹⁷ Yamuzwika mwingila uyenzulukile, yaluka ingala ya myunga, yamuzwika ku mutwe.

¹⁸ Yatandika kumusoweka yati, “Kwaita, Mwene wa Ayuda!”

¹⁹ Lyene yamupoola ni ntuwa pa mutwe, yamuswila mati nu kumufukamila kwati yakumucindika.

²⁰ Lino yamala kumusoweka, yamuzula mwingila uyenzulukile alino yamuzwika vizwalo vyakwe. Lyene yamusenda kunzi kuti yakamutane pa lupanda.

Yesu watanwa pa lupanda

²¹ Mu nzila yakomanya umuntu zina lyakwe a Simoni, uwaku Kuleni, isi wakwe Alekizanda na Lufusi, ala akwiza mu musumba kufuma mu mpanga. Lyene asilika yamupatikizya kusenda lupanda lwakwe Yesu.

²² Alino yasenda Yesu ku cifulo camwangwa Gologota, cikusenula ukuti, “Pa cifulo ci panga.”

²³ Lyene yamupeela waini muminkane nu mulembo mule wakulesya kuwaya, lelo wene atamwile.

²⁴ Lyene yamutana pa lupanda, yankana ni vizwalo vyakwe, yapendola pakuti yalole vino cila muntu amapelwa.

²⁵ Yali nsita yakwe 9 koloko katondo lino yamutanyile.

²⁶ Cimanyisyo ca mulandu uno wapilwe calemvilwe pa cimpampa papela citi, “Mwene wa Ayuda.”

²⁷ Lyene yatana vipondo viili pali pamwi na Yesu, conga kwi kasa lilunji ni cuze kwi mani lyakwe. [

²⁸ Cii cacitike pa kufikilizya malembelo yakwe Leza akuti, “Wapendilwe pamwi na yakaifya.”]

²⁹ Na yano apitanga mu pipi yapukunya mitwe yao nu kusoweka Yesu yati, “Ee! We muno ungomoola Ng'anda ikulu yakwe Leza nu kuikula mu manda yatatu,

³⁰ ika ku lupanda uituule.”

³¹ Vivyo kwene yasimapepo akalamba na yakasambilizya ya Masunde nao yamusoweka yati, “Watuulanga auze. Lelo wene atangaituule!

³² Lekini Katuula uwalavilwe, mwene wa Izlaeli, aike pa lupanda kuti tulole nu kutaila.” Alino na yano atanyilwe pamwi nawe, nao kwene yamusoweka.

Imfwa yakwe Yesu

³³ Lino ilanzi lyafika umutwe papela (12 koloko), impanga yonsi inyepwa ni mfinzi kufika na pano ilanzi lyatemba (3 koloko).

³⁴ Lyene lino ilanzi lyatemba (3 koloko) Yesu alaizya ni izwi likulu ati, “Eloi, Eloi, lama sabakatani?” Cikusenula ukuti, “Leza wane, Leza wane, pacani wantazyela.”

³⁵ Lino yamwi aimi pipi yuvwa cii, yati, “Uvwini, akwama Eliya!”

³⁶ Wenga uwa munoyali asimula nu mwepu, auombeka muli waini musasalume. Alino autunga ku kamuti, amutambikila pa mulomo kuti amwe, ala yakuti, “Tekelini, tulole ndi Eliya amaiza amwisye pa lupanda!”

³⁷ Alino Yesu alaizya ni izwi likulu, nga afwa.

³⁸ Cisalu ca mu Ng'anda ikulu yakwe Leza cilepuka pakasi kufuma papela kufika na pansi,

³⁹ musika wa mpuka ya vita umwanda onga, uwaimi pipi nu lupanda, lino walola vino Yesu wafwa, avwanga ati, “Cumi umuntu wii, wali Mwana wakwe Leza!”

⁴⁰ Kwali anaci yamwi katalamukila ala yakulolekesya. Pali yaa, pali Maliya uwaku Magadala, Maliya nyina wakwe Yakobo umwance na Yosefu, na Salome.

⁴¹ Yene yalondelanga Yesu lino wali ku Galile, nu kumutumikila. Kwali anaci nayauze aingi aizile nawe ku Yelusalemu.

Kuzikwa kwakwe Yesu

⁴² Cali lino ilanzi lyatemba pa wanda wakuteyanya, lino Sabata lyati lyatandika.

⁴³ Yosefu uwaku Alimatiya, wino wali mucindame uwamu nkombe zya mwi Tengo, uwa lolelanga kwiza kwa Wene wakwe Leza, aposya aya kuli Pilato kuyalenga icala cakwe Yesu.

⁴⁴ Pilato azunguka pakuuvwa ukuti Yesu afwile mpiti. Aama musika wa mpuka ya vita umwanda onga nu kumuuzya ndi Yesu afwile mpiti.

⁴⁵ Pacisila lino uvwa kuli musika, Pilato azumilizya Yosefu kuti asende icala.

⁴⁶ Yosefu wakazile insalu itiswe yamutengo nupya isalale. Alino aisya icala pansi, acipomba mu nsalu, nga aya aciika mwi lindi lino yafukwile mwi we. Lyene akunkulusizyapo iwe likulu pa mulyango wi lindi.

⁴⁷ Maliya uwaku Magadala na Maliya nyina wakwe Yosefu yalola vino icala cakwe Yesu calalikwa.