Mako 14 - Amazwi Yakwe Leza 2013

¹ Kwasile manda yaili kufika pa wanda wa kuzevya Cimulo ca Ucilo nga ni Cimulo ca Mukate usi na Citutumusi. Yasimapepo akalamba na yakasambilizya ya Masunde yalondanga inzila yakuti yalemelemo Yesu munkama nu kumukoma.

² Lelo yatile, “Tutalinzile kucita cii pa wanda wa kuzevya Cimulo ca Ucilo, pano antu yangacita mpanzela.”

Mwanaci umwi Wapongolwela Yesu Mafuta ku Betaniya

³ Yesu wali mu Betaniya mu ng'anda yakwe Simoni, wino uwalwile tembwe. Lino walyanga, umwanaci umwi aiiza kunoli nu musazi uwazilemo amafuta ya nadi acinunu cisuma nupya amutengo ukome cuze. Alino atama mulomo wa musazi nu kupongolwela amafuta pa mutwe wakwe Yesu.

⁴ Lelo yamwi yasoka cuze yavwanzyanya yati, “Uzye icani cino ononela amafuta vii?

⁵ Yange yakaziwe pa mutengo wa mpiya myanda itatu nu kuluta, nga ni mpiya zipelwe ku apina.” Lyene yang'wing'wintika yatumfya umwanaci.

⁶ Lelo Yesu avwanga ati, “Mulekini! Pacani mukumutumfya? Watacita cintu cisuma cuze kunondi.

⁷ Apina mukaya nao pe, nupya mungayazwa nsita yonsi ndi mukulonda. Lelo nemo mutalaya nani pe.

⁸ Umwanaci wii watacita cino angacita! Watapongolwela amafuta yaa acinunu cisuma pa mwili wane, kuti auteyanye inkolelo ya nsita ya kunzika.

⁹ Cumi, namunena vino, konsi kuno Ilandwe Lisuma lilakosolwa mu nsi yonsi, cii cino umwanaci wii wacita cilalandwa kuti antu yamwiusya.”

Yuda wazumila kukoopa Yesu

¹⁰ Lyene Yuda Iskalyoti, wenga uwamu alondezi ikumi na yaili, waile kuli yasimapepo akalamba kuti ayakoopele Yesu.

¹¹ Yazanga pakuuvwa vino wayanena, nga yamulaya kumupeela impiya. Caleka Yuda atandika ukulonda inzila iya kukoopelamo Yesu kunoyali.

Yesu walya Cimulo ca Ucilo pamwi na alondezi yakwe

¹² Pa wanda wakutandika kuzevya Cimulo ca Mukate usi na Citutumusi, lino ana ya mfwele a Ucilo yakakomwa, alondezi yakwe yamuzya yati, “Uzye aukwi kuno ukulonda kuti tuye tukakuteyanyizizye Cimulo ca Ucilo?”

¹³ Alino Yesu atuma yaili amu alondezi yakwe ayanena ati, “Yangini mu musumba, amuno mumakomanya umonsi asenzile insembo ya manzi. Namwe mumulondele nu mu ng'anda kwene muno

¹⁴ amaingila. Alino munene mwine wa ng'anda muti, ‘Kasambilizya wati, uzye muputule ulikwi kuno alondezi yane pamwi nani tumalila Cimulo ca Ucilo?’

¹⁵ Lyene amaya kamulange muputule ukulu cuze uwa ng'anda ya papela, muno vyonsi vyati viteyanyiziwa ningo. Amuno mututeyanyizizye vyonsi.”

¹⁶ Lyene alondezi yapita, yaya ku musumba yazana vyonsi wakwe vino Yesu wayanenyile. Alino nao yateyanya Cimulo ca Ucilo.

¹⁷ Lyene lino kwaya manguzi, Yesu aiiza na alondezi yakwe ikumi na yaili.

¹⁸ Lino yali pa cipango yakulya, Yesu ayanena ati, “Wenga uwa munomuli amankoopa, wiyo akulya pamwi nani.”

¹⁹ Alondezi yasakamikwa nga yatandika kumuuzya wenga wenga yati, “Uzye anene ukunena?”

²⁰ Yesu nawe aasuka ati, “Awenga uwa mwi kumi na yaili, wino amateela umukate pali pamwi nani mu lweso.

²¹ Mwana wa Muntu alafwa wakwe vino calembwa pali aliwe, lelo kalanda ku muntu wino amakoopa Mwana wa Muntu! Cange cizipe umuntu wiyo ndi atavilwe!”

Cimulo ca Mwene

²² Walanga yacili yakulya, Yesu atoola mukate, ataizya Leza, aumokoola, alino aupela ku alondezi yakwe. Lyene avwanga ati, “Tolini, uu uli mwili wane.”

²³ Lyene atoola ulwako, ataizya Leza, ayapeela, alino nao yamwamo.

²⁴ Yesu avwanga ati, “Uu uwazi wane, uno Leza watamapo insimbi pa upangano, uno wapongololwa pamulandu wa antu aingi.

²⁵ Cumi, namunena vino, ntalamwa nupya vifenwa vya vizao vya matingi kufika ku wanda uno ndamwa ivipya mu Wene wakwe Leza.”

²⁶ Lyene lino iimba ulwimbo lwa kulumbanya Leza, yafuma yaya ku Mwamba wa Olivi.

Yesu wasowela vino Petulo amamukana

²⁷ Yesu nawe ayanena ati, “Mwensi kwene mumamfutatila nu kunsya nenga, pano calembwa cati, ‘Ndakoma kacema, ni mfwele zilasalangana.’

²⁸ Lelo lino ndazyukuka, ndamukolelela ku Galile”

²⁹ Petulo avwanga ati, “Nanti yonsi yalakufutatila nemo ntalacicita.”

³⁰ Yesu anena Petulo ati, “Cumi nakunena vino usiku kwene uu, lino mukolwe atacili alamule maila yaili, wemo umankana maila yatatu ale ukuvwanga vino utamanyile.”

³¹ Lelo Petulo avwanga na maka ati, “Nemo nanti cingaya cakuti imfwe pamwi nawe, ntangankukane inti ntakumanyile.” Na alondezi yonsi yavwanga cili conga.

Yesu wapepa mu Getesemani

³² Lyene yaya ku cifulo cino camwangwa Getesemani, alino Yesu anena alondezi ati, “Ikalini paa, lino nkupepa”

³³ Alino asenda Petulo, Yakobo na Yoane, nga atandika kunyunguluka nu kusakamikwa.

³⁴ Alino ayanena ati, “Umwenzo wane wanyomelwa nu ulanda pipi ni mfwa. Syalini pano nu kupempula.”

³⁵ Apita katalamukila panono, afukama pansi nga apepa ukuti, “Ndi cingaya, kasita ka ucuzi kasisiwe kunondi.”

³⁶ Apepa ati, “Tata, vintu vyonsi ivyangupale kunuli. Sisya ulwako luu lwa ucuzi kunondi. Kusi kulonda kwane, lelo kulonda kwako kucitike.”

³⁷ Lyene awela azana alondezi yatatu yakaswile. Alino anena Petulo ati, “Simoni, uzye nawe ukaswile? Uzye usi na maka akupempula nanti aawa wenga?”

³⁸ Alino nawe ayanena ati, “Pempulini, nu kupepa kuti mutaponela mu matunko. Umwenzo ukulondesya lelo umwili uutonte.”

³⁹ Nupya aswilila ku kupepa, ala akuvwanga mazwi ali yamwi kwene.

⁴⁰ Lyene lino wawela ku alondezi nupya kwene azana yakaswile, pano manso yao ala yati yanyoma nu tulo. Lelo yatali na cakuvwanga.

⁴¹ Lyene lino wiza iila lyakwe citatu, ayanena ati, “Uzye mucili mukaswile nu kupuza? Icilingana! Kasita kati kafika! Lolini, Mwana wa Muntu akupelwa mu makasa yakwe yakaifya.

⁴² Katukini, tuini twapita. Lolini, umuntu amankoopa wapalama!”

Kulemwa kwakwe Yesu

⁴³ Walanga lino Yesu acili vwanga, Yuda, wenga uwamu alondezi ikumi na yaili, afika. Wali ni umba ilyasenzile mpanga ni zya ntuwa, ala yatumilwe na yasimapepo akalamba, na yakasambilizya ya Masunde, na aikolo amu Ayuda.

⁴⁴ Kakoopa wapile iumba cimanyililo ati, “Muntu wino namatonsola ale ali wiyo kwene wino mukulonda. Mumuleme mumusende nu kumulinda ningo.”

⁴⁵ Lilyo kwene lino Yuda wafika, aya kuli Yesu amunena ati, “Kasambilizya!” Lyene amutonsola.

⁴⁶ Alino yalema Yesu yamusenda.

⁴⁷ Lelo wenga wamuli yano aimi pipi asomola lupanga lwakwe, asempa ikutwi lya muzya wakwe Simapepo Mukulu.

⁴⁸ Lyene Yesu ayanena ati, “Uzye mwizile kuli nene ni mpaanga ni zya ntuwa pa kundema, ungati nene cipondo?

⁴⁹ Nali namwe manda aingi ala nkusambilizya mu Ng'anda ikulu yakwe Leza, nga namwe mutandemile. Lelo pano amalembelo yalinzile yafikiliziwe.”

⁵⁰ Alino alondezi yonsi yutuka yamusya.

⁵¹ Lelo kwali umulumendo umwi, wino wazwite sile insalu itiswe, uwalondile Yesu. Yezizye kuti yamuleme,

⁵² lelo yamulema mu nsalu, afyumbutuka, autuka tupu.

Yesu mwi Tengo lya Ayuda

⁵³ Lyene yasenda Yesu ku ng'anda yakwe Simapepo Mukulu, kuko kuno yasimapepo akalamba, aikolo Ayuda na yakasambilizya ya Masunde yakongine pamwi.

⁵⁴ Lelo Petulo wene amulondela katalamukila, apita mpaka nu mu musolo wa ng'anda yakwe Simapepo Mukulu. Aya aikala pali pamwi na yakalinda amu Ng'anda ikulu yakwe Leza, aota umoto.

⁵⁵ Yasimapepo akalamba ni nkombe zyonsi zya mwi Tengo yezya kulonda umboni waufi pali Yesu kuti yamukome, lelo yatazanyile nanti umwi.

⁵⁶ Pano antu aingi yapezile umboni pali aliwe, lelo umboni wao uleyana.

⁵⁷ Lyene antu yamwi yakatwike nu kupeela umboni waufi pali Yesu, yati,

⁵⁸ “Tuvwile akuti, ‘Ndomoola Ng'anda Ikulu yakwe Leza ino antu yakuuzile, nga nani ndakuula yuze mu manda yatatu, ino itangakuulwa na antu’”

⁵⁹ Nalyo kwene umboni wao uleyana.

⁶⁰ Simapepo Mukulu aimilila nkolelo yao, auzya Yesu ati, “Uzye usi na cakuvwanga pali vino yakukulongwela?”

⁶¹ Lelo Yesu aya cele, atavwanzile nanti cimwi. Nupya Simapepo Mukulu amuuzya ati, “Uzye wewe uli Katuula uwalavilwe, Mwana wakwe Leza Mupolelelwe?”

⁶² Yesu nawe aasuka ati, “Anene kwene, nga mulalola Mwana wa Muntu atenzi kwi kasa lilunji lyakwe Leza Wamaka yonsi nu kwiza mu makumbi mwiyulu!”

⁶³ Lyene Simapepo Mukulu alepula vizwalo vyakwe avwanga ati, “Tusikulonda umboni nauze!

⁶⁴ Mwati muvwa mazwi ya misuli apali Leza. Uzye mukwelenganya uli?” Onsi yaasuka ukuti alinzile kukomwa.

⁶⁵ Alino yamwi yatandika kumuswila mati, nu kumuvimba pa manso nu kumuma yavwanga yati, “Ale tunganya! Uzye aweni uwakuma?” Lyene asilika nao yamusenda yamuma.

Petulo wakana Yesu

⁶⁶ Lino Petulo watenzi mu musolo wi Tengo, kwiza umukazyana wenga uwamu yaomvi yakwe Simapepo Mukulu.

⁶⁷ Lino walola Petulo akoota moto, amulolekesya, alino avwanga ati, “Nawe kwene wali pamwi na Yesu uwaku Nazaleti.”

⁶⁸ Lelo Petulo akana ati, “Nemo vivyo ntavimanyile. Nupya ntamanyile muno walozya.” Alino afumapo aya ku mulyango. Papo kwene na mukolwe alamula.

⁶⁹ Lyene mukazyana muomvi amulola nga nupya atandika kunena yano aimi pipi, ati, “Muntu wii, nawe kwene uwa munoyali.”

⁷⁰ Lelo Petulo akana nupya. Lino papita kasita kanono yano aimi pipi nupya yanena Petulo yati, “Cumi, nawe kwene wewe uwa munoyali, pano wewe waku Galile.”

⁷¹ Alino Petulo alapa avwanga ati, “Ntamanyile umuntu wino mukulandapo. Ndi nkutumpoka Leza andye.”

⁷² Lilyo kwene mukolwe alamula iila lyakwe ciili, na Petulo aiusya vino Yesu wamunenyile ati, “Lino mukolwe atacili alamule maila yaili, wemo umankana maila yatatu ale ukuvwanga vino utamanyile.” Lyene apongomoka, alila.