Mako 13 - Amazwi Yakwe Leza 2013

¹ Lino Yesu wafumanga mu Ng'anda ikulu yakwe Leza, wenga uwamu alondezi yakwe avwanga ati, “Kasambilizya! Silola, usuma wa mawe nu ukulu wa vikulwa vii!”

² Yesu amunena ati, “Uzye walola vikulwa vii vikulu cuze? Kutalaya iwe nanti lyonga ililasyala pi we lyuze. Yonsi kwene yalomoolwa.”

Yesu walanda pa macuzi nu kuzunyiwa

³ Lino Yesu watenzi pa Mwamba wa Olivi, kulungamana ni Ng'anda ikulu yakwe Leza, Petulo, Yakobo, Yoane na Andeleya iiza kunoli yamuzya mu nkama yati,

⁴ “Uzye alilaci lino cii cilacitika? Nupya icani cilaya cilangililo cakulanga ukuti vili pipi nu kucitika.”

⁵ Yesu ayanena ati, “Cenjelini, mutaleka umuntu nanti wenga amuponzye.

⁶ Pano antu aingi yalizila mwi zina lyane nu kuti, ‘Klistu anene!’ Yene yalaponzya antu aingi.

⁷ Lino muluvwa nkondo nga ni mpupilizi zya nkondo kutali, mutakasakamale. Vintu vii vilinzile kucitika, lelo visikulanga ukuti mpelelekezyo yatifika.

⁸ Inko zilakatukilana, na mawene yalakatukilana. Kulaya vilundumusi mu ncende zimwizimwi, nga ni vipowe. Vintu vii uli utandiko wa macuzi akulu cuze.

⁹ “Namwe mulinzile kucenjela. Yalamulema nu kumutwala ku vilye. Yalaamuma mu mang'anda ya mapepo. Pamulandu wakuti mwemwe alondezi yane, mulimilila pa manso ya ntunguluzi na yakateeka, kuti muye yakambone yane kunoyali.

¹⁰ Lelo Ilandwe Lisuma lilinzile likosolwe ku nko zyonsi.

¹¹ Lyene lino mpelelekezyo itali ifike yalamulema nu kumutwala mu cilye ca milandu mutakalanguluke nkolelo pali vino mulavwanga. Lino nsita iliza, muce muvwange cino cilapelwa kunomuli. Pano mazwi yano mulavwanga yatalaya mazwi inu, lelo yalafuma kuli Mupasi Wamuzilo.

¹² Antu yalakoopa aina yao aonsi kuti yakomwe. Mu musango uli onga na yaisi yalakoopa ana yao. Ana yalakatukila akwasi yao nu kuyakomisya.

¹³ Onsi yalamupata pamulandu wane. Lelo wino wensi alaposya kufika nu ku mpelelekezyo wene alatuulwa.

Ca winyi ca ononyi

¹⁴ “Lelo lino mulalola ‘Ca winyi ca ononyi’ cimilila pa cifulo cino citalinzile kuyapo.” (Kawelenga ailuke vino ci cikusenula!) Lyene yonsi ali mu Yudeya yakuutukile ku myamba.

¹⁵ Wino ali pi paala lya ng'anda yakwe wene atalika nu kwingila mu ng'anda, kuti atoole cimwi asende.

¹⁶ Wino ali mu calo atakaswilile ku ng'anda yakwe, kuya tola cakuzwala.

¹⁷ Kalanda ku anaci alasenda indilwa na yano alaonsya ana mu manda yalya!

¹⁸ Pepini kuli Leza kuti vintu vii vitakacitike pa mwela,

¹⁹ pano macuzi ya manda yayo yalaya aipisye kuluta yano insi yamanya kufuma ku utandiko lino Leza waumvile insi kufika na ndakai, nupya yatalatala yayeko.

²⁰ Lelo Mwene ndi atacefizyeko manda yalya, kusi nanti umwi angatuulwa. Lelo pamulandu wa asololwe yakwe, Leza wacefya manda yalya.

²¹ “Lyene, umwi ndi wamunena wati, ‘Lolini, Klistu auwi kuno!’ Nanti, ‘Lolini, Klistu awilya kuku!’ Mutakamutaile.

²² Pano antu aufi yalaloleka, yano alailanda ukuti yene ali Klistu kwene, nupya ali yakasema. Yalacita vilangililo ni vizungusyo kuti yaponzye na asololwe kwene ndi cingaya.

²³ Cenjelini! Namunena vii vyonsi lino insita itali kuti ifike.

Ukwiza kwa Mwana wa Muntu

²⁴ “Mu manda yalya pacisila ca ucuzi ilanzi lilafita, umwezi utalawala,

²⁵ intanda zilapona kufuma mwiyulu, na maka amu lwelele yalatenta.

²⁶ Alino Mwana wa Muntu alaloleka, akwiza mu makumbi na maka akulu nu lulumbi.

²⁷ Alatuma angeli mu ntunga zini zya nsi ku kukolonganika asololwe yakwe Leza kufuma ku mpela yonga ya nsi kufika nu ku yuze kwene.

Isambililo lya pa musamvu

²⁸ “Sambililini pa musamvu. Lino misambo yakweo yatandika kulemba na mafwa yalelema mukamanya vino cisiku capalama.

²⁹ Mu musango uli onga, lino mulalola vintu vii vikucitika, mulamanya vino Mwana wa muntu ali pipi lwa pa mulyango kwene.

³⁰ Cumi, namunena vino, vintu vii vyonsi vilacitika lino antu amu mukulo uu onsi yatali yafwe.

³¹ Iyulu ni nsi vitalikalilila manda pe, lelo mazwi yane yene yalikalilila manda pe.

Kusi wamanya kwiza kwa wanda ulya nanti kasita

³² “Kusi nanti wenga wamanya kwiza kwa wanda ulya nanti kasita. Angeli ya mwiyulu nanti Mwana kwene yatamanya, suka sile Tata.

³³ Cenjelini, pempulini, pano mutamanyile lino nsita ii iliza.

³⁴ Cili wa muntu wino ali pa lwendo kufuma ku muzi wakwe nu kusya aomvi kuti yaangalila milimo yakwe. Lyene apeela kuli wenga na wenga incito yakuti aomba nu kunena kalinda kuti aapempula.

³⁵ Caleka, pempulini, pano mutamanyile kasita lino umwine wa ng'anda ali nu kwiza, limwi ku manguzi lino ilanzi lyawa, nanti usiku pakasi, nanti pa macaca, nanti lino ilanzi lyatunka.

³⁶ Ndi wene wapumikizya pa kwiza, atalinzile azane mukaswile.

³⁷ Cino nkunena mwemwe, acino nkunena na yonsi kwene nati, ‘Pempulini!’