Mako 12 - Amazwi Yakwe Leza 2013

¹ Lyene Yesu avwanga kunoyali mu milumbe ati, “Kwali umuntu uwalimile icalo ca matingi apindila ni cimpinda. Lyene aimbamo ni ciwina cakufenelamo matingi, nga akuula nu lupungu. Alino apanzisya icalo cakwe ku alimi nga apita ku mpanga ya kutali.

² Lino nsita yakuzombola yafisile, atuma muomvi wakwe ku apanzi kuti akatole mulingo wakwe uwa vizao vya matingi.

³ Lelo alimi yalema muomvi, yamuma alino yamuzinga, nawe apita minwe mitupu.

⁴ Alino umwine wa calo atuma muomvi namuze. Alino nawe alimi yamuma uluma nu kumuvundanya.

⁵ Umwine wa calo atuma muomvi na muze, lelo wene yamukoma. Watumile nayauze kwene aingi. Yamwi yayumanga, yamwi nao yayakomanga.

⁶ Uwasile ukutumwako umwana wakwe mukundwe. Pacisila, atuma mwana wakwe umonsi ku alimi avwanga ati, ‘Mwanane wene yalamucindika.’

⁷ Lelo alimi yalandana yati, ‘Wii ali mwana wakwe aalatoola icuma. Tuini tumukome, ni calo cimaya icitu!’

⁸ Caleka yalemile mwana yamukoma, nu kusumbila icala cakwe kunzi ya calo.”

⁹ Yesu auzya ati, “Uzye lyene, umwine wa calo ca matingi alacita uli? Aliza akome apanzi yao nu kupeela icalo ca matingi ku apanzi yauze.

¹⁰ Uzye ale mutali muwelenge ilembelo lii? ‘Iwe lino yakakuula yakanyile, lyene lyacisilwe iwe lya pitungi lya ng'anda.

¹¹ Mwene uwacita vii, uzye catuzungusya uli mu manso itu?’”

¹² Yasimapepo akalamba, yakasambilizya ya Masunde na aikolo yalondanga inzila yakulemelamo Yesu pano yamanyile vino wayasyentekanga mu mulumbe. Lelo yoopa iumba, alino yamusya yapita.

Iuzyo lya pa musonko

¹³ Lyene yamutumila Afaliseo yamwi na antu yakwe Helodi kuti yamuteye mu mauzyo.

¹⁴ Izile kuli Yesu yamunena yati, “Kasambilizya, twamanya vino ukavwanga icumi. Nupya usioopa umuntu. Wemo utaya na kasoozi. Lelo ukasambilizya Masunde yano Leza akalonda kuti antu yayela. Uzye ciine na Masunde yakwe Leza kuti twasonka kuli Kesa nanti foo?”

¹⁵ Lelo Yesu amanya usomvi uwamu myenzo yao, ayanena ati, “Uzye pacani mukungezya? Letini lupiya longa kuno ndulole.”

¹⁶ Nao yamuletela longa, nga ayauzya ati, “Uzye usyu uu, uwakwe weni? Uzye izina lii, ilyakwe weni?” Nao yamwasuka yati, “Ivyakwe Kesa.”

¹⁷ Alino Yesu ayanena ati, “Pelini Kesa vyakwakwe, Leza nawe mumupele vyakwakwe.” Lyene yazunguka pa mivwangile yakwe.

Iuzyo lya pamulandu wa kuzyukuka kufuma ku afwe

¹⁸ Lyene Asaduki, yano akati antu yatalazyukuka kufuma ku afwe iiza kuli Yesu yamuzya yati,

¹⁹ “Kasambilizya, Mose watulembile isunde ati, ‘Muntu ndi wafwa nu kusya umuci kwaula ana, umwina wakwe alinzile kupyana silenzi kuti amuvyalile ana.’

²⁰ Kwali aina cinimbali. Uwakutandika watwite mama, nga afwa kwaula kusya ana.

²¹ Lyene wakwe ciili apyana silenzi, nawe kwene afwa kwaula kusya ana. Mu musango uli onga cali cili conga kwene na kuli wakwe citatu.

²² Na cii cacitike kuli yonsi cinimbali atwite umwanaci wi, yafwile kwaula kusya ana. Lyene umwanaci uwasyalikizye ukufwa.

²³ Uzye pa wanda wa kuzyukuka wene alaya muci wakwe weni? Pano yonsi cinimbali yamutwite.”

²⁴ Yesu nawe ayaasuka ati, “Uzye asi cino mwapongela! Pano mutamanya malembelo nanti maka yakwe Leza?

²⁵ Lino afwe yalazyukuka, yatalatwala nanti kutwalwa. Lelo yalakolana wa angeli ya mwiyulu.

²⁶ Pamulandu wakuzyukuka kwa afwe, uzye mutawelenga mu lupapulo lwakwe Mose pamulandu wa kupya kwa cimpuza? Muu, amuno calembwa ukuti Leza watile kuli Mose, ‘Nene Leza wakwe Abulaamu na wakwe Isaki na Yakobo.’

²⁷ Wene asi Leza wa afwe, lelo a Leza wa antu aumi. Mwemo mwaponga cuze.”

Isunde likulu kuluta

²⁸ Kasambilizya wa Masunde umwi apano wali ala akuuvwa vino yalandanga, na vino Yesu wapile Asaduki uwasuko usuma, alino auzya Yesu ati, “Pa Masunde onsi, uzye isunde cii likulu kuluta?”

²⁹ Yesu aasuka ati, “Isunde lyacindamisya aili, ‘Uvwini mwe ina Izlaeli! Mwene Leza witu ali Mwene wenga sile.

³⁰ Uwatemwa Mwene Leza wako nu mwenzo wako onsi, nu umi wako onsi, na mano yako yonsi, na maka yako yonsi.’

³¹ Ni sunde lyakwe ciili aili, ‘Uwatemwa umuzo ndi vino waitemwa.’ Kusi isunde likulu kuluta yaa yaili.”

³² Lyene kasambilizya wa Masunde anena Yesu ati, “Kasambilizya, wavwanga ningo! Icacumi, wakwe vino wavwanga, kusi Leza namuze suka aliwe wenga sile,

³³ nu muntu alinzile kutemwa Leza nu mwenzo wakwe onsi, na mano yakwe onsi, na maka yakwe onsi, nga nu kutemwa umuze ndi vino waitemwa. Kuyela Masunde ya yaili kwaluta impolelwa zya koca nga nu wila onsi.”

³⁴ Lyene lino Yesu wamanya vino waasuka ningo, nawe amunena ati, “Usi kutali nu Wene wakwe Leza.” Pacisila cakwe cii kutali umuntu wakuuzya Yesu iuzyo na lyuze.

Iuzyo lya pali Katuula Uwalavilwe

³⁵ Lino Yesu akusambilizya mu Ng'anda ikulu yakwe Leza, auzya antu ati, “Uzye yakasambilizya ya Masunde yangalanda uli yati Katuula uwalavilwe umwana wakwe Davidi?

³⁶ Mupasi Wamuzilo walenzile kuti Davidi avwange ati, ‘Mwene wanenyile Mwene wane ati, Ikala kwi kasa lilunji lyane kufika lino ndakucimvizya anisi yako.’

³⁷ Davidi umwisikulu wamwamile ati, ‘Mwene.’ Uzye lyene, Katuula uwalavilwe angaya uli umwana wakwe Davidi?” Iumba likulu cuze, ilyuvwanga kuli Yesu ilizanga cuze.

Yesu wasokela alondezi yakwe pamulandu wakwe Yakasambilizya ya Masunde

³⁸ Lyene ayasambilizya ati, “Cenjelini kuli yakasambilizya ya Masunde, yano atemwa kutandala ni mingila yao itali nu kulamukwa nu mucinzi mu masokoni.

³⁹ Yano atemwa kwikala pa vilimba vya ucindami mu mang'anda ya mapepo na pa vifulo visuma pa vimulo.

⁴⁰ Yano akaliila yamukamfwilwa vyuma mu ucenjezi nu kuyasomba pa kuyapepela mapepo atali. Yaa, kuvunukwa kwao kulaya kukulu cuze.”

Uwila wakwe mukamfwilwa

⁴¹ Alino Yesu aikala pipi ni cipao ca mawila mu Ng'anda ikulu yakwe Leza, ala akulola vino antu yakuta mawila yao. Akama aingi yatangamo impiya zya mawila.

⁴² Lyene mukamfwilwa mupina aiiza asumbamo tumakowili twiili.

⁴³ Yesu aama alondezi yakwe pali pamwi ayanena ati, “Cumi namunena vino mukamfwilwa wii, mupina, wata uwila mu cipao kuluta onsi.

⁴⁴ Pano yonsi yati yapela mawila pa kuvulilwa kwao. Lelo wene mu upina wakwe, watapela vyonsi vino wali navyo vyange vimwazwe mu umi wakwe.”