Mako 11 - Amazwi Yakwe Leza 2013

¹ Lino yapalama ku Yelusalemu, iiza ku misumba ya Betifage na Betaniya, iyali pa Mwamba wa Olivi. Yesu atuma alondezi yakwe yaili

² ayanena ati, “Yangini ku muzi ulya uuli inkolelo inu. Lyene lino mwafika kuku, lilyo kwene mumaya mukazane mwana punda anyefilwe, wino umuntu atatala wakwelapo. Mumusapule mumulete kuno.

³ Muntu umwi ndi wamuzya wati, ‘Uzye pacani mukucita cico?’ Mumunene muti, Mwene akumulonda, nupya amamuwezya zuwa”

⁴ Lyene yapita yaya yazana mwana punda anyefilwe lwa mu museo pa mulyango wa ng'anda. Lino yasapulanga mwana punda,

⁵ yamwi aimi pipi yuzya yati, “Uzye pacani mukusapwila mwana punda?”

⁶ Nao yaasuka wakwe vino Yesu wayanenyile, na ainipamba yayaleka yapita.

⁷ Lino yatwala mwana punda kuli Yesu, yanzapo ni nsalu zyao, nga akwelapo.

⁸ Antu aingi yanza insalu zyao mu museo, alino yamwi yatema misambo ya miti mu vyalo nu kwanza mu museo.

⁹ Antu ali nkolelo nga na alondelile cisila yonsi pamwi yasanzika mazwi yao yati, “Mucinzi upelwe kuli Leza! Walongo awiyo akwiza mwi zina lya Mwene!

¹⁰ Walongo Uwene ukwiza, Uwene wakwe tata Davidi! Mucinzi upelwe kuli Leza!”

¹¹ Yesu aingila mu Yelusalemu, nga aya mu Ng'anda ikulu yakwe Leza, alino acelecensya konsi konsi. Lelo pano yali amanguzi, apita aya ku Betaniya pamwi na alondezi yakwe ikumi na yaili.

Yesu watipwila musamvu

¹² Uca katondo, lino yafumanga ku Betaniya, Yesu auvwa inzala.

¹³ Lyene lino walola musamvu ulembe katalamukila, nga ayako kuti akalole ndi angazanako masamvu. Lelo lino wafikapo, atazanyileko vizao suka sile amafwa yatupu, pano itali nsita ya kuseeka kwa masamvu.

¹⁴ Yesu atipwila musamvu ati, “Kusi umuntu alalyako vizao kufuma kunuli nupya!” Na alondezi yakwe yala yakuuvwa.

Yesu wazinga aculuzi mu Ng'anda Ikulu yakwe Leza

¹⁵ Lino yafisile mu Yelusalemu, Yesu aingila mu Ng'anda ikulu yakwe Leza atandika kuzinga aculuzi na akauzyanyanga vintu vyao. Lyene apenola vipango vyakwe yakakauzya ya mpiya ni vilimba vyakwe yano akazyanga inkunda,

¹⁶ nga atazumilizye nanti umwi kusenda cintu mu musolo wa Ng'anda ikulu yakwe Leza.

¹⁷ Alino ayasambilizya ati, “Uzye citalembwa mu malembelo ukuti, ‘Ing'anda yane ilaamwa ing'anda ya mapepo yakupepelamo amu nko zyonsi?’ Lelo mwemo mwaicita ininga ya iivi!”

¹⁸ Yasimapepo akalamba na yakasambilizya ya Masunde, lino yuvwa cii, yatandika kulonda inzila yakuti yakomelemo Yesu. Lelo yamoopanga, pano iumba lyonsi lyazungwike pa usambilizyo wakwe.

¹⁹ Lino kwaya manguzi Yesu na alondezi yakwe yafuma mu musumba.

Isambililo lya pa musamvu

²⁰ Akatondo, lino yakupita mu museo, yalola musamvu wati uma nu ku misisi.

²¹ Petulo aiusya icacitike nga anena Yesu ati, “Kasambilizya, lola musamvu uno watipwizile wati uma!”

²² Yesu nawe ati, “Muye nu utailo muli Leza.

²³ Cumi namunena nati wino wensi anganena umwamba ati katuka uisumbe muli yemba ndi asyakutwisika mu mwenzo wakwe, lelo wataila ukuti cino watalanda cilacitika, cii cilacitwa ndi muno avwangile.

²⁴ Caleka namunena nati, lino mukupepa nu kulenga pali cimwi, mutaile ukuti mwati mupokelela, nga mulapelwa consi cino mwalenga.

²⁵ Lino mwati mwapepa, mutala mwelela umuzo ali nu mulandu namwe pakuti, [

²⁶ So uwa mwiyulu amwelele maifyo yano mwacita.]”

Yesu yamuzya kuno wafumya maka

²⁷ Yesu afika mu Yelusalemu. Lino akupita mu Ng'anda ikulu yakwe Leza, yasimapepo akalamba, na yakasambilizya ya Masunde, na aikolo iiza kunoli

²⁸ yamuzya yati, “Uzye maka cii yano ukweti akucita vintu vii? Uzye aweni uwakupeela maka kwene yaa?”

²⁹ Yesu nawe aasuka ati, “Namamuzya iuzyo lyonga sile, namwe ndi mwaasuka namamunena uwampela maka akucita vintu vii.

³⁰ Nenini, Uzye Yoane wafumizye kwi maka akuwatizya? Uzye akuli Leza nanti ku antu?”

³¹ Nao yatandika kupazyanya aisikulu yati, “Uzye tumati uli? Ndi twati, ‘Wafumizye kuli Leza,’ nawe amati, ‘Uzye lyene, pacani mutataile Yoane?’

³² Nupya tutangati, ‘Wafumizye ku antu!’” (Yoofile antu pamulandu wakuti yonsi yasininkizya vino Yoane wali akasema.)

³³ Acino yaasuka Yesu yati, “Tutamanyile.” Yesu ayanena ati, “Nani kwene ntakumunena uwampela maka akucita vintu vii.”