Mako 10 - Amazwi Yakwe Leza 2013

¹ Lyene Yesu afuma ku Kapenaumu, aya ku muputule wa mpanga ya Yudeya alamba luzi lwa Yodani. Nupya maumba iiza kunoli, nawe ayasambilizya, mwaelile mwata wakwe.

² Lyene Afaliseo yamwi iiza kunoli yamwezya yati, “Uzye cilingine na Masunde kuti umuntu angata umuci wakwe?”

³ Yesu nawe aasuka ati, “Uzye isunde ci lino Mose wamupile?”

⁴ Nao yaasuka yati, “Mose wapile ulusa ku monsi ulwakulemba kalata wakutaana nu muci wakwe.”

⁵ Yesu nawe aasuka ati, “Mose wamulembile isunde lii pamulandu wakukoma kwa myenzo inu.

⁶ Lelo pa utandiko wa uumbo, Leza wayaumvile umonsi nu mwanaci.

⁷ ‘Pamulandu ukwene, umonsi alasya isi na nyina nu kuilundanya ku muci wakwe,

⁸ lyene oili yalaya umwili onga. Acino yatacili yaili, lelo umwili onga.’

⁹ Caleka kusi umuntu angalekanya cino Leza watalundanya.”

¹⁰ Lino yaswilila mu ng'anda, alondezi yuzya Yesu pamulandu kwene uu.

¹¹ Nawe aasuka ati, “Muntu wensi uwata umuci wakwe nu kutwala mwanaci muze ala walongozya.

¹² Nanti mwanaci kwene ndi wafuma kuli iya nu kuya twalwa ku monsi muze ala walongozya.”

Yesu wapolelela ana anono

¹³ Antu yamwi yaleta ana anono kuli Yesu kuti aiikepo makasa yakwe, lelo alondezi yayakalipila.

¹⁴ Lino Yesu wacuvwa, akalipa, anena alondezi yakwe ati, “Lekini ana anono iize kunondi, mutayalesya, pano Uwene wakwe Leza uwakwe yao ali ndi yaa.

¹⁵ Cumi namunena nati, wino wensi atalapokelela Uwene wakwe Leza wa mwana munono, wene atalingilamo”

¹⁶ Alino atoola ana ayafukatila, aika makasa yakwe panoyali ayapolelela.

Muntu mukama

¹⁷ Lino Yesu watandika kupita, umuntu asimula kunoli, aya afukama amuuzya ati, “Kasambilizya musuma, uzye icani cino ndinzile kucita kuti mpokelele umi wape?”

¹⁸ Yesu amwaasuka ati, “Uzye pacani wangama musuma? Kusi nanti umwi musuma suka Leza wenga.

¹⁹ Wamanya masunde akati, Utakoma, utalongozya, utaiya, utatumpwila umuzo, utacenjezya, wacindika so na nyoko.”

²⁰ Muntu aasuka Yesu ati, “Kasambilizya, nkayela masunde yaa yonsi kufuma ku ulumendo wane.”

²¹ Yesu amulolekesya, amutemwa, nga amunena ati, “Kwasyala cintu conga cino uulizya. Yanga kakazye vyonsi vino wakwata ukapeele ni mpiya zino ulazana ku apina. Lyene ulaya ni vyuma mwiyulu, nga wize undondele.”

²² Lino umuntu uvwa cii, aya nu ulanda nga apita akungumile, pano wali u mukama cuze.

²³ Yesu acelecensya manso nga anena alondezi yakwe ati, “Catalila akama kwingila mu Wene wakwe Leza!”

²⁴ Alondezi yazunguka pa mazwi yakwe, lelo Yesu avwanga nupya ati, “Yana mwe, catala kwingila mu Wene wakwe Leza!

²⁵ Cangupalila ingamila kupuzya mwi linso lya nsindano kuluta mukama kwingila mu Wene wakwe Leza.”

²⁶ Pali cii alondezi yazunguka cuze yavwanzyanya yati, “Uzye lyene, aweni angatuulwa?”

²⁷ Yesu ayalolekesya ayanena ati, “Ku antu citangacitika, lelo kuli Leza cingacitika, pano vintu vyonsi Leza wene angacita.”

²⁸ Petulo avwanga ati, “Lola! Swemo twasya vyonsi nu kukulondela.”

²⁹ Yesu nawe ayanena ati, “Ee, cumi namunena vino, kusi nanti umuntu wenga uwasya ing'anda yakwe, aina aonsi, yakaci yakwe, nyina, isi, ana nanti vyalo pamulandu wane nu wi Landwe Lisuma,

³⁰ atangapokelela ivingi kuluta mu nsita kwene ya mukulo uu. Alapokelela vintu vii kuluta, mang'anda, aina yakwe, yakaci yakwe, ya nyina, ana ni vyalo, nga nu kuzunyiwa kwene, nga nu umi wapee mu mukulo uuliza.

³¹ Lelo antu aingi ali ankolelo ndakai yalaya acisila, nga na ingi acisila yalaya ankolelo.”

Yesu wasowela iila lwakwe citatu pa mfwa yakwe

³² Lino yacili pa lwendo lwa kuya ku Yelusalemu, Yesu wali pa nkolelo ya alondezi, yano apeziwe mano. Antu amulondile yuvwa intete. Nupya kwene Yesu asenda alondezi yakwe ikumi na yaili pa mbali atandika kuyanena vintu vino vili nu kumucitikila.

³³ Ayanena ati, “Uvwini, tukuya ku Yelusalemu kuno Mwana wa Muntu alakoopelwa kuli yasimapepo akalamba na kuli yakasambilizya ya Masunde, nu kumuvunuka kuti afwe. Alakoopelwa ku Akulukuwa.

³⁴ Yalamusaalula, yalamuswila mati, yalamuma ivikoti, nu kumukoma, lelo pa wanda wakulenga yatatu alazyukuka aye umumi.”

Yakobo na Yoane yalenga

³⁵ Lyene Yakobo na Yoane, ana yakwe Zebedi, iiza kuli Yesu, yamunena yati, “Kasambilizya, tukulenga kuti utucitileko cintu cimwi.”

³⁶ Yesu ayauzya ati, “Uzye icani cino mukulonda kuti mucitile?”

³⁷ Nao yaasuka yati, “Lino ulikala pa cilimba cako ca wene ica lulumbi, tukulonda kuti tukikale pali pamwi nawe, wenga kwi kasa lilunji nu muze kwi mani lyako.”

³⁸ Lelo Yesu ayanena ati, “Mutamanyile cino mukulenga. Uzye mungamwa mu lwako lwa ucuzi luno indi nu kumwelamo? Uzye mungawatiziwa umu nzila ino ndinzile kuwatiziwilwamo?”

³⁹ Nao yaasuka yati, “Tungacita.” Yesu ayanena ati, “Icacumi mungamwa mu lwako luno indi nu kumwelamo nu kuwatiziwa umu nzila ino indi nu kuwatiziwilamo.

⁴⁰ Lelo ntakweti nsambu yakusolola wino angikala kwi kasa lilunji nanti kwi mani lyane. Leza alapeela vifulo kuli yano wateyanyizizya.”

⁴¹ Lino alondezi yauze ikumi yacuvwa, yasokela Yakobo na Yoane.

⁴² Caleka Yesu aama yonsi pali pamwi ayanena ati, “Mwamanya ukuti yakateeka ya antu atataila Leza yakwata maka pa antu yao, nga ni ntunguluzi zyao nazyo zyakwata uwangalizi.

⁴³ Lelo cisi vivyo muli mwemwe. Wino wensi wamuli mwemwe akulonda kuya mukulu, alinzile kuya muomvi wa yauze,

⁴⁴ na wino wensi wamuli mwemwe akulonda kuya intunguluzi, nawe alinzile kuya muzya pali onsi.

⁴⁵ Pano Mwana wa Muntu atizile kuti atumikilwe, lelo kuti atumikile yauze nu kupeela umi wakwe kuti akulule antu aingi.”

Yesu wapozya Batimeo wino uwali Impafu

⁴⁶ Yesu wizile ku Yeliko pamwi na alondezi. Lyene lino wafumanga ku Yeliko na alondezi yakwe ni iumba likulu, impafu kalenga, zina lyakwe a Batimeo mwana Timeo, watenzi pa mbali ya museo.

⁴⁷ Lino uuvwa ukuti a Yesu uwaku Nazaleti, atandika kulaizya ati, “Yesu! Mwana wakwe Davidi! Uye na mizu kunondi!”

⁴⁸ Antu aingi yamukalipila yamunena kuti amyalale. Lyene alino asanzika izwi nu kuluta ati, “Mwana wakwe Davidi! Uye na mizu kunondi!”

⁴⁹ Yesu aimilila avwanga ati, “Mwamini.” Caleka yama impafu yati, “Teku mwenzo! Katuka, akukwama.”

⁵⁰ Nawe asumba mwingila wakwe, avwandamuka, aiiza kuli Yesu.

⁵¹ Yesu amuuzya ati, “Uzye ukulonda kuti nkucitile cani?” Impafu imwasuka iti, “Kasambilizya, nkulonda kuti nalola.”

⁵² Yesu nawe amunena ati, “Pitanga, utailo wako wakupozya.” Lilyo kwene atandika kulola nu kulondela Yesu mu museo.