Mako 1 - Amazwi Yakwe Leza 2013

Kukosola kwakwe Yoane Kawatizya

¹ Lii lili Landwe Lisuma lya pali Yesu Klistu Mwana wakwe Leza.

² Ndi vino kasema Ezaya walemvile ati, “Leza wavwanzile ati, ‘Lola, ndatuma inkombe yane ikukolelele kuti ikateyanye inzila yako.’”

³ “Umwi akulaizya mu lwanga ati, ‘Zifini museo mwakupita Mwene, olololini inzila mwakupita aliwe.’”

⁴ Lyene Yoane Kawatizya walolike mu lwanga, ala akukosola ati, “Zenzukini nu kuwatiziwa, pakuti Leza amwelele maifyo inu.”

⁵ Antu aingi afumanga mu muputule wa mpanga ya Yudeya mu Yelusalemu yaile kunoli. Yene yailongwelanga maifyo yao, nga nawe ayawatizya mu luzi lwa Yodani.

⁶ Yoane wazwalanga vizwalo vyapanzilwe ku mavumbu ya ngamila, nu musipi wa mpapa mu musana, ni vyakulya vyakwe vyali a makanta nu uci uwamu mpanga.

⁷ Wakosolanga ati, “Wino akwiza pacisila cane wene uwa maka kunduta. Ntaine kwinama nu kusapula mikonda ya ndyatu zyakwe.

⁸ Nemo nkumuwatizya na manzi, lelo wene alamuwatizya na Mupasi Wamuzilo.”

Kuwatiziwa nu kutunkwa kwakwe Yesu

⁹ Cali mu manda yalya lino Yesu wizile kufuma ku Nazaleti musumba uwamu Galile, kwiza watiziwa na Yoane mu luzi lwa Yodani.

¹⁰ Lilyo kwene lino Yesu akufuma mu manzi, alola iyulu lyalekuka na Mupasi Wamuzilo akwika panoli mu musango wa nkunda.

¹¹ Ni zwi lifuma mwiyulu liti, “Wewe Mwanane mukundwe, munuli nkuzanga cuze.”

¹² Lilyo kwene Mupasi Wamuzilo atwala Yesu ku lwanga,

¹³ akuno watenzi manda makumi yani, ala akutunkwa na Ciwa. Mwali ni vilyanyi mu mpanga ilya. Lelo angeli iiza yamutumikila.

Yesu watandika imilimo yakwe mu Galile

¹⁴ Lino Yoane yamunyepa mu ng'anda yaminyololo, Yesu waile ku Galile ku kukosola Ilandwe Lisuma lyakwe Leza.

¹⁵ Avwanga ati, “Insita yati fika, nu Wene wakwe Leza wati upalama pipi! Zenzukini nu kutaila Ilandwe Lisuma!”

Yesu waama alondo yani

¹⁶ Lino Yesu wapitanga mu nkumba yakwe yemba wa Galile, alola Simoni na Andeleya umwina wakwe, ala yali ni sumbo yakuvuwa pano yali alondo.

¹⁷ Yesu nawe ayanena ati, “Izini, ndondelini, namamucita alondo ya antu.”

¹⁸ Lilyo kwene iyasya amasumbo yao yamulondela.

¹⁹ Lyene Yesu aya inkolelo panono, alola Yakobo na Yoane, ana yakwe Zebedi yali mu wato yakulimba amasumbo yao.

²⁰ Lilyo kwene ayaama, iyasya isi wao Zebedi na aomvi yakwe mu wato, yamulondela.

Yesu wapozya muntu uwali nu mupasi wankota

²¹ Yesu na alondezi yakwe iiza ku musumba wa Kapenaumu, na pa Sabata lyalondelilepo Yesu aya mu ng'anda ya mapepo atandika kusambilizya.

²² Antu amuvwile yazunguka cuze pa misambilizizye yakwe. Wene atasambilizyanga wakwe yakasambilizya ya Masunde, lelo wa muntu akweti maka.

²³ Mu ng'anda ya mapepo mwingila umuntu uwali nu mupasi wankota alaizya ati,

²⁴ “Uzye ukulonda cani kunotuli we Yesu uwaku Nazaleti? Uzye wiza kuno kuti utonone? Nati nkumanya, wewe Wamuzilo nupya wafuma kuli Leza.”

²⁵ Yesu akalipila mupasi wankota ati, “Myalala, fuma mu muntu wi!”

²⁶ Mupasi wankota utensya umuntu na maka, nu kulaizya kukulu, ufuma munoli.

²⁷ Antu yonsi yazunguka cuze, yuzyanya yati, “Uzye icani cii? Uzye uu umusango uze upya uwakusambilizizyamo na maka? Muntu wi ali na maka akupeela ilamulo ku mipasi yankota, nayo imuyela!”

²⁸ Lyene lilyo kwene impwelo ya pali Yesu isalangana konsi mu muputule wa mpanga ya Galile.

Yesu wapozya antu aingi

²⁹ Lilyo kwene lino wafuma mu ng'anda ya mapepo, aya aingila pamwi na Yakobo na Yoane mu ng'anda yakwe Simoni na Andeleya.

³⁰ Nyinavyala Simoni waizi pa musanzi, ala umulwale impepo. Zuwazuwa lino Yesu wafika yamunena pamulandu wa kulwala kwakwe.

³¹ Yesu aya amulemelela pi kasa, amwazwa kuti akatuke. Lyene impepo isila. Lilyo kwene atandika nu kuyapela ivyakulya.

³² Lyene manguzi, antu yamuletela alwale yonsi ali ni mipasi yankota.

³³ Na antu yonsi amu muzi yakongana pa mulyango wa ng'anda.

³⁴ Lyene Yesu apozya antu aingi alwile indwala zya misango yonsi. Afumya mipasi yankota ingi. Atazumilizye kuti mipasi yankota ivwangepo cimwi, pano yamumanyile.

Yesu wakosola mu Galile

³⁵ Lyene katondo tondo pa macaca, Yesu akatuka afuma mu ng'anda. Alino afuma mu musumba aya ku cifulo ukwali cele, ku kupepa.

³⁶ Simoni na auze yaya ku kumulonda,

³⁷ nga lino yamuzana, yamunena yati, “Antu yonsi yakukulonda.”

³⁸ Lelo Yesu ayanena ati, “Lekini tuye ku mizi yuze iili pipi na kuno, kuti nako kwene nkakosoleko, pano acino niziile.”

³⁹ Lyene apita monsi mu mpanga ya Galile ala akukosola mu mang'anda ya mapepo nu kufumya mipasi yankota.

Yesu wapozya umuntu uwalwile tembwe

⁴⁰ Umuntu uwalwile tembwe aiiza kuli Yesu, afukama, amupapata ati, “Ndu kasi ungampozya.”

⁴¹ Yesu aya na mizu kunoli, atambalika ikasa lyakwe amulemelela. Amunena ati, “Nkasi, pola!”

⁴² Lilyo kwene tembwe auluka nu muntu apola.

⁴³ Alino Yesu amupeela ilamulo ati, “Katuka,

⁴⁴ pitanga utanena umuntu nanti umwi pali cii. Lelo yanga kuli simapepo kuti akakulole upele impolelwa ino Mose wamunenyile, pakuti yonsi yasininkizye vino watupoziwa.”

⁴⁵ Lelo umuntu apita atandika kusalanganya ilandwe konsi konsi, cakuti Yesu aposiwa kwingila mu muzi paswe. Pamulandu kwene uu, aikala ku cifulo ukwali cele, na antu izanga kunoli kufuma konsi konsi.