Luti 4 - Amazwi Yakwe Leza 2013

Boazi watwala Luti

¹ Boazi atala aya ku mpongolo ya musumba pano antu yakomenkanilanga nga aikala kuku. Umuntu wakwe wenga uwakweti insambu ya kupyana aiza wiyo kwene wino Boazi walanzile penepo. Alino Boazi amunena ati, “We cuza, tala iza kuno nduwikale paa.”

² Lyene Boazi asolwelapo ni nkombe zya muzi ikumi lyonga azinena ati, “Mukwai ikalini paa,” nga nazyo izicita vivyo kwene.

³ Alino anena umuntu wiya uwakweti insambu ya kupyana ati, “Naomi waweluluka kuno ukufuma ku Moabu, nupya akukazya icalo icali cakwe Elimeleki umwina witu.

⁴ Nelenginye ukuti ndinzile ukutuula umulandu uu kunuli, nu kukuuzya kuti ukale pa manso ya antu atenzi pano na pa manso ya nkombe zii zyonsi izili pano. Ndi cakuti ukulonda ukukulula, ungacita cico. Lelo ndi cakuti utakasi, lyene unene kuti imanye. Pano kusi umwi akweti insambu izya kucita cico, suka sile wewe, nga ndi wakana lyene ale anene.” Nawe avwanga ati, “Namakulula.”

⁵ Lyene Boazi avwanga ati, “Pa wanda uno ulakala icalo cici ukufuma kuli Naomi na Luti umwina Moabu, ale wakalinkanya na mukamfwilwa kwene, Luti umwina Moabu, pakuti usunge izina lya musipwa kumwi ni calo cakwe.”

⁶ Pakuvwa cii, umuntu wilya uwakweti insambu ya kupyana avwanga ati, “Ndi cili vivyo, ale lyene ntangakala icalo cico pamulandu wakuti ukucita cico cingaleta uzanzo ku calo cane. Fwandi wewe kwene ulinzile kuombela pa nsambu yane, nemo naposiwa.”

⁷ Fwandi avino mu manda yalya cali pa kukulula nanti ku kauzyanya kwa cuma. Lwali ulutambi kuli kakazya ukuzula indyatu nu kuipeela kuli kakala. Mu musango kwene uo, ku ina Izlaeli lyene ale yalungamika umulandu ukulingana ni sunde.

⁸ Lyene umuntu wilya uwakweti insambu ya kupyana wavwanzile kuli Boazi ati, “Wewe kwene ulinzile ku kala icalo cico.” Alino azula indyatu yakwe nu kuipeela kuli Boazi.

⁹ Lyene Boazi anena inkombe zizi na antu ati, “Pa wanda wi lelo mwemwe muli yakambone yane ukuti nakala ivintu vyonsi kuli Naomi, ivyali ivya asipwa yaa, Elimeleki, Kilyoni na Maaloni.

¹⁰ Alino ukulundapo na Luti umwina Moabu, wiyo uwafwilwa iya Maaloni, namukalinkanya kumwi kuti aye umuci wane. Nacita cico pakuti nsunge izina lya musipwa kumwi ni calo cakwe, kuti izina lyakwe litalowa mu akazi kakwe nanti mu vyalembwa ivyamu musumba. Pa wanda wi lelo mwemwe muli yakambone yane!”

¹¹ Inkombe zizi pamwi na antu yonsi ali pa mpongolo ilya yavwanga yati, “Ee, icacumi sweswe yakambone. Si Yawe umwisikulu angaleka umwanaci wino akwiza ukwako aye ivyali Lakeli na Leya, antu yaili asandulwile ang'anda yakwe Izlaeli. Sungala ucite icampomvu mu Efulata pa kusunga izina lyakwe mu Betelemu kuti litalowa.

¹² Ukupitila mu ana yonsi yano Yawe alakupeela mu mukazyana wi, si yangala yakaye wa ana yakwe Pelezi, wino Tamala wavyalile Yuda.”

Boazi na amu mupanda wakwe

¹³ Acino Boazi asenda Luti ukwakwe nga nawe aya umuci. Lino yamanyana Yawe alenga kuti Luti asende indilwa, nga aca avyala umwana umonsi.

¹⁴ Anaci amu Betelemu iyanena Naomi yati, “Ululumbi luye kuli Yawe, wino api lelo wakupeela umwizikulu kuti akusunga. Si angala umwana wi alumbuke mu Izlaeli!

¹⁵ Mwana wii alakupeela upemwilo mu umi wako nu kukusunga mu ukoloci wako. Pasi pano nyokovyala, wino wakutemwa cuze, nupya wino watacita kunuli ivilusile ivicitwa vya ana cinimbali aonsi, uwatamuvyala.”

¹⁶ Alino Naomi atoola umwana, amupalamika kunoli, alino amwika pa makulu nga amulela.

¹⁷ Anaci aikazi ya kuku yavwanga yati, “Kwakwe Naomi kwatikuloleka umwana umonsi.” Nga iyamutemela izina yati a Obedi. Obedi wali a isi wakwe Yese, uwali isi wakwe Davidi.

¹⁸ Lyene uu uli mupanda wakwe Pelezi: Pelezi wali a isi wakwe Heziloni,

¹⁹ Heziloni wali a isi wakwe Lamu, Lamu wali a isi wakwe Aminadabu,

²⁰ Aminadabu wali a isi wakwe Nasyoni, Nasyoni wali a isi wakwe Salimoni,

²¹ Salimoni wali a isi wakwe Boazi, Boazi wali a isi wakwe Obedi,

²² Obedi wali a isi wakwe Yese, nga Yese wali a isi wakwe Davidi.