Luti 3 - Amazwi Yakwe Leza 2013

Luti watwalwa

¹ Uwanda umwi Naomi, nyinavyala Luti, amuuzya ati, “Uzye intange nkulondele ing'anda kuno ulasungwa ningo?

² Iusya ukuti Boazi umuntu witu, nga na aomvi yakwe akazyana mwaombanga nayo. Ilelo usiku Boazi amaya ku kwela imbezu zyakwe baale pa lwano lwakwe lwa kupuulila.

³ Ali cino fulala upakale na mafuta acinunu cisuma, nga uzwale ni vyakuzwala vyako ivisuma ukuluta. Lyene utentemukile ku lwano lwa kupuulila akuno ukasokelele, lelo utaleka amanye zuwa ukuti akuno uli. Ulolele mpaka amale ukulya nu kumwa.

⁴ Lino amaya ku kulala, wemo ucevye sile ku ncende kuno alalile. Alino ukapalame nu kumuvimbula ku ngazo nga akuno nawe ulambalale. Wene amaya akakunene ivyakucita.”

⁵ Luti nawe aasuka nyinavyala ati, “Namaya nkacite vyonsi vino mwanena.”

⁶ Acino Luti akatuka atentemukila ku lwano lwa kupuulila nu kucita vivi kwene vino nyinavyala watamunena.

⁷ Lino Boazi wamala ukulya nu kumwa, awe mukwai insansa izimwizila nga aya alambalala ku lutwe lwa mutumba wa mbezu zya mwata wa ngano. Luti afuma akunyanya, afika nu kuvimbula Boazi ku ngazo nga akuno alambalala.

⁸ Pakasi ka usiku lino akuti nseleuke, acilimukila alola nu kuti umwanaci umwi aizi ukuntambalilo.

⁹ Boazi pali pakumuzya ati, “We, uzye wewe weni?” Nawe aasuka ati, “Nene Luti, umuomvi winu. Mvimbini mbali ukwi sempe lya nsalu inu, pano mwemwe mwatimukwata insambu yakupyana wiyo uwali uwane.”

¹⁰ Boazi nawe amunena ati, “Si Yawe angakupolelela, mwanane. Icumi walanga apaswe ndi vino wewe wakutailwa pali vino wacita ukuluta pali vino wacisile inkolelo. Pano wemo utalondelelanga alumendo, cisi cimwi yaye akama nanti apina.

¹¹ Lyene ndakai, mwanane, utalinzile ukuvwa intete. Namakucitila vyonsi vino umanguzya, pamulandu wakuti antu yonsi amu musumba yatiyasininkizya nu kumanya ukuti wewe mwanaci umwi uwampomvu.

¹² Kwene nanti angala icacumi ukuti nene mpalamisye mu aluko, lelo akuno ali umuntu umwi akweti insambu ya kupyana.

¹³ Walutenzi kuno nu usiku kwene, nga akatondo umuntu wiyo ndi akasi angiza azumile ku kuzifya, ale cazipa. Lelo kwene ndi cakuti wiza wakana, nemo nalapa mwi zina lyakwe Yawe ukuti nene kwene indi nu kucita cico. Acino wemo lala sile ukufika akatondo.”

¹⁴ Caleka alambalala lwaku ngazo zyakwe mpaka ukufika akatondo, lelo azyuka nu kukatuka zuwa lino kutacili kuswepe. Alino Boazi amunena ati, “Utaleka umwi amanye ukuti we mwanaci wizile ulala kuno ku lwano lwa kupuulila.”

¹⁵ Boazi amunena ati, “Zula ikoti lyako nga ulyanze pansi. Lino wacita cico, Boazi apongolwelapo imbezu zyakwe baale izinyome ukulingana namanye amakilogalamu amakumi yaili nga anyepa, alino amutwika na pa mutwe. Lyene Luti atumbela inzila aswilila ku musumba.”

¹⁶ Lino Luti wafika kwakwe nyinavyala wilya, Naomi auzya ati, “Uzye ivintu vyali uli kuko, mwanane?” Luti nawe amulondolwela vyonsi vino Boazi wamucitile

¹⁷ nga alundako na mazwi ya ati, “Boazi watampela imbezu zi zyakwe baale izinyome ukulingana namanye amakilogalamu amakumi yaili. Wali wanena ukuti ntalinzile ukwiza kunuli minwe mitupu.”

¹⁸ Lyene Naomi avwanga ati, “Teeka sile umwenzo, mwanane, mpaka tulole kuno umulandu uu ukuya. Pano nga Boazi wene asikutala afuute ningo mpaka asininkizye ukuti umulandu uu wasila ilelo kwene.”