Luti 2 - Amazwi Yakwe Leza 2013

Luti waomba mu vyalo vyakwe Boazi

¹ Naomi wakweti umuntu wakwe uwali umwina kuli wiyo uwali iya wakwe. Wali umuntu umwi umukama uwamu luko lwakwe Elimeleki, ni zina lyakwe wali a Boazi.

² Alino Luti umwina Moabu anena Naomi ati, “Lekini nje umu vyalo inkasokote tumitwe twa ngano muno yatiyasinza, muli wiyo wensi amaya akanzumilizye.” Naomi nawe aasuka ati, “Ale pitanga, mwanane.”

³ Acino Luti apita aya asotolezya monsi muno yatiyasinza mpiti. Lyene cizile icicitika wakwe vii, Luti aizana akusotolezya mu calo cakwe Boazi, uwamu luko lwakwe Elimeleki.

⁴ Pa nsita kwene ilya Boazi afuma ku Betelemu nga alamuka azombozi yalya ati, “Yawe aye namwe!” Nayo iyamwasuka yati, “Si Yawe akupolelele!”

⁵ Boazi nawe ali pakuuzya kapitao wakwe yakasinza ati, “Uzye umukazyana wi umwana wakwe weni?”

⁶ Kapitao nawe aasuka ati, “Umukazyana wi umwina Moabu wino wiza na Naomi ukufuma ku Moabu.

⁷ Wataiza auzya ukuti angasotolezya umu nsaawa zino yakasinza yatiyasinza mpiti. Aizile katondotondo nga ukufuma lili kwene acili akuomba ukufika na likwene, suka sile ndakai lino akupuza panono mu mutanda.”

⁸ Lyene Boazi anena Luti ati, “Uvwa kuno mwanane. Utaezya ukuya umu vyalo vyuze ku kusotolezya nupya ute kusotolezya. Lyene waomba pamwi na akazyana aomvi yane.

⁹ Uwalola kuno aonsi yaya ku kuzombola, nawe akuno ulondele yao akusotolezya. Natimpeela ilamulo ku yaomvi yane aonsi ukuti yatalinzile ku kucuzya. Nupya lyonsi lino ulusala lwakuluma, ulinzile wamwa amanzi mu nsembo zino yatafile mpaka na papela.”

¹⁰ Apa kuvwa vii, Luti afukama pansi afupime nga anena Boazi ati, “Uzye pacani cino wansakamala vi, ne mwinamasi?”

¹¹ Boazi aasuka ati, “Nuvwa vyonsi vino wemo wacitila nyokovyala ukufuma sile lino uwako wafwile, na vino wemo wasya akwasi yako ufuma nu kumwinu wiza wikala na antu yano inkolelo utatazile umanye.

¹² Si Yawe angala akulambule sile pali vino wacita. Si Yawe, Leza wa ina Izlaeli angala akulambule, wino watuwiza ku kuzina munoli.”

¹³ Luti nawe avwanga ati, “Mwatimunkumbusuka wakwe cimwi musambazi. Mwatimuntekezya umwenzo apakulanda kunondi ne muomvi winu umu mutembo nanti angala nene mucepesye pa yaomvi inu.”

¹⁴ Lino insita ya kulya yafika, Boazi avwanga ati, “Iza kuno, ndulye umukate. Telezya nu mukate muli waini wii musasalume.” Luti nawe pali pakwikala nu kulya pamwi na yakasinza. Boazi nawe amupeela ni mpece zya ngano izisalule. Luti alya asuka aikuta, asya penepo na vimwi.

¹⁵ Lino Luti wakatuka, waya ku kusotolezya, Boazi apeela ilamulo ku yaomvi yakwe ati, “Nanti angala Luti angasotolezya ukufika na pa mitumba kwene iya ngano, mutaezya ku munenola.

¹⁶ Lelo mulinzile kusomola misakinta imwi iya ngano ukufuma mu tupo tuno mwatimusinza, nga musye pansi kuti aize asotolezye nupya mutaezya ku mukalipila.”

¹⁷ Acino Luti asotolezya mu vyalo vivi mpaka ukufika lino ilanzi lyawa. Alino apuula imbezu zizi zyakwe baale zino wakolonganike, nga azana ukuti wazuzya icipimo apipi nu kulingana na makilogalamu ikumi.

¹⁸ Alino lyene asenda aswilila ku musumba nga alangizya nyinavyala icipimo cici cino wakolonganike. Asapula na kafunda ka vyakulya vino vyalivyasyala nga apeela nyinavyala.

¹⁹ Naomi pali pakumuzya ati, “Uzye aukwi fwandi kuno wali waya ku kusotolezya ingano uwanda wi lelo? Uzye umu calo cakwe weni muno wali waya umu kuomba? Si Leza angala alu kupolelela umuntu wi uwali wakusakamala!” Lyene Luti anena nyinavyala ukuti walakuomba mu calo cakwe Boazi.

²⁰ Naomi pali pakuvwanga ati, “Si kawala! Si Yawe kalukupolelela Boazi! Yawe asita ukulanga uluse ku apuma na afwe kwene!” Naomi atwalilila ukunena Luti ati, “Umuntu kwene wiyo wapalama sana ku akazi kitu. Wene awenga pa antu itu akwata insambu zya kukupyana.”

²¹ Lyene Luti umwina Moabu azumilizya nyinavyala ati, “Ee, nupya Boazi kwene waliwanena ukuti nasinza pamwi na aomvi yakwe mpaka lino yalamala ukuzombola ingano zyakwe.”

²² Naomi nawe pali pakunena Luti ati, “Endi, cazipa ukuti uwaya umu kusinza pamwi na aomvi yakwe Boazi ukuluta ukuya ku antu yauze, pamulandu wakuti limwi yangakucitila iciipe.”

²³ Acino Luti atasyanga akazyana yalya aomvi yakwe Boazi. Wene wasotolezyanga ingano pamwi nayo mpaka iyamala ukuzombola imbezu zyakwe baale nga ni ngano kwene. Nupya wene watwalilile ukwikala na nyinavyala.