Luti 1 - Amazwi Yakwe Leza 2013

Elimeleki na akazi kakwe yasamila ku Moabu

¹ Pa nsita imwi lino aina Izlaeli yatekwangwa na yakapingula, mu mpanga ilya mwaponyile cipowe. Acino umuntu umwi uwaku Betelemu umu mpanga yakwe Yuda, pali pamwi nu muci na ana yakwe yaili aonsi, aya mu kwikala umu mpanga ya Moabu pa nsita imwi pamwi nu muci wakwe na ana yakwe yaili aonsi.

² Umuntu wilya wali a Elimeleki, nu muci wakwe wali a Naomi, nga ana yakwe yaili aonsi yali a Maaloni na Kilyoni. Antu yaa yonsi yali amu luko lwakwe Efulata aku Betelemu, umu mpanga yakwe Yuda. Yaile ku Moabu akuno yikala. Lino yacili kuku,

³ Elimeleki afwa, nga Naomi, umuci wakwe, asyala wenga na ana yakwe yaili aonsi.

⁴ Ana yalya yatwite akazyana aina Moabu, yano amazina yao a Olipa na Luti. Pacisila ca kwikala kuku manye imyaka ikumi lyonga,

⁵ Maaloni na Kilyoni nayo kwene iyafwa, nga Naomi asyala ukwaula ana nanti iya.

Naomi na Luti yaswilila ku Betelemu

⁶ Lino papisile insita, Naomi uvwile ukuti Yawe wapolelela antu yakwe apa kuyapeela ivyakulya ivingi. Acino wene pamwi na nyinavyala iyaiteyanya ukufuma ku Moabu.

⁷ Naomi na yanyinavyala yoili iyatandika ulendo wakufuma kuno yatenzi, iyatenuka iyatola umuseo kulungama ku mpanga yakwe Yuda.

⁸ Alino Naomi anena yanyinavyala yaya yoili ati, “Swililini, cila muntu aye kumwao kuli nyina. Si Yawe amucitile ivyaluse wakwe vino mwacitila asipwa yalya nga nani kwene.

⁹ Si Yawe aleke cila wenga uwa munomuli akakwate upemwilo mu ng'anda yakwe wiyo alaya iya wakwe.” Lyene Naomi ayatonsola nu kuyapakasya. Lelo nayo iyalila wakwe cimwi

¹⁰ nga iyamunena yati, “Twakana! Swemo mpaka sile tukulondele ku antu yako.”

¹¹ Lelo Naomi avwanga ati, “Swililini kumwinu, mwe yanane. Uzye pacani cino mukasi mundondele? Uzye nupya ningavyala ana aonsi kuti yaye yaiya inu?

¹² Swililini kumwinu, mwe yanane. Nemo natinkota cakuti ntangentwalwe nupya. Lelo nanti sile ndi ningavwanga ukuti nkweti upaalilo wakukwata umwana, nanti angala natwalwa usiku nu kuvyala ana aonsi,

¹³ uzye mungalolela yasuke yakule? Uzye kwene cico icingamulesya ukutwalwa kuli yauze? Awe, citaya vivyo yanane! Yanane nemo nkunyunguluka cuze ukuluta mwemwe, pamulandu wakuti Yawe watala andetela sile amalanda!”

¹⁴ Apakuvwa vivyo iyalilisya. Lyene Olipa atonsola nyinavyala amupakasya, lelo Luti asyala akonkotile kuli nyinavyala.

¹⁵ Naomi nawe avwanga ati, “Silola muntu we! Umuci muzo wene awiyo waswilila ku antu yakwe na kuli tuleza twakwe. Swilila, mulondele.”

¹⁶ Lelo Luti aasuka ati, “Utezya uswilizye ukunena kuti inkusye wewe! Unte sile inkulondele. Konsi kuno ulaya, nani kwene indaya. Konsi kuno ulikala, nani kwene indikala. Antu yako yalaya antu yane na Leza wako alaya a Leza wane.

¹⁷ Konsi kuno ulafwila, nani kwene akuno ndafwila nu kuzikwa. Si Yawe Leza andye ndi cakuti napeela umweko ku cintu cili consi kuti cimpaatule kunuli, suka sile imfwa.”

¹⁸ Lino Naomi wamanya ukuti Luti watasolola nu mwenzo onsi ukupita na aliwe, ata ukumupamvya.

¹⁹ Acino yoili kwene iyatwalilila nu ulendo wao mpaka iyafika ku Betelemu. Lino yafisile mu Betelemu, antu amu musumba ulya yonsi iyazenzemba pamulandu na alio, nga anaci iyauzyanya yati, “Uzye icumi wi a Naomi?”

²⁰ Nawe ayanena ati, “Mutangama imuti Naomi. Lelo mwangama imuti Mala, pamulandu wakuti Leza Wamaka yonsi watalenga umi wane ukuya uwa ulanda wakwe cimwi.

²¹ Nafumile kuno ukwaula ukuulilwa cimwi, lelo Yawe watambwezya minwe mitupu. Uzye lyene pacani mukungama imuti Naomi? Yawe watandetela amacuzi. Leza Wamaka yonsi watamponyezya imipamba.”

²² Fwandi avino Naomi wawelulwike kumwao ukufuma ku mpanga ya Moabu. Wene wali na Luti, nyinavyala umwina Moabu. Yafisile ku Betelemu pa nsita ya kutandika ukuzombola baale.