Luka 7 - Amazwi Yakwe Leza 2013

Yesu wapozya muomvi wakwe musika wa mpuka ya vita umwanda onga

¹ Lino Yesu wamala kuvwanga vintu vii vyonsi ku antu akuuvwa, lyene aingila mu Kapenaumu.

² Kuku kwali musika wa mpuka ya vita umwanda onga uwakweti muomvi wino watemilwe cuze. Muomvi wii walwile pipi nu kufwa.

³ Lino musika wa vita vya Ciloma uvwile landwe lya pali Yesu, atuma aikolo ya Ayuda ku kumuuzya kuti aiize apozye muomvi wakwe.

⁴ Lyene lino iiza kuli Yesu, yamupapata cuze yati, “Muntu wii alinzile kwazwiwa naawe.

⁵ Pano watemwa antu itu nupya aliwe watukuulila ing'anda ya mapepo.”

⁶ Lyene Yesu apita nao. Lino wali pipi ni ng'anda, musika atuma yacuza yakwe ku kumunena ati, “Mwene, utaicuzya, pano nemo ntalinzile kuti wize mu ng'anda yane.

⁷ Caleka, nanti anene nemwisikulu, ntakuyelenganyizizya ukwiza kunuli. Lelo vwanga sile izwi, nu muomvi wane amapola.

⁸ Pano nani kwene, nene muntu uwalasikwa na maka ku uteko pi sika lya ntunguluzi zikulu. Nani kwene nakwata asilika yano nkaangalila. Ndi nanena wenga nati, ‘Pita!’ Nawe apita, nu ku muze inti, ‘Iza!’ Nawe aiiza, nupya ndi nanena muzya wane nati, ‘Cita cii!’ Nawe acita.”

⁹ Lino Yesu uvwa cii, azunguka cuze, aseleuka nga anena iumba lyamulondile ati, “Namunena vino ntatala nalola utailo wakwe uu, nanti mu Izlaeli kwene.”

¹⁰ Lyene nkombe zyaswililemo kukunena amu ng'anda yakwe musika nga zizana vino umuzya watapola.

Yesu Watutulula Mwana Mukamfwilwa uwaku Naini

¹¹ Zuwazuwa pacisila Yesu aya ku musumba wa Naini pamwi na alondezi yakwe ni umba likulu.

¹² Lino wapalama pa mpongolo ya musumba, akomanya iumba likulu ilya fumangamo ala yasenzile icala. Icala cii cali ca mwana umonsi wenga sile mu mwanaci uwali mukamfwilwa. Iumba likulu kufuma mu musumba nalyo lyamusukilile.

¹³ Lino Mwene wamulola, aya na mizu, nga amunena ati, “Utaalila.”

¹⁴ Lyene apalama akumya icintamba, na antu asenzile icintamba iimilila. Yesu avwanga ati, “Mulumendo, nakunena, katuka!”

¹⁵ Nu mufwe akatuka atandika nu kuvwanga. Alino Yesu amupeela kuli nyina.

¹⁶ Onsi yuvwa intete, yalumbanya Leza yati, “Kasema mukulu wataloleka pakasi kitu! Leza wataiza ku kwazwa antu yakwe!”

¹⁷ Ilandwe lya pali Yesu lisalangana mu mpanga yonsi ya Yudeya nu mu mpanga zyuze izya zingulwike.

Yoane Kawatizya watuma inkombe kuli Yesu

¹⁸ Lino alondezi yakwe Yoane yanena Yoane vintu vii vyonsi,

¹⁹ Yoane aama yaili amu alondezi yakwe. Ayatuma kuli Yesu ku kumuzya, yati, “Uzye wewe uli wino Yoane walanzile ukuti akwiza, nanti tumalolelanga muze?”

²⁰ Lino iiza kuli Yesu yamunena yati, “Yoane Kawatizya watatutuma kuti twize tukuzye ndi wewe uli wino akwiza, nanti tumalolelanga muze?”

²¹ Pa nsita kwene ilya Yesu apozya alwale aingi alwile ndwala zya misango na misango, na ali ni mipasi yankota, nga nu kuleka impafu kuti zyalola.

²² Lyene anena nkombe zyakwe Yoane ati, “Pitini, mukanene Yoane vintu vino mwati mulola nu kuuvwa. Mumunene muti mpafu zikulola, vilema vikupita, yakwe tembwe yakupoziwa, yacipuuli yakuuvwa. Afwe yakututululwa, ni Landwe Lisuma likukosolwa ku apina.

²³ Alongo ayao asikuntwisika.”

²⁴ Lyene lino nkombe zyakwe Yoane zyapita, atandika ukunena maumba vya pali Yoane, ati, “Uzye mwaile ku lwanga kukulola cani? Uzye mwaile ku kulola umuntu muzakantike wa mafwa akupungaila nu muza? Awe!

²⁵ Ndi cisi vivyo uzye mwaile kukulola cani? Uzye umuntu uwazwite insalu ziyembe? Awe! Antu akazwala wakwe vivyo ayao akazanwa mu masano.

²⁶ Lyene nenini, uzye mwaile kukulola cani? Uzye akasema? Endi, namunena mwaweni alusile kasema.

²⁷ Pano Yoane awino calembwa mu malembelo pali aliwe cati, ‘Leza wavwanzile ati, Ndatuma nkombe yane ikukolelele, kuti ikateyanye inzila yako.’

²⁸ Namunena nati, mu antu yonsi avyalwa mu nsi ii, kusi umuntu wino alusile Yoane. Lelo wino ali munono mu Wene wakwe Leza, wene ali mukulu kuluta Yoane.”

²⁹ Lyene antu yonsi na yakasonkesya kwene lino yuvwa yazumila ukuti Leza umololoke pano yawatiziwe na Yoane.

³⁰ Lelo Afaliseo na yakasambilizya ya Masunde pakukana kuwatiziwa na Yoane, yasuzile vino Leza walondanga kuyacitila.

³¹ Yesu atwalilila kulanda ati, “Uzye ningakolanya antu amu mukulo uu kuli cani? Uzye yakolana na cani?

³² Yakolana na ana atenzi mwi sokoni, ala yakulaizya yakuti, ‘Twamulizizye ving'weng'we vya pa winga, lelo mutacinyile! Twalaezile ni mpoma zya ndosya, lelo mutalosizye!’

³³ Pano Yoane Kawatizya wizile, aizilizya ukulya nu kumwa waini, namwe muti, ‘Wakwata mupasi wankota munoli’

³⁴ Mwana wa Muntu wiza, akalya nu kumwa, namwe mukuti, ‘Lolini umuntu wii! Wene wapunuka nupya umukolesi. Wene acuza wakwe yakasonkesya na yakaifya.’

³⁵ Lelo antu yalalola ukuti amano yakwe Leza alungame ndi yalola milimo yakweyo.”

Yesu yamupongolwela mafuta

³⁶ Umwi wenga uwamu Afaliseo amwama kuti aingile mu ng'anda yakwe yakalye pamwi nawe. Lyene Yesu aingila mu ng'anda ya Mufaliseo aikala pa cakulya.

³⁷ Lolini mu musumba ulya mwali umwanaci uwali cizelele. Uvwile vino Yesu akulya mu ng'anda ya Mufaliseo. Caleka aleta musazi wa mafuta amununko usuma,

³⁸ aimilila kwi tundu ku mbali ya ngazo zyakwe Yesu, ala akulila, akuponyezya minsozi pa tuntunta twa ngazo zyakwe Yesu. Lyene akumbula ingazo zyakwe Yesu ni nyele zyakwe, azitonsola nga azipongolwela amafuta acinunu cisuma.

³⁹ Lino Mufaliseo uwamwamile walola cii, aivwanzya umwisikulu ati, “Ndu muntu wii akasema, wange amanye umwanaci wii akumukumya. Wange amanye nu musango wa umi wa ukakasi uno waya nao, pano wene wali a cizelele.”

⁴⁰ Yesu amunena ati, “Simoni, nkweti cimwi icakukunena.” Nawe amwaasuka ati, “Kasambilizya, nena tuvwe.”

⁴¹ Alino Yesu ati, “Kwali antu yaili yano akongwile impiya kuli kakongwisya, umwi madenali imyanda isano, nu muze makumi yasano.

⁴² Lino yaposiwa kumulipa ayelela. Uzye aweni pali yaa angamutemwa kuluta?”

⁴³ Simoni aasuka ati, “Nkwelenganya angaya awilya uwakweti nkongole izingi.” Yesu amunena ati, “Wavwanga ningo.”

⁴⁴ Lyene aseleukila ku mwanaci nga anena Simoni ati, “Uzye walola umwanaci wii? Kufuma lino ningile mu ng'anda yako utampile manzi akufulala ku ngazo. Lelo wene wafula ingazo zyane na minsozi yakwe nu kuzikumbula ni nyele zyakwe.

⁴⁵ Wemo utatala wa ntonsola, lelo wene atatazile ate kutonsola ingazo zyane kufuma pano nizile.

⁴⁶ Wemo utatala wapongolwela amafuta pa mutwe wane. Lelo wene watapongolwela amafuta acinunu cisuma pa ngazo zyane.

⁴⁷ Caleka nakunena vino kutemwa kuno wene wantemwisya kukulanga vino Leza wamwelela maifyo yakwe aingi. Lelo wino wensi uwelelwa maifyo yanono, akatemwa panono.”

⁴⁸ Lyene Yesu anena umwanaci ati, “Maifyo yako yelelwa.”

⁴⁹ Lyene yano atenzi pa vilimba pa kulya yatandika kuuzyanya aisikulu yati, “Uzye aweni wii, wino akaelela maifyo?”

⁵⁰ Lelo Yesu anena umwanaci ati, “Utailo wako wakutuula. Pita ulumi.”