Luka 3 - Amazwi Yakwe Leza 2013

Kukosola kwakwe Yoane Kawatizya

¹ Cali mu mwaka uwalenga ikumi na isano ala Kesa Tibelyasi umwene waku Loma, lino Pontio Pilato nawe wali umulasi wa mpanga ya Yudeya. Helodi wali kateeka wa mpanga ya Galile. Na Filipi mwina wakwe wali kateeka wa mpanga ya Itulia na Tulankoniti. Lisaniya nawe wali kateeka wa mpanga ya Abilene,

² na Anasi na Kayafa yali yasimapepo akulu. Pa nsita ilya Ilandwe lyakwe Leza lizile kuli Yoane mwana wakwe Zakaliya mu lwanga.

³ Caleka Yoane wapitananga mu mpanga yonsi yamu nkumba ya luzi lwa Yodani, ala akukosola akuti, “Zenzukini nu kuwatiziwa, pakuti Leza amwelele maifyo inu.”

⁴ Ndi vino calembwa mu lupapulo lwakwe kasema Ezaya cati, “Umwi akulaizya mu lwanga ati, ‘Zifini museo mwakupita Mwene, olololini inzila mwakupita aliwe.

⁵ Vifoloma vyonsi vilazikwa, ni milundu ni myamba vilapasiwa, ni miseo iyongane ilolololwa, inzila zya tulundu tulundu zilalinganyiwa.

⁶ Na antu yonsi yalalola ufyusi wakwe Leza.’”

⁷ Maumba ya antu izile kuli Yoane ku kuwatiziwa nawe. Nga wayanenyile ati, “Mwe ana ya nzoka mwe! Uzye aweni uwamucelula kuti muutuke ukali wakwe Leza uno ukwiza?

⁸ Mwaomba imilimo isuma yakulanga vino mwati muzenzuka. Nupya mutainena mu myenzo inu ukuti Abulaamu ali cikolwe cinu! Nkumunena vino Leza angasenula amawe yaa ukuya ana yakwe Abulaamu.

⁹ Na ndakai kwene impasa iteyanyiziwe ku kusinda imiti pa visinte. Umuti onsi uno usiseeka vizao visuma ulakomwa nu kusumbwa mu moto.”

¹⁰ Antu yamuzya yati, “Uzye lyene tucite uli?”

¹¹ Nawe ayanena ati, “Wino wensi ali na malaya yaili, alinzile apeleko wino atakweti. Na wino wensi ali ni cakulya, alinzile ankanye auze.”

¹² Yakasonkesya nao kwene iiza ku kuwatiziwa. Lyene yamuzya yati, “Kasambilizya, uzye naswe tumacita uli?”

¹³ Nawe ayanena ati, “Mutasonkesya impiya kuluta pali vino yamunena.”

¹⁴ Asilika nao kwene yamuzya yati, “Nga swemo? Uzye tumacita uli?” Nawe ayanena ati, “Mutapokolola impiya ku muntu umwi mu ucenjezi nanti kulongwela umwi vyaufi. Zangini pa malipilo inu.”

¹⁵ Antu yapaalilanga nu mwenzo onsi vintu vilacitika, nga yatwisika ndi nalimwi Yoane angaya ali Katuula uwalavilwe.

¹⁶ Caleka Yoane anena yonsi ati, “Wino akwiza pacisila cane wene uwa maka kunduta. Ntaine kwinama nu kusapula mikonda ya ndyatu zyakwe. Nemo nkumuwatizya na manzi, lelo wene alamuwatizya na Mupasi Wamuzilo nu moto.

¹⁷ Wene akweti ulupe ulwakwelela, kuti aele ingano zyonsi, azikolonganike nu kuzisezya mu nkoma yakwe. Lelo mapumbu alayoca mu moto usyazimiwa.”

¹⁸ Lyene Yoane wakosolanga Ilandwe Lisuma ku antu, ala akuyacinkula mu vintu navyuze ivingi kuti yazenzuke.

¹⁹ Lelo Yoane wakalipile mulasi Helodi, pamulandu wakutwala Helodia, muci wa mwina, nga na pa vintu navyuze ivingi viipe vino wacisile.

²⁰ Helodi acita cintu cuze cipisye pakuyalila Yoane mu ng'anda yaminyololo.

Kuwatiziwa kwakwe Yesu

²¹ Pacisila lino antu yawatiziwa, Yesu nawe awatiziwa. Lyene walanga akupepa, iyulu lilekuka,

²² na Mupasi Wamuzilo aikila panoli mu musango wa nkunda. Ni zwi lifuma mwiyulu liti, “Wewe Mwanane mukundwe, munuli nkuzanga cuze.”

Vikolwe vyakwe Yesu

²³ Yesu wali ni myaka makumi yatatu lino watandike kuomba incito yakwe. Antu yelenginye ukuti wene umwana umonsi wakwe Yosefu, wino wali mwana wakwe Heli,

²⁴ nawe Heli wali mwana wakwe Matati, mwana wakwe Levi, mwana wakwe Meleci, mwana wakwe Yanai, mwana wakwe Yosefu,

²⁵ mwana wakwe Matatiyasi, mwana wakwe Amosi, mwana wakwe Naumi, mwana wakwe Esili, mwana wakwe Nagayi,

²⁶ mwana wakwe Maati, mwana wakwe Matatiyasi, mwana wakwe Semeini, mwana wakwe Yoseci, mwana wakwe Yoda,

²⁷ mwana wakwe Yoanani, mwana wakwe Lesya, mwana wakwe Zelubabeli, mwana wakwe Salatieli, mwana wakwe Neli,

²⁸ mwana wakwe Meleci, mwana wakwe Adi, mwana wakwe Kosamu, mwana wakwe Elimadamu, mwana wakwe Eli,

²⁹ mwana wakwe Yoswa, mwana wakwe Elieza, mwana wakwe Yolimu, mwana wakwe Matati, mwana wakwe Levi,

³⁰ mwana wakwe Simeoni, mwana wakwe Yuda, mwana wakwe Yosefu, mwana wakwe Yonamu, mwana wakwe Eliyakimu,

³¹ mwana wakwe Meleya, mwana wakwe Mena, mwana wakwe Matata, mwana wakwe Natani, mwana wakwe Davidi,

³² mwana wakwe Yese, mwana wakwe Obedi, mwana wakwe Boazi, mwana wakwe Salimoni, mwana wakwe Nasoni,

³³ mwana wakwe Aminadabu, mwana wakwe Adimini, mwana wakwe Alini, mwana wakwe Yeziloni, mwana wakwe Pelezi, mwana wakwe Yuda,

³⁴ mwana wakwe Yakobo, mwana wakwe Isaki, mwana wakwe Abulaamu, mwana wakwe Tela, mwana wakwe Nawoli,

³⁵ mwana wakwe Selagi, mwana wakwe Lewu, mwana wakwe Pelegi, mwana wakwe Ebali, mwana wakwe Syela,

³⁶ mwana wakwe Kainani, mwana wakwe Afakasidi, mwana wakwe Syemu, mwana wakwe Nowa, mwana wakwe Lameki,

³⁷ mwana wakwe Metusela, mwana wakwe Enoki, mwana wakwe Yaledi, mwana wakwe Malaleli, mwana wakwe Kenani,

³⁸ mwana wakwe Enosi, mwana wakwe Seti, mwana wakwe Adamu, mwana wakwe Leza.