Luka 21 - Amazwi Yakwe Leza 2013

Uwila wakwe mukamfwilwa

¹ Lyene lino Yesu wasanzula manso, alola akama yakuta mawila yao mu cipao ca mawila mu Ng'anda ikulu yakwe Leza.

² Alino alola mukamfwilwa mupina akusumbilamo tumakowili twiili.

³ Nawe avwanga ati, “Cumi namunena vino mukamfwilwa wii, mupina, wata uwila mu cipao kuluta onsi.

⁴ Pano yonsi yati yapela mawila pakuvulilwa kwao. Lelo wene mu upina wakwe, watapela vyonsi vino wali navyo, ivyange vimwazwe mu umi wakwe.”

Yesu wasowela komoolwa kwa Ng'anda Ikulu yakwe Leza

⁵ Yamwi yavwanzyanyanga pamulandu wa Ng'anda ikulu yakwe Leza, vino yaemviwe na mawe ayembe nga ni vya wila vino antu yaletanga kuli Leza. Yesu avwanga ati,

⁶ “Kasita kaliza kakwe vii vyonsi vino mukulola lino kutalaya iwe nanti lyonga ililasyala pi we lyuze. Yonsi kwene yalomoolwa.”

Yesu walanda pa macuzi nu kuzunyiwa

⁷ Alino yuzya Yesu yati, “Kasambilizya, uzye cintu cii cilacitika lilaci? Nupya icani cilaya cilangililo cakulanga ukuti cintu cii cili pipi nu kucitika?”

⁸ Yesu ayanena ati, “Cenjelini, mutaponziwa, pano antu aingi yalizila mwi zina lyane nu kuti, ‘Nene ndi Katuula uwalavilwe.’ Nga nu kuti ‘Insita yatifika!’ Lelo mutakayalondele.

⁹ Lino muluvwa nkondo nga ni mpanzela, mutakasakamale. Vintu vii vilinzile kucitika nkolelo, lelo italaya ili mpelelekezyo.”

¹⁰ Nupya ayanena ati, “Inko zilakatukilana, na mawene yalakatukilana.

¹¹ Kulaya vilundumusi vikulu, vipowe, nga ni mpungo konsi konsi. Kulaya vintu vyakoofya nga ni vilangililo kufuma kwiyulu.

¹² Lelo lino vintu vii vyonsi vitali vicitike, yalamulema nu kumuzunya. Yalamupeela ku ntunguluzi zyamu mang'anda ya mapepo nu kumuyalila mu mang'anda yaminyololo. Yalamuleta nkolelo yakwe yakateeka ni ntunguluzi pamulandu wane.

¹³ Ii, ilaya insita isuma yakuti muye yakambone yane.

¹⁴ Caleka manyini ukuti lino nsita itali ifike mutakalanguluke pali vino mulavwanga,

¹⁵ pano ndamupeela mazwi nga na mano kuti patakaye nanti wenga uwamu anisi inu alakana nanti kupilika vino mulavwanga.

¹⁶ Akwasi inu, aina inu, akazi kinu na yacuza inu kwene, yalamukoopa, nga nu kukoma yamwi munomuli.

¹⁷ Onsi yalamupata pamulandu wane.

¹⁸ Lelo mutakasakamikwe nanti panono.

¹⁹ Mukuposya kwinu, mulaya nu umi.

Yesu wasowela kononwa kwakwe Yelusalemu

²⁰ “Lino mulalola musumba wa Yelusalemu waliziwa ni vita, lyene mukamanye vino uli pipi nu kononwa.

²¹ Lyene onsi ali mu Yudeya yakuutukile ku myamba. Na yao ali mu musumba yakafumemo. Na yao ali mu mpanga yatakaswilile mu musumba.

²² Pano yao yalaya manda ya cilanduzi, pakuti vyonsi ivyalembwa mu malembelo vifikiliziwe.

²³ Kalanda ku anaci alasenda indilwa na yano alaonsya mu manda yalya! Pano ucuzi ukulu cuze ulaponela mpanga ii, alino nu ukali wakwe Leza ulaponela antu yaa.

²⁴ Yamwi yalakomwa ku mpaanga nu kusendwa mu uzya ku nko zyonsi, nga na Yelusalemu alalyatolwa na antu atataila Leza kufika lino kasita kao kalasila.

Ukwiza kwa Mwana wa Muntu

²⁵ “Kulaya vilangililo vyakuzunguka pi lanzi, mwezi, ni ntanda. Muno nsi, antu amu nko zyonsi yaloofiwa nu kupelelwa pamulandu wakukatuka kwa maimbi nga nu kululuma kwakwe yemba.

²⁶ Antu yalafwa mutombo pamulandu wa ntete lino yakulolela vintu vino vilaponela insi yonsi, pano maka amu lwelele yalatenta.

²⁷ Alino Mwana wa Muntu alaloleka, akwiza mwi kumbi na maka akulu nu lulumbi.

²⁸ Lino vintu vii vilatandika kucitika, mukimilile nu kwinula imitwe inu, pano kutuulwa kwinu kwati kupalama.”

Isambililo lya pa musamvu

²⁹ Lyene Yesu ayumila mulumbe uu ati, “Lolini musamvu nga ni miti yuze yonsi.

³⁰ Lino mwalola amafwa yalemba, mweisikulu mukamanya vino cisiku capalama.

³¹ Mu musango uli onga, lino mulalola vintu vii vikucitika, mulamanya vino Uwene wakwe Leza uli pipi nu kwiza.

³² “Cumi, namunena vino, vintu vii vyonsi vilacitika lino antu amu mukulo uu onsi yatali yafwe.

³³ Iyulu ni nsi vitalikalilila manda pe, lelo mazwi yane yene yalikalilila manda pe.

Cenjelini mwaiteyanya

³⁴ “Cenjelini pakuti imyenzo inu italaukilwa mu kupunuka, mu ukolesi na masakamiko amu umi uu, pano limwi uwanda uwa ungamupumikizya wa citeyo.

³⁵ Pano uwanda ulya ukoline wa citeyo nupya ulapumikizya antu yonsi pano nsi.

³⁶ Acino pempulini nu kupepa nsita zyonsi pakuti muye na maka a kuutuka ku vintu vyonsi iviliza vicitike, nga nu kwimilila pa manso ya Mwana wa Muntu.”

³⁷ Manda onsi Yesu wasambilizyanga mu Ng'anda ikulu yakwe Leza. Amanguzi lyonsi wayanga ku Mwamba wa Olivi akuno aikala.

³⁸ Lyene pa macaca, antu izanga ku Ng'anda ikulu yakwe Leza ku kumuvwa.