Luka 2 - Amazwi Yakwe Leza 2013

Kuvyalwa kwakwe Yesu

¹ Mu manda yalya Agusto kateeka uwaku Loma wapile ilamulo ilyakuti antu yonsi yapendwe.

² Lino kupendwa kwa kutandika kwacitike yali nsita ino Kulenio wali mulasi waku Silya.

³ Lyene, umuntu wensi, waile ku kulembisya, cila muntu ku muzi wakwe.

⁴ Yosefu nawe wafumile ku musumba wa Nazaleti mu Galile nu kuya ku Betelemu musumba uwamu Yudeya mu musumba wakwe Davidi. Cino Yosefu wailileko pano wali uwamu mupanda nu uwamu luko lwakwe Davidi.

⁵ Waile ku kulembisya pali pamwi na Maliya muci wakwe, wino wali ni ndilwa.

⁶ Lino yali mu Betelemu, nsita yafisile yakuti alele.

⁷ Wavile umwana umonsi iyeli, amufupa mu nsalu nga amulalika mu mulangu pano mutali ncende mu ng'anda ya enyi.

Yakacema na angeli

⁸ Mu mpanga ilya kwali yakacema acitanga uluti lwakulolela viteekwa vyao ku nyika usiku.

⁹ Lilyo kwene mungeli aloleka kunoyali, nu lulumbi lwa Mwene luyengesa panoyali, nao yuvwa intete cuze.

¹⁰ Lelo mungeli ayanena ati, “Mutoopa, pano namuletela Ilandwe Lisuma, lino limaleta uluzango ulukulu ku antu onsi.

¹¹ Ilelo kwene mu musumba wakwe Davidi watavyalwa kunomuli Katuula, wino ali a Klistu Mwene.

¹² Na cii cimaya cilangililo kunomuli. Mumaya mukazane mwana akanya kafufilwe mu nsalu nupya kalalikwe mu mulangu.”

¹³ Lilyo kwene kuloleka mungeli ni iumba lyuze likulu lya angeli ya mwiyulu, yalumbanya Leza yati,

¹⁴ “Ululumbi kuli Leza mwiyulu papelapela, nu mutende pali yano Leza akuzangilamo.”

¹⁵ Walanga lino angeli yaswilila kwiyulu, yakacema yavwanzyanya aine onga yati, “Tuini ku Betelemu tukalole cintu cii cati cicitika, cino Mwene watatumanyisya.”

¹⁶ Lyene yacincila yapita yaya yazana Maliya na Yosefu ala alalike mwana kanya mu mulangu.

¹⁷ Lino yakacema yamulola yalondolola na vino mungeli wayanenyile pamulandu wa mwana.

¹⁸ Na yonsi acuvwile yazunguka pali vino yakacema yalanzile.

¹⁹ Maliya wasunzile vintu vii vyonsi mu mwenzo wakwe nu kuvyelenganyapo.

²⁰ Yakacema nao yaswilila, ala yakutaizya nu kulumbanya Leza pali vyonsi vino yalanga yati yuvwa nu kulola. Cali ndi vino mungeli wayanenyile.

Yesu wasilamulwa nga yamutwala ku Ng'anda Ikulu yakwe Leza

²¹ Pa wanda uwalenga cinani, lino nsita yafisile iyakuti mwana asilamulwe, yamutemela izina lyakuti Yesu, izina lino mungeli wamutemile ala nyina atali asende indilwa.

²² Lino nsita yafisile iyakuti Yosefu na Maliya yacite lutambi lwa kusangululwa kulingana ni vyalembwa mu mpapulo zyakwe Mose, yatwazile umwana ku Yelusalemu ku kumupeela ku Mwene.

²³ Ndi vino calembwa mu Masunde ya Mwene cati, “Umwana wensi iyeli umonsi wene ali nu kupelwa ku Mwene.”

²⁴ Nupya yaile nu kupeela impolelwa ya nkunda ziili nanti ivipeele viili, wakwe vino calembwa mu Masunde ya Mwene.

²⁵ Ku Yelusalemu kwali umuntu wi zina lyakwe Simeoni. Wiyo wali umololoke nupya wayelanga Leza. Wene walolelanga insita ino Leza angatuula aina Izlaeli, nu Mupasi Wamuzilo wali panoli.

²⁶ Mupasi Wamuzilo wasokolwile kunoli ukuti wene atalafwa lino atatala walola Katuula wino Leza walavile.

²⁷ Lyene Simeoni atungululwa nu Mupasi Wamuzilo kuya ingila mu Ng'anda ikulu yakwe Leza. Lino akwasi yatwazile umwana Yesu mu Ng'anda ikulu yakwe Leza kuti yamucitile lutambi luiine na Masunde yakwe Mose,

²⁸ Simeoni apokelela umwana mu makasa yakwe nu kulumbanya Leza ati,

²⁹ “Mwene, ndakai, leka muomvi wako apite umutende, pano watusunga ulayo wako.

³⁰ Nindola na manso yane ufyusi wako,

³¹ nga na antu amu nko zya kutali nao kwene yalalola cii.

³² Ufyusi wako ukoline wa luswepo ku Akulukuwa luno lulaleta ululumbi ku antu yako aina Izlaeli.”

³³ Isi na nyina wa mwana yazunguka pa vintu vino Simeoni walanda pa mwana.

³⁴ Lyene Simeoni ayapolelela anena Maliya nyina wa mwana ati, “Lola umwana wii waikwa na Leza kuti aye cakuponya nu kukatusya aingi mu Izlaeli, nupya kuti aye wa cilangililo kufuma kuli Leza cino aingi yalakana.

³⁵ Caleka alasokolola amelenganyo yao ankama. Alino ulanda uno ukoline wa lupanga lukali, ulakucisa mu mwenzo.”

³⁶ Kwali kasema umwi umwanaci wi zina lyakwe Ana, mwana Faniweli uwamu luko lwakwe Aseli. Wene wali mukoloci cuze, nupya watenzi niya imyaka cinimbali kufuma ku kutwalwa kwakwe.

³⁷ Wene wali a mukamfwilwa uwa myaka makumi cinani na ini. Atatazile ataawe kuya ku Ng'anda ikulu yakwe Leza nupya watemilwe kutumikila Leza, nupya lili lingi pa kupepa Leza wapitanga kwaula kulya musanya nu usiku.

³⁸ Pa nsita kwene lino akwasi yatwazile umwana Yesu mu Ng'anda ikulu yakwe Leza, Ana nawe aiiza ku kupeela intaizyo kuli Leza. Alino alanda pamulandu wa mwana kuli yano yonsi alolelanga kuti Leza akulule amu Yelusalemu.

Kuswilila ku Nazaleti

³⁹ Lino Yosefu na Maliya yamazile vyonsi kulingana na Masunde ya Mwene, yene yaswilile kumwao ku musumba wa Nazaleti mu Galile.

⁴⁰ Mwana akula, akomeleka aya na mano, nga Leza nawe amupolelela.

Yesu wasyala atenzi na yakasambilizya

⁴¹ Cila mwaka akwasi yakwe Yesu yayanga ku Yelusalemu ku kuzevya Cimulo ca Ucilo.

⁴² Lino Yesu wali ni myaka ikumi na iili, yaile ku Cimulo ca Ucilo mwaelile mwata wao.

⁴³ Walanga lino kuzevya kwasila, lyene yaswilila kumwao, lelo Yesu wene asyala mu Yelusalemu. Akwasi yakwe yatamanyile cii.

⁴⁴ Yelenginye vino ali mwi umba. Caleka yapisile uwanda upuma nga yatandika kumulonda mu akazi kao na muli yacuza yao.

⁴⁵ Lelo yatamuweni. Caleka yaswililamo ku Yelusalemu ku kumulonda.

⁴⁶ Pa wanda uwalenga yatatu alino yamuzana mu Ng'anda ikulu yakwe Leza, ala atenzi na yakasambilizya, akuuvwa nu kuuzya mauzyo.

⁴⁷ Onsi amuvwile yazunguka pa kwaasuka kwakwe kwa mano.

⁴⁸ Akwasi yakwe lino yamulola yazunguka cuze, lyene nyina avwanga kunoli ati, “Mwana we, uzye pacani cino wacitila icintu ci kunotuli? Lola so nani twali asakamikwe cuze lino twakulondanga.”

⁴⁹ Nawe ayauzya ati, “Uzye pacani mwali mukundonda? Uzye mutamanyile vino ndinzile kuzanwa mu Ng'anda yakwe Tata?”

⁵⁰ Lelo yatamanyile uwasuko wakwe vino ukusenula.

⁵¹ Caleka Yesu apita nao ku Nazaleti, kuko kuno lyonsi wali uwakutontela akwasi yakwe. Nyina wasunzile vintu vii vyonsi mu mwenzo wakwe.

⁵² Yesu wakulanga ku mwili nu mu mano, ala akutemwikwa na Leza nga na antu.