Luka 19 - Amazwi Yakwe Leza 2013

Yesu na Zakeyo

¹ Yesu aingila mu Yeliko lelo ala ali mu kupuzya.

² Lyene kwiza umwi, izina lyakwe a Zakeyo, uwali umukalamba wakwe yakasonkesya. Nupya wali umukama.

³ Walondanga ukulola vino Yesu akaloleka. Lelo aposiwa pamulandu wakuti wali umwipi, nupya iumba lyamucinzile.

⁴ Caleka asimula aya ku nkolelo, akwela ku musamvu lwa pano Yesu wali nu kwiza pita, pakuti amulole.

⁵ Lyene lino Yesu wiza penepo alingamila, amunena ati, “Zakeyo, kalauka ika, pano ilelo kwene ndinzile mfikile ku ng'anda yako.”

⁶ Zakeyo nawe aika zuwazuwa nu kupokelela Yesu nu luzango lukulu cuze.

⁷ Lyene antu yonsi lino yalola cii, yailizyanya yati, “Umuntu wii wataya kukufikila kwakwe kaifya.”

⁸ Zakeyo nawe aimilila anena Mwene ati, “Mwene, uvwa! Ndapela citika wa vyuma vyane ku apina. Nupya ndi natala nacenjezya umwi cili consi, ndamuwezezya maila yani kulingana ni cintu cico.”

⁹ Yesu nawe amunena ati, “Ilelo wemo pamwi na amu ng'anda yako mwati mutuulwa, pano na wii kwene uwamu luko lwakwe Abulaamu.”

¹⁰ “Mwana wa Muntu wizile kuti alonde nu kutuula aponge.”

Mulumbe wa mpiya

¹¹ Walanga lino antu yacili uvwa pali vii, Yesu atwalilila kulanda, ayumila mulumbe. Yesu wali pipi cuze na Yelusalemu, nupya antu yelenginye vino Uwene wakwe Leza wali pipi nu kuloleka.

¹² Caleka ayanena ati, “Kwali umuntu umwi uwaku wene, uwayanga ku mpanga ya kutali kuti yakamusonte ukuya mwene, nga pacisila akaweluluke.

¹³ Lyene aama aomvi yakwe ikumi, apeela cila wenga lupiya longa, ayanena ati, ‘Kaziomvini mu kuculuzya kufika lino ndawela.’

¹⁴ Lelo, aikazi ya mpanga ino walimo yamupasile. Caleka yatuma inkombe pacisila cakwe kuti zikalande ziti, ‘Tusikulonda umuntu wii, kuti aye mwene witu.’

¹⁵ “Walanga lino wawela, pacisila cakupeelwa uwene, apeela ilamulo kuti aomvi yakwe yano wapile impiya iize kunoli, pakuti amanye vino yasyala yalonka kupitila mu uculuzi.

¹⁶ Uwankolelo aiiza ati, ‘Mwene, nati nzanilapo impiya ikumi pali luno wampile.’

¹⁷ Mwene wakwe amunena ati, ‘Waomba ningo, we muomvi musuma! Pano wali uwakutailwa mu vintu vinono. Namakucita kangalila wa misumba ikumi.’

¹⁸ Wakwe ciili aiiza ati, ‘Mwene, nati nzanilapo impiya zisano pali luno wampile.’

¹⁹ Mwene wakwe amunena ati, ‘Umaya kangalila wa misumba isano.’

²⁰ Muomvi muze nawe kwene aiiza ati, ‘Mwene, lupiya lwako luno wampile aulu. Nalunyefile mu citambala.

²¹ Noofile, pano wewe mutale. Ukatola cino utika nupya ukazombola pano utakomile.’

²² Mwene wakwe amunena ati, ‘We muomvi mwipe! Namakupingula pa mazwi yako! Wamanya vino nene muntu mutale, nkatola cino ntika nupya nkazombola pano ntakomile.

²³ Uzye, lyene icani cino utaile uwika lupiya lwane ku banki? Lyene nani pakuwela nange ndutole pamwi nu muzano.’

²⁴ Lyene anena yano aimi pipi ati, ‘Mupokini lupiya mupele muomvi wino ali ni mpiya ikumi.’

²⁵ Lelo nao yamunena yati, ‘Mwene, wi wene akweti impiya ikumi!’

²⁶ Nawe ayanena ati, ‘Wensi akweti cimwi wene alapeelwa navyuze; lelo wino atakweti cimwi, nawe alapokwa na cino akwelenganya kuti akweti.

²⁷ Lelo anisi yane yano atalondanga kuti inje mwene wao yaletini kuno nu kuyakoma pa manso yane.’”

Yesu wingila nu ucindami mu Yelusalemu

²⁸ Lyene lino wavwanga vii, akolelela alondezi yakwe ku Yelusalemu.

²⁹ Lino wafisile pipi na Betifage na Betaniya pa Mwamba wa Olivi, atuma alondezi yaili nkolelo ayanena ati,

³⁰ “Yangini ku muzi ulya uuli inkolelo inu. Lyene lino mwafika kuku, mumaya mukazane mwana punda anyefilwe, wino umuntu atatala wakwelapo. Mumusapule mumulete kuno.

³¹ Muntu umwi ndi wamuzya wati, ‘Uzye pacani mukumusapwila?’ Mumunene muti, ‘Mwene akumulonda.’”

³² Caleka yapita, yazana vintu vyonsi ndi vino Yesu wayanenyile.

³³ Lino yasapulanga mwana punda, aineco yayauzya yati, “Uzye pacani mukusapwila mwana punda?”

³⁴ Nao yaasuka yati, “Mwene akumulonda.”

³⁵ Lyene yamusenda kuli Yesu, yaanzapo ni insalu zyao pali mwana punda, nga yakwezya Yesu penepo.

³⁶ Lyene lino akupita, antu yaanza insalu zyao mu museo kuti yalange mucinzi kunoli.

³⁷ Lino wapalama ku Yelusalemu, pipi na pa mutantamuko wa Mwamba wa Olivi, iumba likulu lya alondezi lyonsi litandika kutaizya nu kulumbanya Leza na mazwi akulu pa vizungusyo vyonsi vino yaweni,

³⁸ ala likuti, “Walongo a kateeka akwiza mwi zina lya Mwene! Mutende uye mwiyulu, nu lulumbi kuli Leza mwiyulu papelapela!”

³⁹ Lyene yamwi Afaliseo ali mwi umba yanena Yesu yati, “Kasambilizya, kalipila alondezi yako kuti yate kucita cii.”

⁴⁰ Yesu ayanena ati, “Namunena vino ndi yaa yamyalala, ale amawe kwene yaa yamapundanga.”

Yesu walilila Yelusalemu

⁴¹ Lyene lino wapalama ku musumba, aulolekesya, nga aulilila,

⁴² ati, “Owee! Ndi wamanyile ilelo ivikaleta umutende! Lelo vyene vyafiswa kunuli.

⁴³ Manda yaliza lino anisi yalakwizila nu kukukulilila ilinga. Yalakuzinguluka nu kukuyalila konsi.

⁴⁴ Yalakuwisya pansi nu konona antu yano aikala mwenemo. Nupya yatalasya iwe pa lyuze, pano utilwike kasita kakwiza kwakwe Leza kuti akutuule.”

Yesu wazinga aculuzi mu Ng'anda Ikulu yakwe Leza

⁴⁵ Lyene Yesu aingila mu Ng'anda ikulu yakwe Leza atandika ukuzinga aculuzi,

⁴⁶ ayanena ati, “Calembwa mu malembelo cati, ‘Ing'anda yane ilaamwa ing'anda ya mapepo.’ Lelo mwemo mwaicita ininga ya iivi.”

⁴⁷ Manda onsi Yesu wasambilizyanga mu Ng'anda ikulu yakwe Leza. Yasimapepo akalamba, yakasambilizya ya Masunde, ni ntunguluzi zya antu amu Yudeya, yalondanga ukumukoma.

⁴⁸ Lelo yatazanyile nzila yakucita cii, pamulandu wakuti insita zyonsi wikalanga na antu ala yakuuvwa kunoli.