Luka 17 - Amazwi Yakwe Leza 2013

Kwifya nu kwelela

¹ Yesu anena alondezi yakwe ati, “Ivintu vikalenga antu kuponela mu maifyo vilinzile kucitika, lelo kalanda ku muntu wino akulenga kuti vicitike.

² Cazipila umuntu wiyo kumunyepelela iwe lyakusiila likulu mu nsingo nu kumusumbila muli yemba, kuluta kuti aleke wenga uwamu ana anono kwifya.

³ Caleka cenjelini. “Munyonko ndi wifya, mukalipile. Ndi wazenzuka, mwelele.

⁴ Ndi wakwifya maila cinimbali mu wanda onga, nga nu kuwela kunuli maila cinimbali, ala akuti, ‘Nazenzuka,’ ulinzile kumwelela.”

Utailo

⁵ Atumwa yanena Mwene yati, “Tukuzizye utailo.”

⁶ Mwene nawe ayanena ati, “Ndi mukweti utailo ukulu wa lumbezu lwakwe musunta, munganena umusamvu uu, muti, ‘Itukule wemwisikulu kumwi ni misisi, ukaileme muli yemba,’ nao ungamuyela.”

Umulimo wa muomvi

⁷ “Umwi uwa munomuli ndi wali nu muomvi wino uwalimanga nanti ukucema imfwele, lino wawela ku vyalo, uzye angamunena ati, iza zuwa ndulye, lino wene atali alye?

⁸ Uzye mucifulo cakwe cii, atangamunena ati, ‘Teyanya mulalilo, nga pacisila uiteyanye nu kuntumikila, kufika lino namala ukulya nu kumwa. Lyene pacisila nawe umalya nu kumwa.’

⁹ Wene angataizya muomvi pamulandu wakuyela ilamulo?

¹⁰ Icili conga namwe; lino mwati mucita vyonsi vino mwati munenwa kucita, mulande muti, ‘Sweswe aomvi sile nupya twati tucita vino tulinzile kucita.’”

Yesu wapozya antu ikumi alwile tembwe

¹¹ Lino Yesu wali pa lwendo ala akuya ku Yelusalemu, waile apita mu mupaka wakwe Samaliya na Galile.

¹² Lino akwingila mu muzi, antu ikumi alwile tembwe yamukomanya. Lyene iimilila katalamukila,

¹³ yasanzika mazwi yao yati, “Yesu! Mwene! Ya na mizu kunotuli.”

¹⁴ Lino Yesu wayalola ayanena ati, “Yangini mukailange mweisikulu kuli yasimapepo.” Lino yacili yakupita, yapoziwa.

¹⁵ Lyene wenga uwa munoyali lino walola vino wapoziwa, aswililamo, ala akulumbanya Leza ni izwi likulu.

¹⁶ Lyene afukama pansi nkolelo yakwe Yesu, amutaizya. Muntu wii, wali u Musamaliya.

¹⁷ Yesu auzya ati, “Uzye antu ikumi yonsi yatali yapoziwa? Uzye yauze fundimbali yene yali kwi?

¹⁸ Uzye icani cino yene yatawezile nu kwiza taizya Leza suka sile mwinamasi wii?”

¹⁹ Nupya Yesu amunena ati, “Katuka pitanga, utailo wako wakupozya.”

Vino Uwene wakwe Leza uliza

²⁰ Afaliseo yuzya Yesu yati, “Uzye insita ci lino Uwene wakwe Leza uliza?” Nawe ayaasuka ati, “Uwene wakwe Leza usyaiza nu kulolwa.

²¹ Nupya antu yatalati, ‘Lolini, auu kuno!’ Nanti, ‘Lolini, auwa kuku!’ Pano Uwene wakwe Leza uli pakasi kinu.”

²² Lyene anena alondezi yakwe ati, “Insita ikwiza lino mulalondesya kulola uwanda wa Mwana wa Muntu, lelo mutalaulola.

²³ Yamwi yalamunena yati, ‘Lolini, awilya kuku!’ Nanti, ‘Auwi, kuno!’ Lelo mutakasimwilileko nu kuyalola.

²⁴ Pano vino inkuwa ikamyansya ukucilinganya ulwelele, kufuma imbali yuze kufika nu ku yuze, avino cilaya na pa wanda wa kwiza kwa Mwana wa Muntu.

²⁵ Lelo nkolelo ali nu kucula cuze, nupya antu amu mukulo uu yalamukana.

²⁶ Vino cali mu manda yakwe Nowa avino cilaya nu mu manda ya Mwana wa Muntu.

²⁷ Antu yalyanga nu kumwa, yatwalanga nu kutwalwa, kufika na pa wanda uno Nowa wingile mu cange lino mulamba wizile ayakoma onsi.

²⁸ Vivyo kwene avino cali nu mu manda yakwe Loti. Antu yalyanga nu kumwa, yakalanga, yakazyanga, yakomelanga nu kukuula mang'anda.

²⁹ Uwanda uno Loti wafumile mu Sodoma, umoto na maluti vyaponyile kufuma kuli Leza kwiyulu nu kulovya onsi kwene.

³⁰ Avino cilaya pa wanda uno Mwana wa Muntu alaloleka

³¹ “Pa wanda ulya umuntu wensi aalazanwa pi paala lya ng'anda yakwe, wene atakike kuti aingilemo nu kutoola viya vyakwe. Mu musango uli onga wensi aalazanwa mu calo atakaswilile ku ng'anda.

³² Iusyini muci wakwe Loti!

³³ Wino wensi akwezya kusunga umi wakwe wene alauponzya. Na wino wensi amaponzya umi wakwe wene alausunga. Mk 8:35; Luk 9:24; Yoa 12:25

³⁴ Namunena vino usiku pa wanda ulya kulaya antu yaili aizi pamwi pa musanzi onga. Wenga yalamusenda, nu muze yalamusya.

³⁵ Anaci yaili yalaasya pamwi apiwe. Wenga yalamusenda, nu muze yalamusya. [

³⁶ Antu yaili yalaomba mu calo. Wenga yalamusenda, nu muze yalamusya.]”

³⁷ Lino alondezi yuvwa vii yamuuzya yati, “Mwene, aukwi kuno vilacitikila?” Yesu nawe ayanena ati, “Konsi kuno icala cili, akuno na makozi yakakongana.”