Luka 15 - Amazwi Yakwe Leza 2013

Mulumbe wa mfwele iponge

¹ Lyene yakasonkesya na yakaifya iiza ku kuvwa kuli Yesu.

² Afaliseo na yakasambilizya ya Masunde yatandika kuilizyanya yati, “Umuntu wii akazengela yakaifya nu kulya nayo!”

³ Caleka Yesu ayanena mulumbe uu ati,

⁴ “Umwi uwa munomuli ndi wali ni mfwele mwanda, nga waponzya yonga uzye akacita uli? Akasya zyonsi makumi fundimbali na fundimbali, apita kukulonda yonga iyati ponga suka aiizane.

⁵ Lino waizana, akaya ni nsansa cuze cakuti aitoola aika na pa ciye,

⁶ nu kuisenda ku ng'anda ukwakwe. Lyene aama yacuza yakwe na ainipamba pali pamwi, ayanena ati, ‘Zangini pamwi nani, pano nati nzana mfwele yane iyaponzile.’

⁷ Mu musango uli onga, namunena vino, kulaya insansa zingi mwiyulu pali kaifya wenga uwazenzuka kuluta antu makumi fundimbali na fundimbali acindame yano yakaelenganya ukuti citakulondekwa kuti yazenzuke.

Mulumbe wa lupiya luponge

⁸ “Nanti mwanaci umwi ndi wali ni mpiya ikumi lelo waponzya longa, uzye akacita uli? Uzye atangakozye lukozyo, apyele ng'anda yakwe, nu kulonda monsi kwene, suka aluzane?

⁹ Lyene lino waluzana, aama ainipamba na yacuza yakwe pali pamwi, ayanena ati, ‘Zangini pamwi nani, pano nati nzana lupiya luno lwaponzile.’

¹⁰ Namunena vino mu musango uli onga, angeli yakwe Leza yakazanga pali kaifya wenga uwazenzuka.”

Mulumbe wa mwana muponge

¹¹ Nupya Yesu ayanena ati, “Kwali umuntu uwakweti ana aonsi yaili.

¹² Umuto anena isi ati, ‘Tata, ngankanye vya upyanyi vya pa vyuma vyako.’ Caleka umuntu aankanya vyuma vyakwe pakasi ka ana yonsi oili.

¹³ Apacisila ca manda yanono, umuto wakazizye vyuma vyakwe, asenda impiya apita ku mpanga ya kutali, kuko kuno waile asumba vyuma vyakwe vyonsi mu uwelewele wakwe.

¹⁴ Pacisila ca kusumba vyonsi vino wakweti, kwaponyile cipowe cikulu mu mpanga ilya. Nawe atakweti nanti cimwi.

¹⁵ Caleka waile aingila incito ku mukama umwi uwamu mpanga ilya, nawe amutuma ku kucema yakapoli.

¹⁶ Lyene akumbukila kulyako vinkapala vino yakapoli yakulya, pano patali nanti umwi uwa kumupeela cakulya.

¹⁷ Lyene lino amano yamuzana aelenganya mu mano yakwe ati, ‘Aomvi yakwe tata yonsi yakalya yakwikuta na vimwi vikasyala, lelo nemo kuno namafwa kunzala!

¹⁸ Namakatuka mpite kuli tata inkamunene inti, Tata, niifya kuli Leza uwa mwiyulu na kunuli.

¹⁹ Ntaine ukwamwa umwana wako nupya, uncite wakwe wenga uwa pa yaomvi yako.’

²⁰ Caleka akatuka aya kuli isi. “Lelo lino acili kutali kufuma kumwao, isi amulola; aya na mizu mu mwenzo wakwe. Alino asimula amukukula nu kumutonsola.

²¹ Umwana nawe amunena ati, ‘Tata, Niifya kuli Leza uwa mwiyulu na kunuli. Ntaine ukwamwa umwana wako nupya.’

²² Lelo isi aama aomvi yakwe ati, ‘Pitisyini, letini zuwa umwingila usuma kuluta pali yonsi mumuzwike. Mumuzwike ni mbalaminwe ku munwe ni ndyatu ku ngazo zyakwe.

²³ Lyene kaletini kacipambasi akiine mukakome, muleke tucite cimulo tuzange!

²⁴ Pano umwanane wii wafwile, lelo nupya ali nu umi. Waponzile, lelo ndakai watalondoka.’ Lyene yatandika kuzanga.

²⁵ “Silenzi wene wali ku vyalo. Lyene pa kuwela, lino wapalamila ku ng'anda, auvwa yakwimba nu kucina.

²⁶ Alino aama wenga uwamu yaomvi amuuzya ati, ‘Uzye icani cikucitika?’

²⁷ Muomvi amunena ati, ‘Umunyonko watawela. Na so watamukomela kacipambasi akiine, pano watamupokelela ulumi, nupya ali ningo.’

²⁸ Silenzi asoka cakuti akana nu kwingila mu ng'anda. Caleka isi afuma, amupapata kuti aingile.

²⁹ Lelo wene anena isi ati, ‘Lola! Myaka yonsi ii nkakuombela wa muzya, nupya ntatala nkana kuyela masunde yako. Lelo utatala wampeela nanti kambuzi ka maka kuti ncite cimulo, pakuti tuzange na yacuza yane.

³⁰ Lelo umwana wako wii wasumba vyuma vyako vyonsi muli yacizelele, na lino watawela pa mulyango, wemo wamukomela kacipambasi akiine!’

³¹ Isi nawe amunena ati, ‘Mwanane, Wemo waya nani manda pe, na vyonsi vino nkweti ivyakwako.

³² Cati cizipa kuti tuzevye nu kuzanga, pano munyonko wafwile, lelo nupya ali nu umi. Waponzile, lelo ndakai watalondoka.’”