Luka 11 - Amazwi Yakwe Leza 2013

Yesu wasambilizya alondezi yakwe kupepa

¹ Yesu wapepanga mu cifulo cimwi. Lino wamala, wenga uwamu alondezi yakwe amunena ati, “Mwene, tusambilizye kupepa, ndi vino Yoane Kawatizya wasambilizye alondezi yakwe.”

² Lyene Yesu ayanena ati, “Lino mukupepa, mwati, ‘Tata, Izina lyako licindikwe; Uwene wako wize.

³ Utupeele cila wanda ivyakulya vitu vya manda pe.

⁴ Utwelele maifyo itu, vino naswe tukaelela onsi yano akatwifya, nupya utaleka tuponele mu matunko.’”

⁵ Yesu auzya alondezi yakwe ati, “Uzye aweni uwa munomuli angaya ku ng'anda yakwe cuza wakwe usiku nu kumunena ati, ‘Cuza wane nkongwesye mikate itatu.

⁶ Pano cuza wane wataiza pane, ali pa lwendo, nga ntakweti cakulya ca kumupeela.’

⁷ Lyene cuza wako ali mu ng'anda aasuke ati, ‘Utanganola! Cisasa cati ciyalwa, nupya nemo pamwi na ana yane tuizi. Ntange nkatuke kuti nkupele mukate.’

⁸ Namunena ukuti nanti atangakatuke nu kumupeela cili consi pano wene acuza wakwe, lelo pamulandu wa muzonda wakwe wene angakatuka kuti amupeele consi cino akulonda.

⁹ “Caleka namunena nati, lengini nga mumapelwa, londini nga mumazana, konkonsyini nga mumayulilwa.

¹⁰ Pano wensi akalenga akapelwa, na wino akalonda akazana, nga na wino akakonkonsya akayulilwa.

¹¹ Uzye umwi muli mwe yaisi mwana ndi wamulenga inswi angamupeela inzoka?

¹² Nanti uzye ungamupeela ikalela lino wakulenga iyai?

¹³ Mwe yaipe mwamanya kupeela vintu visuma ku yana yinu. Uzye So uwa mwiyulu atalalusya kupeela Mupasi Wamuzilo kuli yao akamulenga?”

Yesu na Belezebu

¹⁴ Yesu wafumyanga mupasi wankota uwacisile umonsi umwi uciulu. Lino mupasi wankota wafumile, ciulu atandika ukuvwanga. Amaumba ya antu yazunguka cuze.

¹⁵ Lelo yamwi munoyali yavwanga yati, “A Belezebu, mwanangwa wa mipasi yankota, uwamupeela maka yakufumizya mipasi yankota.”

¹⁶ Yamwi yalondanga kwezya Yesu. Caleka yamuzya ukuti acite cilangililo ca cinjelengwe kunoyali icakusininkizya ukuti wene watumwa na Leza.

¹⁷ Lelo Yesu lino wamanya vino yakwelenganya, ayanena ati, “Antu amu wene uli onsi ndi yakatukilana aisikulu nu kuilwisya lyene uwene uwo ulawa, na amu ng'anda ndi yakatukilana aisikulu yene yalapaatukana.

¹⁸ Uwene wakwe Ciwa ndi waipaatula uwisikulu, uzye ungakoma uli? Nalanda vii pano mukati Belezebu uwampela maka akufumizya mipasi yankota.

¹⁹ Ndi nkafumya mipasi yankota mu maka yakwe Belezebu, uzye antu inu yakaifumya mu maka yakwe weni? Caleka antu inu kwene yalamupingula ukuti mwaponga.

²⁰ Lelo ndi nkafumya mipasi yankota mu maka yakwe Leza, ale lyene Uwene wakwe Leza wati wiza panomuli.

²¹ “Lino umuntu wa maka waipangasya ivyanzo nu kucingilila ng'anda yakwe, vintu vyakwe vyonsi vilacingililwa ningo.

²² Lelo lino wino amulusile maka wiza wamuzanza nu kumucimvya, wene alapoka ivyanzo vyonsi kwene vino mwine wataila, nu kwankanya vino wapokolola.

²³ “Wino aakumpazya ala asi nani, na wensi wino asingazwa kukolonganika ala akusalanganya.

Mupasi wankota ukaswilila mu muntu

²⁴ “Lino mupasi wankota wafuma mu muntu, ukapitana mu lwanga ala ukulonda cifulo apa kupuza. Lelo ndi utazanyile pamwi, lyene ukati, ‘Namaswilila ku ng'anda yane ino nafumilemo.’

²⁵ Lino waswilila, iuzana ing'anda ipyele ningo na vyonsi iviseziwa.

²⁶ Lyene iufuma iuya uleta mipasi yuze cinimbali iipisye ukuuluta, nga iiza ikalamo. Lyene miyele ya muntu wiyo, iipisya kuluta vino yali pa kutandika.”

Ulongo lwa Cumi

²⁷ Lino Yesu acili akuvwanga vintu vii, umwanaci umwi mwi umba asanzika izwi lyakwe ati, “Walongo umwanaci uwakuvile, wino wewe onsileko.”

²⁸ Lelo Yesu amunena ati, “Alongo ayao akauvwa mazwi yakwe Leza nu kuyayela.”

Antu Yalonda cilangililo ca cinjelengwe

²⁹ Lyene lino maumba yakongana kunoli, atandika kuvwanga ati, “Antu amu mukulo uu aipe! Yakalonda cilangililo ca cinjelengwe. Lelo kusi cilangililo ca cinjelengwe icilapelwa kunoyali, suka sile cilangililo cakwe Yona.

³⁰ Ndi vino Yona wali cilangililo ca cinjelengwe ku antu aku Ninive, vivyo kwene nu Mwana wa Muntu alaya cilangililo ca cinjelengwe ku antu amu mukulo uu.

³¹ Pa wanda wa upinguzi namwene uwaku kaeya alimilila pamwi na antu amu mukulo uu nu kuyasinila, pano wapisile mpanga itali cuze kuya ku mwene Solomoni ku kuvwa mazwi ya mano kunoli. Lola umwi mukulu kuluta Solomoni ali pano.

³² Pa wanda wa upinguzi, antu amu Ninive yalimilila pamwi na antu amu mukulo uu nu kuyasinila, pano yene yazenzwike lino Yona wakosozile kunoyali. Lola, umwi mukulu kuluta Yona ali pano.

Manso ilampi lya kukozezya mwili

³³ “Kusi umwi akakozya ilampi nu kuliika mu ncende ifisame, nanti kulitupika mu nyungu. Lelo akaliika pa sanzame, pakuti antu akwingila mu ng'anda yalole luswepo.

³⁴ Amanso inu yakoline wi lampi lya kukozezya mwili. Lino manso inu yali ningo, mili inu nayo kwene imazulamo luswepo. Lelo lino manso inu yasi ningo, mili inu ilazulamo mfinzi.

³⁵ Caleka cenjelini, kuti luswepo luli munomuli lutasenuka luye mfinzi.

³⁶ Mili inu yonsi ndi izilemo luswepo, ukwaula kuti cilundwa cimwi ciye mu mfinzi, Lyene cila cilundwa cilayengesa, wakwe vino ilampi likayengesa panomuli.”

Yesu wakalipila Afaliseo na Yakasambilizya ya Masunde

³⁷ Lino Yesu wamala ukuvwanga, Mufaliseo umwi amwama ku cakulya. Caleka aingila mu ng'anda alya pamwi nawe.

³⁸ Mufaliseo azunguka pa kulola vino Yesu akulya ukwaula kufulala ku minwe kulingana nu lutambi.

³⁹ Lyene Mwene amunena ati, “Mwe Afaliseo mukafula ingako ni mbale kunzi, lelo mu myenzo inu mwazula ukakasi ni nkota.

⁴⁰ Viwelewele mwe! Uzye asi a Leza uwaumvile kunzi nu mukasi kwene?

⁴¹ Lelo pelini vino vili mu mbale ku apina, alino myenzo inu imasanguluka.

⁴² “Kalanda kunomuli mwe Afaliseo! Mukapela kuli Leza cikumi ca pa vilimwa vyonsi ivikanunkizya vyakulya. Vili wakwe kanyenze ni vinzali nga navyuze vilimwa vyamu miyanda. Lelo mwatazyela cumi nu kutemwa kwakwe Leza. Mulinzile mwacita vii vyonsi, kwaula kutazyela vimwi.

⁴³ “Kalanda kunomuli mwe Afaliseo! Mwatemwa ivilimba vya ucindami mu mang'anda ya mapepo nu kulamukwa nu mucinzi mu masokoni.

⁴⁴ Kalanda kunomuli! Mwakolana na malindi asi ni vimanyililo yano antu yakapita papela kwaula kumanya.”

⁴⁵ Wenga uwamu nkonkotela zya Masunde amwaasuka ati, “Kasambilizya, lino ukuvwanga vii naswe kwene ala ukututuka.”

⁴⁶ Yesu amunena ati, “Kalanda kuno muli namwe kwene yakasambilizya ya Masunde! Mukatwika antu visendo vinyomesye nupya vitale ukusenda. Lelo mwemo mutangakatusya nanti umunwe kuti muyazwe kusenda visendo vivyo vya masunde inu.

⁴⁷ Kalanda kunomuli! Mukakuulila yakasema vipilala vya pa malindi. Yakasema yaa ayano vikolwe vinu vyakomile.

⁴⁸ Mwemwe yakambone, nupya mwasininkizya vino vikolwe vinu vyacisile, pano vyakomile yakasema. Lyene namwe muyakuulila vipilala vya pa malindi.

⁴⁹ Pamulandu uu, Leza mu mano yakwe wavwanzile ati, ‘Ndayatumila yakasema na atumwa. Na munoyali yamwi yalayakoma na yamwi nao yalayazunya.’

⁵⁰ Caleka antu amu mukulo uu yalapeelwa cilanduzi pamulandu wa kukoma yakasema yonsi kufuma ku uumbo wa nsi.

⁵¹ Kutandikila pa kukomwa kwakwe Abeli kufika na pa kukomwa kwakwe Zakaliya, wino wakomilwe mu Ng'anda ikulu yakwe Leza pakasi ka kavuwa ni cifulo camuzilo. Endi, namunena, vino mukulo uu ulapelwa cilanduzi.

⁵² “Kalanda kunomuli mwe nkonkotela zya Masunde. Mwasunga imfungulo ino ikayula ku kumanya vya pali Leza. Mwemo mweisikulu mwaposiwa ukwingilamo, nga mukalesya yano akwezya ukwingilamo.”

⁵³ Lino Yesu wafumile pa ncende iilya, yakasambilizya ya Masunde na Afaliseo yatandika kumusokela nu kumuuzya amauzyo aingi,

⁵⁴ pakuti yamuteye mu mivwangile yakwe.