Loma 9 - Amazwi Yakwe Leza 2013

Leza na aina Izlaeli

¹ Nene wakwe Klistu, nkuvwanga cumi, nupya nsikutumpoka. Na kampingu wane wino Mupasi Wamuzilo akatungulula ali kambone wane. Caleka nsikutumpoka apa kuvwanga ukuti,

² mwenzo wane ukunyunguluka nupya ndi nu ulanda ukulu cuze pamulandu wa inane, antu amu luko lwane.

³ Pano ningatemwa kuti intipwilwe pamulandu wao, mpaatulwe na kuli Klistu.

⁴ Yene antu yakwe Leza yano wasolola kuti yaye ana yakwe, nga nu kusokolola lulumbi lwakwe kunoyali. Leza wacisile cipangano nao nu kuyapela Masunde. Wayasambilizye vino yangamupepa mucumi. Wafikilizye malayo yakwe kunoyali.

⁵ Yene ivizikulula vya vikolwe vitu vilumbuke, na Klistu kwene uwamu mupanda wa mutundu wao. Leza, wino waya na maka pali vyonsi, alumbanyiwe manda pe! Ameni.

⁶ Nemo ntakulanda ukuti, Leza waposiwa kufikilizya ulayo wakwe, pano asi onsi amu mutundu wa ina Izlaeli ali antu yakwe Leza mucumi.

⁷ Asi onsi amu luko lwakwe Abulaamu ali ana yakwe Leza. Leza wanenyile Abulaamu ati, “Kupitila sile muli Isaki amuno ulakwata vizikulula vino nakulavile.”

⁸ Kuli kuti, asi ana onsi avyalwa ku akwasi ali a Izlaeli mucumi. Lelo ana avyalwa pamulandu wa ulayo wakwe Leza ali ana yakwe mucumi.

⁹ Pano walavile lino wavwanzile ati, “Pa nsita ilinzile ndiza, na Sala alakwata umwana monsi,”

¹⁰ Nupya cisi vivyo sile, pano Labeka nawe waviile ana aonsi yaili, yano isi wali a Isaki cikolwe citu.

¹¹ Lelo lino ana yaa yatali kuti yavyalwe nanti kucita cisuma nanti ciipe, Leza wanenyile Labeka ati, “Silenzi alatumikila muto.”

¹² Leza wavwanzile cii kuti alange vino kusolola kwakwe kwaya, nga nu kuti asi pamulandu wa cintu cimwi cino yaa oili yacita.

¹³ Acino calembwa mu malembelo cati, “Natemilwe Yakobo, Esau namupasile.”

¹⁴ Uzye lyene tumati uli? Uzye Leza uwa lufyengo? Awe cipelele kutali.

¹⁵ Pano Leza wanenyile Mose ati, “Ndaya na mizu kuli wino nkasi kuyela mizu, nga ni nkunkunsi kuli wino nkasi kuyela nkunkunsi.”

¹⁶ Caleka cisi pali cino umuntu akasi nanti cino akaezya kucita, lelo cili pali Leza wino akayela mizu.

¹⁷ Pano calembwa mu malembelo ukuti, Leza wanenyile Falao ati, “Cino nakwikila pa wene, apakuti nkuomvye kuti ndange maka yane munuli, na pakuti izina lyane limanyike mu nsi yonsi.”

¹⁸ Caleka Leza akaya na mizu kuli wino akasi kuyela mizu, nga nu kukomya mwenzo wakwe wino akasi kukomya mwenzo.

Ukali wakwe Leza nu Luse lwakwe

¹⁹ Umwi uwa munomuli anganguzya ati, “Ndi avino caya, uzye lyene pacani Leza angatupeela mulandu? Uzye aweni angalesya Leza kucita cino akasi?”

²⁰ Uzye wemo, wewe weni uwakupazyanya na Leza? Uzye inyungu inguzya nakamata iti, “Uzye pacani wamatile mu mwata uu?”

²¹ Uzye nakamata asi ni nsambu zya pa mbulo iya kucita mukanya onga civiya conga cicindame nu mukanya uze civiya cuze cisaluke?

²² Na Leza kwene avino waya. Akalonda kuti alange ukali wakwe nu kulanga maka yakwe kuli yao angaloviwa. Lelo mu cifulo cakwe cii Leza akayatekela mwenzo.

²³ Leza wacita cii pa kulanga lulumbi lwakwe lukulu kunotuli, swe muno watuyela mizu nu kutusolola kuti tukume ku lulumbi lwakwe lukulu,

²⁴ a sweswe kwene swe muno Leza waama, asi kufuma sile mu Ayuda, lelo nu mu Akulukuwa kwene.

²⁵ Wakwe vino Leza wavwanga kupitila muli kasema Oseya ati, “Antu yano atali antu yane, Ndayama kuya ‘Antu yane’ Umutundu uno ntatemilwe ndawama inti, ‘We mutundu wane uno natemwa.’

²⁶ Nu ku cifulo kuno Leza wayanenyile ati, ‘Mwemo musi antu yane,’ kuko kwene akuno yalamwa ana yakwe Leza wa umi.”

²⁷ Vii avino kasema Ezaya wavwanzile pamulandu wa ina Izlaeli ati, “Nanti angala aina Izlaeli yavula wa musensenga uwamu nkumba yakwe yemba, lelo anono sile alatuulwa.

²⁸ Pano Mwene alafikilizya zuwazuwa kucita vino wasoka antu muno nsi.”

²⁹ Ezaya nupya wavwanzile ati, “Ndi mwene Wamaka yonsi wange alovye vizikulula vitu, twange tulowe wa misumba ya Sodoma na Gomola.”

Ilandwe Lisuma lyakuma na ina Izlaeli kwene

³⁰ Uzye lyene tumati uli? Katuti, Akulukuwa yatalondanga kuicita kuya aololoke pa manso yakwe Leza, lelo yaweni ukuti Leza angayacita kuya aololoke pa manso yakwe mu utailo.

³¹ Lelo aina Izlaeli yano alondanga kuya aololoke pa manso yakwe Leza mu kuyela Masunde yakwe Mose yene yaposiwe.

³² Uzye pacani? Apamulandu wakuti yatemelile ku utailo, lelo pa visuma vino yacitanga. Caleka yapumike “Kwi we lya kuipumako.”

³³ Ndi vino malembelo yakati, “Lolini naika mu Zioni iwe lya kuipuma, ililalenga kuti antu yapumike nu kupona. Lelo wino wensi uwataila munoli atalacitwa insonyi.”