Loma 7 - Amazwi Yakwe Leza 2013

¹ Mwe inane, mumailuka pali vino namamunena, pano mwemo mwamanya Masunde vino yaya. Pa nsita sile ino muntu acili umumi alino ali nu kulondela Masunde.

² Wa cilangililo, Masunde yakataka vino mwanaci uwatwalwa ala wanyepwa kuli iya lyonsi lino iya acili umumi. Lelo ndi iya wafwa, ala lyene waya musapulwe ku kutwalwa ku monsi muze.

³ Acino mwanaci wiyo ndi waya ku monsi muze pa nsita ino iya acili umumi, mwanaci wiyo ala walongozya. Lelo ndi iya wafwa ala lyene waya musapulwe, nupya ndi watwalwa ku monsi muze ale atacisile ulongozyo.

⁴ Ali vino cili na kuli mwemwe mwe inane. Pano mwemwe vilundwa vya mwili wakwe Klistu, mwafwa pamwi naliwe ku Masunde yakwe Mose. Ndakai mwemwe yakwe Klistu, wino uwazyukwilwe kufuma ku afwe, pakuti twatumikila Leza ningo.

⁵ Pano lino twikalanga mu untunze, Masunde yakatwisye vilondwa vya mili itu viipe nu kuleta imfwa.

⁶ Lelo pali ndakai, sweswe antungwa kufuma ku kuteekwa na Masunde, pamulandu wakuti tukoline wa afwe kuli cino icatutesile uzya. Lyene tusyakutumikila Leza mu musango wakulondela Masunde, lelo mu musango upya wakulondela Mupasi Wamuzilo.

Masunde ni Iifyo

⁷ Uzye lyene tumati kulondela Masunde yakwe Mose kuli kwifya? Awe, citangaya! Lelo kwene Masunde alenzile kuti imanye vino maifyo yaya. Pano Masunde yatakana kunena yati, “Utakumbwa ca muzo,” nga ntamanya na vino ulunkumbwa lwaya.

⁸ Lelo kupitila mwi sunde kwene lii amuno iifyo lyazana umweko nu kukatusya ulunkumbwa lwa misango yonsi munondi. Pano kwaula Masunde, ale ni iifyo kwene litangacita cimwi.

⁹ Nani kwene mpiti nali nu umi lino ntali manye Masunde, lelo lino natandike kumanya Masunde, iifyo nalyo liya na maka, nga

¹⁰ nani nja wa mufwe. Masunde ali nu kundetela umi, yene yalesile imfwa kunondi.

¹¹ Pano iifyo lyazanyile apa kwingilila, nga linsomba nu kunkoma.

¹² Caleka, Masunde yene amuzilo, alungame nupya asuma.

¹³ Uzye lyene cii cikusenula ukuti icintu cisuma icandenga kuya mufwe? Awe, asi vivyo! Lelo iifyo ilyacisile vii. Pa kuomvya icintu cisuma, iifyo lyandetela imfwa pakuti mucumi umwata wakwelyo uwa kwifya usokololwe. Acino kupitila mu Masunde, iifyo likaloleka kuya lipisye.

Kulwisyanya ni iifyo mu mwenzo wa muntu

¹⁴ Twamanya vino Masunde yakwe Mose yapilwe na Leza, lelo nemo nene muntu ukufwa, nasumbwa ukuya muzya wa maifyo.

¹⁵ Na cino nkacita ntacimanya ningo pano nsicita cino nkasi kucita, lelo cino napata acino incita.

¹⁶ Lino nacita cino ntali nkasi kucita, ala cii cikulanga kuti nkazumilizya vino Masunde asuma.

¹⁷ Acino asi nene nkucita vintu vii viipe, lelo iifyo lino likaikala munondi.

¹⁸ Namanya na vino usuma utaya munondi, kuli kuti mu untunze wane. Pano nanti angala nkulonda kucita cisuma, nkaposiwa kucicita.

¹⁹ Nemo nsyacita cisuma cino nkasi kucita, lelo nkacita iciipe cino ntakasi kucita.

²⁰ Acino ndi nkacita cino ntakasi kucita, asi nene nkacita, lelo iifyo lino likaikala munondi.

²¹ Acino Masunde yakandanga kuomba ukuti, lyonsi lino nkalonda kucita cisuma, icikacitika cakuti iciipe acino nkasolapo kucita.

²² Kwene mwenzo wane onsi ukazumilizya Masunde yakwe Leza.

²³ Lelo mu mwili wane mwene nkazana sunde lyuze ilikalwisya sunde lino melenganyo yane yakazumilizya. Isunde lii ilikantwala ku kwifya linteeka uzya kwi iifyo ilikuomba munondi.

²⁴ Owee! Ne mulanda! Uzye aweni amankulula ku mwili uno ukuntwala ku mfwa?

²⁵ Nkataizya Leza wino akacita cii muli Yesu Klistu Mwene witu! Avino canzana nene ne muntu ali umwi nkayela Masunde yakwe Leza mu mwenzo wane nanti angala mu untunze wane nkayela sunde li iifyo.