Loma 6 - Amazwi Yakwe Leza 2013

Twaya Aumi muli Klistu

¹ Uzye lyene tumati uli? Uzye tumaifyanga pakuti cikuku cakwe Leza civulileko?

² Awe citangaya! Ndi twafwa nu kufuma mu maifyo, uzye lyene tungatwalilila kwifya uli?

³ Na limwi mutamanyile vino swe muno twawatiziwa muli Klistu Yesu, twawatiziwa nu mu mfwa yakwe kwene?

⁴ Caleka lino twawatiziwe, cali ungati twafwa nu kuzikwa pamwi na Klistu, pakuti, ndi vino Klistu wazyukwilwe kufuma ku afwe mu maka yalulumbi yakwe Isi, avino naswe kwene tulinzile kuya nu umi upya.

⁵ Pano ndi twaya wenga pamwi nawe mu mfwa yakwe, mu musango uli onga kwene tulaya wenga pamwi nawe pa kuzyukuka kufuma ku afwe, wakwe vino wene wazyukwilwe.

⁶ Twamanya vino untu witu wa mpiti watanyilwe pamwi na Klistu pa lupanda, kuti myenzo ya ukakasi ifumiwepo, nu kuti maifyo yatatuteeka uzya.

⁷ Pano umuntu ndi wafwa, ala wakululwa ku maka iifyo.

⁸ Lelo ndi twafwa pamwi na Klistu tukutaila vino tulaya aumi pamwi nawe.

⁹ Pano tumanyile vino Klistu wene wazyukwilwe kufuma ku afwe, nga atalafwa nupya. Imfwa itacili na maka panoli.

¹⁰ Klistu wafwile, acino maifyo yatali na maka panoli, wene wafwile ca limwi pa maifyo itu. Caleka umi uno ali nao ndakai uwa utandano na Leza.

¹¹ Mu musango uli onga kwene namwe muipende kuya wa antu afwe, ku maka yano maifyo yakwata, lelo muye aumi mu utandano na Leza muli Yesu Klistu.

¹² Caleka mutaleka maifyo yateeka mu mili inu ino ili nu kufwa, nu kulenga kuti mwalondela ulunkumbwa lwa untunze winu.

¹³ Mutapela vilundwa vya mili inu ku maka yi ifyo, kuti viye viombelo vya kucitilako ukakasi. Lelo muipele kuli Leza, wa antu yano azyukulwa kufuma ku afwe nu kuya nu umi. Mupele vilundwa vyonsi vya mili inu kuli Leza, kuti viye viombelo vya kucita vyawololoke.

¹⁴ Iifyo litalinzile kuteeka mwemwe pano mwemo Masunde yakwe Mose yasyamuteeka, lelo mukateekwa ni cikuku cakwe Leza.

Twakwata mulimo wakucita vyawololoke wakwe Leza

¹⁵ Uzye lyene icani? Uzye twaifya, pamulandu wakuti tukateekwa ni cikuku cakwe Leza, nga tusyateekwa na masunde? Citangaya vivyo!

¹⁶ Na limwi mutamanyile vino ndi mwaipela mweisikulu kuya azya yakuyela umuntu umwi, ala mu cumi mwemwe azya yakwe wino mukayela. Acino ndi mwaipela ku maifyo ale mumaya azya ya maifyo, na maifyo yakaleta imfwa. Ndi mwaipela ku kuyela Leza, ale kuyela kwinu kumamulenga mwikale umi wakucita vyawololoke pa manso yakwe.

¹⁷ Pansita imwi mwali yazya akuyela maifyo, lelo ndakai nkutaizya Leza pano mukayela usambilizyo uwo uno mwapokelela ni myenzo inu yonsi.

¹⁸ Mwemo mwakululwa kwi iifyo. Lyene mwaya azya yakwe Leza kuti mwacita vyawololoke.

¹⁹ Nkuomvya cilangililo ca uzya lino nkulanda kunomuli kuti muvwikisye vintu vii. Apa nsita imwi mwaipelisye ku kuya azya amicitile ikowele nga nu ukakasi pamulandu wa melenganyo inu aukakasi. Vivyo kwene, ndakai muipelesye ku kuya azya akacita vyawololoke pakuti mwatumikila Leza mu vyamuzilo.

²⁰ Lino mwali azya yi ifyo, mwali antungwa ku kuntacita vyawololoke vino Leza akalonda.

²¹ Uzye umuzano cii uno mwazanyile mukucita vintu vino ndakai vikumuletela insonyi? Ala icikafumamo, imfwa!

²² Lelo ndakai mwakululwa kwi iifyo, nupya mwati muya azya yakwe Leza. Acino muzano uno mukweti umi wa kuipelesya kuli Leza, nga ni cikafumamo, umi wape.

²³ Pano malipilo yi ifyo, imfwa. Lelo uwila wakwe Leza umi wape muli Klistu Yesu Mwene witu.