Loma 4 - Amazwi Yakwe Leza 2013

¹ Uzye lyene tumati uli pali Abulaamu cikolwe citu? Uzye wazanyile cani pa lwakwe?

² Abulaamu ndi wacisilwe kuya mololoke pa manso yakwe Leza pamulandu wa milimo ino wacitanga, ale angakwata cino angailumbilapo. Lelo atangailumba pa manso yakwe Leza.

³ Pano malembelo yakati, “Abulaamu wataile Leza, nga pamulandu wa utailo wakwe, Leza wamuzumila kuya mololoke pa manso yakwe.”

⁴ Umuntu akaomba incito akalipilwa malipilo. Lelo malipilo yatangapendwa kuya uwila, pano yakapelwa pa mulimo uno waomba.

⁵ Umuntu wino wemelela pa utailo, asi pali vino akaomba, lelo wataila muli Leza wino akataka umuntu wa mulandu kuya uwakaele, wene pa utailo wakwe auno Leza akalola pa kumutaka kuya mololoke pamanso yakwe.

⁶ Vino na Davidi walanzile ati walongo umuntu wino Leza wazumila kuya mololoke pasi pa kuomba kutupu.

⁷ “Alongo antu yano kwifya kwao kwelelwa, yano Leza ataliusya maifyo yao!

⁸ Walongo umuntu wino Mwene wafuta maifyo yakwe mu lupapulo lwakwe!”

⁹ Uzye ulongo luno Davidi watasile ulwakwe yao sile asilamulwa? Awe, cisi vivyo! Lwene ulwakwe nayauze kwene yao atasilamulwa. Pano twati tuwelenga malembelo akati, “Pamulandu wa utailo wakwe, Leza wazumile Abulaamu kuya mololoke.”

¹⁰ Uzye cii, cacitike lilaci? Uzye cali pa cisila lino Abulaamu wasilamulwa nanti lino atali kuti asilamulwe? Cali lino atali kuti asilamulwe.

¹¹ Wene wasilamwilwe pacisila. Ukusilamulwa kwakwe cali cili cilangililo cakuti cisininkiziwe vino Abulaamu wataile Leza lino atali kuti asilamulwe. Na Leza pali pa kumuzumila vino wene mololoke lino atali kuti asilamulwe. Acino Abulaamu ali cikolwe ca antu yonsi ataila Leza, yao yano Leza wazumila vino aololoke, nanti angala yatasilamulwa.

¹² Cii, calenga kuti Abulaamu aye cikolwe cakwe na yao kwene asilamulwa, asi pamulandu wakusilamulwa. Lelo pano yakapita mu umi wa utailo uno Abulaamu cikolwe citu wali nao lino atali kuti asilamulwe.

Ulayo wakwe Leza uwakwe yao yonsi ali nu utailo

¹³ Lino Leza walavile ukupeela insi yonsi kuli Abulaamu ni vizikulula vyakwe watasile cii, asi pamulandu wakuti Abulaamu wayelanga Masunde, lelo apamulandu wakuti wataile Leza nawe amuzumila kuya mololoke.

¹⁴ Pano ndi cintu cino Leza walaya cili nu kupelwa kuli yao akayela Masunde, ale lyene nu utailo utakusenula cimwi, nupya ale nu ulayo wakwe Leza uwasilesile.

¹⁵ Kuntayela Masunde kukaleta ukali wakwe Leza! Lelo ukusi Masunde kutangaya kuntayela.

¹⁶ Acino ulayo wemelela pa kutaila Leza, pakuti Leza afikilizye ulayo pa kuya nu luse ku vizikulula vyakwe Abulaamu vyonsi. Asi sile kuli yao akuyela Masunde, lelo na kuli yao akataila ndi vino Abulaamu wataile. Pano Abulaamu ali cikolwe citu swensi,

¹⁷ ndi vino malembelo yakati, “Nakucita cikolwe ca antu amu nko zyonsi.” Ulayo uu wapilwe kuli Abulaamu pano wataile Leza, wino akapeela umi ku afwe nu kulenga kuti vintu vino vitaliko viyeko.

¹⁸ Abulaamu wataile nu kupaalila kuti cilacitika nanti angala ataweni cino wapaalilanga. Acino wizile aya cikolwe ca antu amu nko zyonsi, wakwe vino calembwa mu malembelo cati, “Vizikulula vyako vilavula.”

¹⁹ Abulaamu wali ni myaka mupipi nu mwanda lelo utailo wakwe wali ukome nanti angala wamanyile vino mwili wakwe wali kwati ufwe, na vino Sala wali ng'umba.

²⁰ Lelo pa kuvwa vino Leza wamulavile atali na kutentengana mu utailo wakwe, nanti kutwisika ulayo wakwe Leza. Utailo wakwe wamukomelizye nga alumbanya Leza.

²¹ Wene wasininkizye vino Leza wali na maka akufikilizya ulayo wakwe.

²² Uli mulandu uno Abulaamu pa utailo wakwe Leza wamuzumile kuya mololoke.

²³ Mazwi akuti, “Amuzumila kuya mololoke” yatalemvilwe pali aliwe wenga sile.

²⁴ Yalemvilwe na pali sweswe swensi swe muno Leza amatuzumila kuya aololoke, swe muno twataila Leza wiyo uwazyukwile Yesu Mwene witu kufuma ku afwe.

²⁵ Leza wapile Yesu kuti afwe pamulandu wa maifyo itu, nupya uwamuzyukwile kuti aye nu umi, pakuti atucite kuya aololoke pa manso yakwe.