Loma 2 - Amazwi Yakwe Leza 2013

¹ We muntu we muno ukapingula auzo, utangaleuka mulandu. Pano ndu kupingula auzo lino nawe ukacita viipe ala nawe ukuivunuka wemwisikulu.

² Lyene twamanya vino upinguzi wakwe Leza kuli yakacita ya viipe uwa cumi.

³ Lelo yame ndu kacita viipe nga ala ukupingula auzo pali vino nawe kwene ukacita, uzye ukwelenganya vino ulaleuka upinguzi wakwe Leza?

⁴ Nanti uzye ukasula kuvula kwa luse lwakwe Leza na vino akatutekela mwenzo? Uzye utamanyile vino Leza ali nu luse kunuli kuti akutungulule ku kuzenzuka?

⁵ Lelo wakoma umwenzo, nupya usyalonda kuzenzuka. Caleka ukaitulikila sile ukali wakwe Leza uno alalanga pa Wanda wa upinguzi wakwe wa cumi.

⁶ Pano Leza alalambula cila muntu kulingana ni milimo yakwe.

⁷ Antu aya nu mute wakucita visuma, ayano Leza alapeela umi wape umwaya lulumbi nu mucinzi.

⁸ Lelo antu akaitemwa, nu kukana kucita vya cumi akacita vino vitaine, yene yalazombola cipyu nu ukali wakwe Leza.

⁹ Ucuzi nu ulanda vilaponela antu yonsi akacita viipe, inkolelo ku Ayuda alino nu ku Akulukuwa kwene.

¹⁰ Lelo Leza alapeela lulumbi nu mucinzi ku antu yonsi akacita visuma, nga nu kuyapela mutende, inkolelo ku Ayuda alino nu ku Akulukuwa kwene.

¹¹ Pano Leza ataya na kasoozi.

¹² Pano Akulukuwa yatapilwe Masunde yakwe Mose, lelo yakaifya nu kulowa yakalowa nanti Masunde yatayakuma. Ayuda yene yapilwe Masunde nu kwifya yakaifya. Caleka Leza alayapingula kulingana na Masunde.

¹³ Pano kusi uku kuvwa sile Masunde ukukalenga kuti antu yaye aololoke pa manso yakwe Leza, lelo ukukucita vino Masunde yataka ukukalenga.

¹⁴ Pano Akulukuwa yatapilwe Masunde lelo mu mikalile yao ya civyalilwa lino yacita vino Masunde yataka, ala aisikulu yakulanga vino Masunde yaya mu myenzo yao nanti angala yatapilwe Masunde yakwe Mose.

¹⁵ Pano micitile yao ikulanga ukuti vino Masunde yakataka ivyalembwa mu myenzo yao. Ni myenzo yao kwene ikasininkizya ukuti vino Masunde yataka ivya cumi, pano limwi melenganyo yao yakayavunuka limwi yakayazumilizya mu kuluvyanya kwao.

¹⁶ Acino kulingana ni Landwe Lisuma lino nkakosola, avino cilaya na pa Wanda uno Leza alapingula antu kupitila muli Klistu Yesu pa vya nkama vyamu myenzo yao.

Ayuda na Masunde yakwe Mose

¹⁷ Uzye wemo cili uli? Wemuno ukayaama wemwisikulu uti wewe Muyuda. Wemo wemelela ku Masunde nu kuilumba ukuti wewe wakwe Leza.

¹⁸ Wemo wamanya cino Leza akalonda kuti wacita nupya wasambilila mu Masunde ukusola vilinzile kucitwa.

¹⁹ Wemo wasininkizya vino wewe katungulula wa mpafu, na vino wewe luswepo kuli yao ali mu mfinzi,

²⁰ mulangilizi wa viwelewele na kasambilizya wa antu atutu. Wemo wasininkizya ukuti mu Masunde mwaya ivya kupanda mano ni vya cumi vyonsi.

²¹ Uzye lyene wemo ungasambilizya umuzo uli lino usyaisambilizya wemwisikulu? Wemo ukakosola uti, “Utaiya” lino wemo ukaiya!

²² Wemo ukalesya yauze uti, “Mutalongozya.” Lelo uzye wemo usyalongozya? Wemo wapata tuluwi, lelo uzye usyaiya vya pa maleza?

²³ Wemo kuitumba pa kukwata Masunde yakwe Leza, lelo uzye usyaleta muzewanya kuli Leza pa kuntayela Masunde yakwe?

²⁴ Malembelo yakati, “Mwe Ayuda, mwemwe mwaleka kuti Akulukuwa yavwanga mazwi ya misuli kuli Leza.”

²⁵ Wemo ndi ukayela Masunde yakwe Leza ale kusilamulwa kwako kungakuzipila. Lelo ndi usyayela Masunde, ale kusilamulwa kwako ukwasilesile.

²⁶ Mukulukuwa wino atasilamulwa ndi akayela Masunde, uzye Leza wene atalamulola wa muntu wiya uwasilamulwa?

²⁷ Acino mwe Ayuda mulavunukwa nu muntu wensi atasilamulwa ku mwili, wino akayela Masunde yakwe Leza. Pano musyayela Masunde nanti angala mwasilamulwa ni sunde mukwetu.

²⁸ Pano Muyuda inkonko asi wiyo akaloleka wa Muyuda kunzi, wino wasilamulwa ku mwili.

²⁹ Lelo Muyuda inkonko umuntu uwaya Muyuda mu mwenzo wakwe, wino mwenzo wakwe wasilamulwa. Kuu, kuli kuomba kwakwe Mupasi Wamuzilo, asi kuomba kwa Masunde yano yalembwa. Umuntu wa musango uu, asi antu akamutasya, lelo Leza akamutasya.