Loma 13 - Amazwi Yakwe Leza 2013

Mwayela uteko

¹ Muntu wensi alinzile kuyela maka yakwe yakateeka, pano kutaya uteko utafuma kuli Leza. Mauteko yonsi akwe Leza, uwayasonta.

² Acino wino wensi uwatalamila uteko ulipo ala watalamila vino Leza wacita. Na wensi uwautalamila ala akuiletelela kupingulwa.

³ Antu akaifya ali yano yakaoopa maka ya uteko. Antu asuma akayela uteko yene yasyaoopa. Uzye ukulonda kuti utaoopa kateeka? Uwacita visuma nawe alakutaizya.

⁴ Kateeka wene umuomvi wakwe Leza, wino wasonta kuti aombela antu visuma. Acino ndi wacita ciipe lyene uye ni ntete pano kateeka akweti nsambu zya kukupingula. Wene umuomvi wakwe Leza uwapeelwa mulimo wakupingula yampula masunde.

⁵ Acino mulinzile kuyela yakateeka, asi pamulandu wa ukali wakwe Leza utupu lelo pamulandu wakuti myenzo inu ikamunena kucita cisuma.

⁶ Nupya uli mulandu uno mukasonkela ni misonko, pano yakateeka aomvi yakwe Leza. Na lyonsi lino yakufikilizya kuomba milimo yao ningo, ala yakuombela Leza.

⁷ Mupele uteko vyonsi vino muli nu kupeela, kuli kuti musonko wa mwili nu musonko wa vintu vino mwakwata, nupya mwafukila yakateeka yonsi nu kuyacindika.

Ukutemwana

⁸ Mutaya na nkongole ku muntu ali wensi suka sile kutemwana. Pano wino wensi uwatemwa umuze ala wayela vyalembwa mu mpapulo zyakwe Mose.

⁹ Pano mwaya Masunde wakwe yaa, “Utalongozya, utakoma, utaiya, utakumbwa vya muzo.” Masunde yaa yonsi pamwi nayauze asyala, yonsi yasintilila mwi sunde lyonga likati, “uwatemwa umuzo ndi vino waitemwa.”

¹⁰ Umwi ndi watemwa umuze ale wene atalamucitila ciipe. Caleka kutemwa kuli kuyela Masunde.

¹¹ Mulinzile kucita cii, pano mwati mumanya vino kasita kati kafika kakuti muzyuke mu tulo. Pano uwanda lino tulatuulwa wati upalama kuluta lino twatandike kutaila.

¹² Usiku uli pipi nu kusila, nu wanda uli pipi nu kuca. Caleka tute kucita milimo yamu mfinzi, tuzwale vya kulwila mu luswepo.

¹³ Caleka twapita ningo ndi vino antu yakacita musanya. Tutaya mu nsaka zya kuwowota nanti kuya akolesi, nanti kucita vya winyi, nanti ukakasi, nanti lwete, nanti uzuwa.

¹⁴ Lelo lekini Mwene Yesu Klistu aye pipi namwe wa visyangu vinu vino mukazwala. Tiini kusakamala musango wa untunze nu kuzanzya vilondwa vyauko.