Loma 12 - Amazwi Yakwe Leza 2013

Ivyakuombela Leza

¹ Caleka inane, pamulandu uno Leza watuyela mizu cuze, nkumupapata kuti mupele mili inu kunoli wa mpolelwa zya umi, nu kuipelesya mu kumuombela nu kumuzanzya. Kuu, kuli kupepa kwa cumi kuno mulinzile mwacita.

² Mutakolana na antu amu nsi mu miyele yao, lelo lekini Leza apindulule myenzo inu kuti myelenganyizizye inu iye ipya. Lyene mulaya na maka akumanya kulonda kwakwe Leza, mulamanya vintu visuma pamwi ni vikamuzanzya.

³ Pamulandu wa wila uno Leza wampeela mu cikuku cakwe, nkumunena mwensi kuti mutaikuzya kuluta vino mwaya. Lelo muye atekele mu kwelenganya nu kuipima mweisikulu kulingana ni cipimo ca utailo uno Leza wapela cila muntu.

⁴ Pano mwili waya ni vilundwa vingi, nga cila cilundwa cakwata mulimo uiyele.

⁵ Mu musango uli onga kwene avino naswe twaya mwili onga muli Klistu, nupya swensi twailundanya kuli cila wenga ndi vino mwili onga waya ni vilundwa vipusanepusane.

⁶ Acino lekini tuomvye mawila itu apusanepusane yano Leza watupeela mu cikuku cakwe. Ndi twapelwa uwila wa kukosola mazwi yakwe Leza, mu cumi tulinzile kucita vivyo kwene kulingana nu utailo uno tukweti.

⁷ Ndi twapelwa uwila wa kutumikila, mu cumi tulinzile kutumikila. Ndi twapelwa uwila wa kusambilizya, mu cumi tulinzile kusambilizya.

⁸ Ndi twapelwa uwila wa kukomelezya yauze, mu cumi tulinzile kuyakomelezya. Wino wensi akwankana na auze vintu vino akweti, mu cumi alinzile apeele kwaula kuitemwa. Wino wensi ali pa utunguluzi, mu cumi alinzile aombesye ningo. Wino wensi akucitila auze milimo ya luse, mu cumi alinzile acita ni nsansa.

⁹ Kutemwa kutayamo usomvi. Musule vintu viipe vyonsi. Lemasyini visuma vyonsi.

¹⁰ Mwatemwana cuze ndi vino aina Klistu yalinzile kutemwana, nupya mwacindikana.

¹¹ Mwaombesya pa kutumikila Mwene. Mutaya akasu Mwatumikila Mwene nu muzonda.

¹² Lekini upaalilo winu umuletele luzango. Tekini myenzo mu ntazi zinu, nga nu kupepa nsita zyonsi.

¹³ Mwakumbusuka aina inu yano yulilwa, nga nu kuzengela alendo mu mang'anda inu.

¹⁴ Pepini kuli Leza kuti apolelele yao akumuzunya. Endi, pepini kunoli kuti atayatipwila, lelo ayapolelele.

¹⁵ Muzange pamwi na yao akuzanga, losyini pamwi na yao akulosya.

¹⁶ Mwasakamalana, mutaitumika lelo mwazumila ukuombela na antu yasilesile. Mutailola kuya a mano.

¹⁷ Umwi ndi wamucitila ciipe, namwe mutamucitila ciipe. Ezyini kucita vintu vino antu yonsi yalola ukuti visuma.

¹⁸ Citini vyonsi vingacitwa pakuti mwikale mu mutende na antu onsi.

¹⁹ Mutalandula, mwe yacuza yane, lelo lekini Leza aliwe acite cilanduzi. Pano calembwa mu malembelo vino Leza wati, “Ndalandula, nupya ndayawezezya vicitwa vyao.”

²⁰ Lelo mu cifulo cakwe cico, ndi vino calembwa mu malembelo cati, “Mwanisi wako ndi uvwa inzala, mwimule. Ndi uvwa lusala, mupele manzi akumwa. Pano lino wacita vivyo ale wamulenga kuya ni nsonyi.”

²¹ Mutacimviwa ni nkota, lelo cimvini inkota pa kucita visuma.