Loma 11 - Amazwi Yakwe Leza 2013

Leza uwa luse ku ina Izlaeli

¹ Lyene nuzye, uzye Leza wafutatila antu yakwe? Awe, cumi kwene citangaya vivyo. Pano nani kwene nene mwina Izlaeli, wamu mupanda wakwe Abulaamu, nupya nene uwamu mutundu wakwe Benjamini.

² Leza atafutatila antu yakwe yano wasolwile kufuma ku utandiko wa uumbo. Uzye mutakwiusya vino calembwa mu malembelo ukuti Eliya wailizyanyizye kuli Leza pamulandu wa ina Izlaeli ati,

³ “Mwene yati yakoma yakasema yako nu konona tuvuwa twako. Nene sile nenga nsile nga nani yakulonda kunkoma.”

⁴ Uzye Leza wamwaswike ati uli? Watile, “Naisungila antu yane amazimbi cinimbali atatala yapepa Baali, leza kaluwi.”

⁵ Avino cili na ndakai. Apano yali yamwi aina Izlaeli yano Leza wasolola pamulandu wa cikuku cakwe.

⁶ Lelo wene wayasolwile pa kuya ni cikuku kunoyali asi pamulandu wa milimo yao ino yaomba. Pano ndi cili pa milimo, ale lyene cikuku cakwe cile cisi cikuku ca cumi.

⁷ Lyene, cili uli? Aina Izlaeli yatazanyile cino yalondanga. Impendwa sile inono yakwe yano Leza wasolwile acizanyile. Asyala yene ayakomya myenzo.

⁸ Ndi vino calembwa mu malembelo cati, “Leza wayapile myenzo ikome cakuti kufika ni lelo yaposiwa ukulola nanti ukuuvwa.”

⁹ Na Davidi wavwanga ati, “Lekini vimulo vyao viye ulukose lwakuyateya pakuti yapone nga yavunukwe.

¹⁰ Leka manso yao yandatilwe nakanda pakuti yatalola. Leka yapita yakutunduza ni visendo vya ucuzi wa manda onsi.”

¹¹ Lyene nkuuzya nti, uzye ukupempezyoka kwa Ayuda ukwakuti yapone kwaula kukatuka? Awe cumi kwene citangaya vivyo! Lelo pamulandu wa kwifya kwa Ayuda, kutuulwa kwaya ku Akulukuwa kuti Ayuda yayazuwila.

¹² Caleka kwifya nu kuposiwa kwa Ayuda ndi kwaleta muzano ku antu a mitundu yonsi ya pano nsi, lyene lino Ayuda yonsi asolwa yalayela Leza ale kupolelelwa kulavula.

Akulukuwa yalatuulwa

¹³ Nkuvwanga kunomuli ndakai mwe Akulukuwa. Nkuti vino nene mutumwa ku Akulukuwa namaikako mano nu kucindikisya mulimo wane.

¹⁴ Limwi mungaleka antu amu mutundu wane yuvwe uzuwa pakuti yamwi yatuulwe.

¹⁵ Leza wafutatile Ayuda nga pacisila awikizyanya na antu yauze muno nsi. Uzye cilaya uli lino alapokelela Ayuda nupya? Cumi cilaya wa kuzyukuka kufuma ku mfwa.

¹⁶ Pano ndi cimokolwa ca nkolelo ca mukate capeelwa kuli Leza, ale nu mukate onsi kwene uwakwakwe. Ndi misisi ya muti yapeelwa kuli Leza, ale ni misambo kwene iyakwakwe.

¹⁷ Misambo imwi ya muolivi uno antu yalema yene yaputulwa, nga pa viposi vya misambo iyo palematikwa misambo ya muolivi uwamu mpanga. Mwe Akulukuwa mukoline wa misambo ya muolivi uwamu mpanga ino yalematikweko, nga ndakai mwati mukumako kukupolelelwa kwakuya vilundwa ku Ayuda.

¹⁸ Caleka mutalinzile kusuula yao aputwilwe wa misambo ilya. Uzye pacani mungaitutumika? Mwemo mwemwe misambo. Mwemo musyatungilila misisi. Lelo misisi ikatungilila mwemwe.

¹⁹ Limwi mwemo mungati misambo ilya yaputwilwe pakuti mwemo mungikwa mu cifulo caiko.

²⁰ Cii ica cumi. Yene yaputwilwe pano yatataile. Lelo mwemo muli mu cifulo caiko pano mwataila. Acino mutaitumika pali cii. Lelo muye ni ntete.

²¹ Ndi Leza atacisile celelezi pa Ayuda, yao akoline wa misambo ya civyalilwa ya muti, uzye lyene atangacita cili conga kuli mwemwe?

²² Pali cii, twalola vino Leza uwa luse nupya umukali. Wene umukali ku antu yano akapona, lelo kuli mwemwe uwa luse ndi mwatwalilila mu vintu vikalenga kuti aye nu luse. Pano limwi namwe kwene mungaputulwa.

²³ Ayuda nao ndi yangazenzuka nu kutaila, yalaweziwa pa cifulo cino yalipo nkolelo. Pano Leza ali na maka yakuyawezya.

²⁴ Mwe Akulukuwa mukoline wa musambo wa muolivi uwamu mpanga uno waputulwa, nga lyene ulematikwa ku muolivi uwalemwa nu muntu. Ayuda nao yakoline wa muolivi uwalemwa nu muntu. Cili cangupale cuze kuti Leza alematike misambo ii iyaputulwa ku cimuti kuno yaputwilwe.

Leza akayela antu yonsi mizu

²⁵ Kuli nkama ya cumi, inane, ino nkasi mumanye kuti mutize mwaelenganya ukuti mwemwe yamano. Inkama iyakuti, ukukoma kwa myenzo ya ina Izlaeli kusi kwa manda pe, lelo kulatwalilila kufika pa nsita ino Akulukuwa yonsi asolwa iiza kuli Leza.

²⁶ Vii, ali vino aina Izlaeli yalatuulwa. Ndi vino calembwa mu malembelo cati, “Katuula alafuma mu Zioni nu kusisya ukakasi onsi kufuma pa vizikulula vyakwe Yakobo.

²⁷ Ndacita upangano uu nao, lino ndelela maifyo yao.”

²⁸ Pano yakana Ilandwe Lisuma, Ayuda yaya anisi yakwe Leza pamulandu wakwe mwemwe mwe Akulukuwa. Lelo pamulandu wakuti Leza uwayasolwile, Ayuda yene a yacuza yakwe pamulandu wa vikolwe vyao.

²⁹ Pano Leza asyasenuka pali wino wasolola nu kupolelela.

³⁰ Namwe mwe Akulukuwa, pa nsita imwi mutayelanga Leza. Lelo ndakai pano Ayuda yasyayela Leza, Leza wamuyela mizu.

³¹ Mu musango uli onga, pamulandu wakuti Leza watamuyela mizu, Ayuda nao yakana kuyela Leza, pakuti nao kwene Leza ayayele mizu.

³² Pano antu yonsi yaya akuntayela Leza, uli mulandu uno wayacita wa anyepwe. Lelo wene akacita cii, pakuti angayela antu yonsi mizu.

Paulo walumbanya Leza

³³ Lolini vino ukama wakwe Leza wavulisya! Na mano yakwe vino yavulisya nga nu kumanya vino wamanyikisya vintu. Uzye aweni angalondolola vino upinguzi wakwe waya? Uzye aweni angamanya vino akacita?

³⁴ Ndi vino calembwa mu malembelo cati, “Uzye aweni wamanya mano yakwe Leza? Uzye aweni angamupanda mano?

³⁵ Uzye aweni uwatala amupeela cimwi nawe amuwezezya?”

³⁶ Pano vintu vyonsi vyaumvilwe na aliwe, nupya vintu vyonsi vyacisilwe pamulandu na aliwe, lulumbi luye kunoli manda pe. Ameni.