Kufuma 8 - Amazwi Yakwe Leza 2013

Yacula

¹ Nupya Yawe anena Mose ati, “Pita ukanene Falao uti, Yawe wavwanga wati, ‘Ta antu yane yapita, pakuti yangampepa.

² Lelo ndi wakana kuti uyate yapite, namavunuka impanga yako yonsi kuti ilimbe na yacula.

³ Luzi lwa Nailo lumazula cuze na yacula cakuti yalafuma mu luzi nu kuya mwi isano lyako, mu muputule uno ukalala mwenemo, pa musanzi wako, mu mang'anda yakwe yacilolo yako, nu mu mang'anda ya antu yako, nga nu mu citofu cakupangila umukate nu mu viya vyakukandila umunya.

⁴ Yacula yalakutampukila nu kutampukila pa antu yako, nga na pali yacilolo yako yonsi.’ ”

⁵ Yawe anena Mose ati, “Nena Aaloni akonzolole ikasa lyakwe asonte intuwa yakwe pa nguzi, pa mifolo ya manzi, na pa viziya, nu kulenga kuti yacula yafume mu luzi yalimbe impanga yonsi ya Eguputo.”

⁶ Caleka Aaloni atoola intuwa akonzolola ikasa lyakwe pa manzi yonsi, na yacula iyafuma nga yalimba impanga yonsi ya Eguputo.

⁷ Lelo amamanyamano yeleuzya icili conga kwene kupitila mu malele yao, yalenga yacula ukufuma mu manzi iyaya ku mulundu.

⁸ Lyene Falao atuma akuya ama Mose na Aloni, ayanena ati, “Pepini kuli Yawe kuti asisye yacula, alino nani namaleka antu inu kuti yapite, pakuti yakapele impolelwa kuli Yawe.”

⁹ Mose aasuka ati, “Ningatemwa kukupepela. Uteyanye sile insita ino ningakupepela, impepele na yacilolo yako na antu yako kuti yacula yasisiwe. Kusi cula umwi alasyala suka sile mu Luzi lwa Nailo.”

¹⁰ Falao nawe aasuka ati, “Uce umpepelele mutondo.” Mose aasuka ati, “Ndacita wakwe vino walenga, alino lyene ulamanya ukuti kusi Leza muze ali wakwe Yawe, Leza witu.

¹¹ Yacula yalasisiwa pakasi kako, mu mang'anda inu, na pakasi kakwe yacilolo yako, na antu yako. Nupya kusi cula nanti umwi alasyala, suka sile mu Luzi lwa Nailo.”

¹² Lyene Mose na Aaloni yafuma mwi sano, yasya Falao. Nga Mose apepa kuli Yawe kuti afumye yacula yano walesile pali Falao.

¹³ Yawe acita ndi vino Mose walenzile kunoli, nga yacula ali mu mang'anda, mu misolo nu mu vyalo, iyafwa.

¹⁴ Nga aina Eguputo yayakolonganika mu mitumba ikulu, mpaka impanga yonsi ya Eguputo inunka iya na nuu.

¹⁵ Lelo lino Falao walola ukuti yacula yafwa, nupya kwene akoma umwenzo, wakwe vino Yawe wavwanzile ukuti Falao ataluvwa ku mazwi yakwe Mose na Aloni.

Inkufu

¹⁶ Alino Yawe anena Mose ati, “Nena Aaloni akonzolole ikasa lyakwe aume intuwa yakwe pa lutukumbu, lyene lukungu lonsi mu mpanga ya Eguputo lumaya inkufu.”

¹⁷ Caleka Aaloni auma pa lutukumbu ni intuwa yakwe, nu lukungu lonsi lwamu mpanga ya Eguputo lusanguka luya inkufu. Inkufu zikunga antu ni nyama kwene.

¹⁸ Lelo amamanyamano yezya kuomvya malele yao kuti kuye inkufu, lelo yaposiwa. Nga inkufu zyawile pa antu ni nyama kwene.

¹⁹ Alino amamanyamano yanena Falao yati, “Leza uwatacita cii!” Lelo Falao akoma umwenzo wakwe vino Yawe wavwanzile ukuti Falao ataluvwa ku mazwi yakwe Mose na Aloni.

Vizembele

²⁰ Nupya Yawe anena Mose ati, “Uce ulaye katondotondo, ukakomenkanye Falao lino akuya ku luzi umunene uti, Yawe wavwanga wati, ‘Ta antu yane yapita, pakuti yangampepa.

²¹ Nakusoka kuti ndi wakana, namakuvunuka, namalenga kuti vizembele viye panuli, pali yacilolo yako, nga na pa antu yako. Vizembele vilazula mu mang'anda ya ina Eguputo na pa musili kwene vilaya ivitupu.

²² Lelo lino vizembele viliza vitalacuzya antu yane yano akaikala mu mpanga ya Gosyeni. Ndacita cii kuti usininkizye ukuti, Nene, ne Yawe, nkuomba mu mpanga ya Eguputo.

²³ Ndalenga umanye ukuti pali upusano pa antu yane na antu yako. Cizungusyo cii cilacitika mutondo.’ ”

²⁴ Lyene Yawe acita wakwe vino Mose wanenyile Falao ukuti ali nu kucita. Kuya vizembele kwi isano lyakwe Falao nu mu mang'anda yakwe yacilolo yakwe. Impanga ya Eguputo yonsi iyononeka ku vizembele.

²⁵ Lyene Falao atuma akuya ama Mose na Aloni, nga ayanena ati, “Pitini mukapeele impolelwa kuli Leza winu, lelo mutafuma mu mpanga ya Eguputo.”

²⁶ Mose aasuka Falao ati, “Citangazipa kuti incite cico pamulandu wakuti cili icawinyi ku ina Eguputo lino tukupeela inyama zii wa mpolelwa kuli Yawe Leza witu. Ndi twaomvya inyama zii lino tukupeela impolelwa, na ina Eguputo yakutulola, lyene yalatutama na mawe mpaka imfwa.

²⁷ Tulinzile ukupita amanda yatatu mu lwanga ku kupeela impolelwa kuli Yawe Leza witu, ndi vino amatupeelanga ilamulo.”

²⁸ Falao nawe avwanga ati, “Namaleka mupite ku lwanga mukapeele impolelwa kuli Yawe, Leza winu, cikulu mutaya kutali. Nani mumpepele.”

²⁹ Mose aasuka ati, “Silola, zuwazuwa lino namafuma pano, namapepa kuli Yawe kuti mutondo vizembele vice visisiwe kunuli, kuli yacilolo yako, nga nu ku antu yako. Lelo utalinzile kutusomba nu kulesya antu kuti yapite ku kupeela impolelwa kuli Yawe.”

³⁰ Caleka Mose afuma kwi isano asya Falao, nga aya apepa kuli Yawe.

³¹ Yawe acita wakwe vino Mose walenzile. Vizembele visisiwa kuli Falao, kuli yacilolo yakwe, nga nu ku antu yakwe. Kutali cizembele nanti conga icasile.

³² Lelo ni ila kwene li, Falao akoma umwenzo nga nupya akana ukuta antu yapite.