Kufuma 6 - Amazwi Yakwe Leza 2013

¹ Lelo Yawe aasuka Mose ati, “Ndakai umalola vino namacita kuli Falao. Namamupatikizya ate antu yane yapite. Endi namamupatikizya kuti ayafumye mu mpanga yakwe.”

Leza waama Mose nupya

² Leza avwanga kuli Mose, amunena ati, “Nene Yawe.

³ Nalolike kuli Abulaamu, kuli Isaki, na kuli Yakobo wakwe Leza Wamaka yonsi. Lelo ntalenzile kuti imanyike kunoyali mwi zina lyane lyamuzilo, Yawe.

⁴ Nupya nacisile upangano wane nayo, injalaya kuyapeela impanga ya Kenani, impanga ino yatazile yikala mwenemo wa inamasi.

⁵ Kuluta pali cii, ndakai natinuvwa kuteta kwa ina Izlaeli, yano aina Eguputo yateeka uzya. Ntilila upangano wane kunoyali.

⁶ Caleka nena aina Izlaeli ukuti Yawe wavwanga wati, ‘Nene indi Yawe, nga ndamukulula ukufuma ku uzya wa milimo ikome ino aina Eguputo yamutwika. Ndaomvya maka yane nu kuvunuka aina Eguputo pakulu cuze. Nupya ndamutuula.

⁷ Ndamulenga ukuya antu yane, nga nani ndaya Leza winu. Lino ndamukulula ukufuma ku uzya wa milimo ikome, ino aina Eguputo yamutwika, lyene mulamanya ukuti Nene indi Yawe, Leza winu

⁸ Ndalenga kuti muye ku mpanga ino nalavile nu mulapo ukupeela kuli Abulaamu, kuli Isaki, na kuli Yakobo. Impanga ii, ilaya iyakwinu.’ ”

⁹ Mose anena aina Izlaeli vintu vii, lelo yene yakana kuvwa amazwi yakwe, pamulandu wakuti yalanga yatiyafita mpiti ku mwenzo pa milimo yao iya uzya.

¹⁰ Lyene Yawe anena Mose ati,

¹¹ “Pitanga, ukanene Falao umwene waku Eguputo ukuti alinzile kuta aina Izlaeli yafume mu mpanga yakwe.”

¹² Lelo Mose aasuka ati, “Ndi aina Izlaeli nayo kwene yatangayuvwe amazwi yane, uzye Falao wene anganguvwa? Mwine ntamanya kuvwanga ningo.”

¹³ Lelo Yawe apeela ilamulo kuli Mose na Aaloni ati, “Kanenini aina Izlaeli na Falao umwene waku Eguputo ukuti natimpeela ilamulo kunomuli kuti mutungulule aina Izlaeli ukufuma mu Eguputo.”

Vikolwe vyakwe Mose na Aloni

¹⁴ Lubeni iyeli lyakwe Yakobo wakweti ana yani aonsi. Pali Hanoki, Palu, Heziloni, na Kalimi. Yakwene ali vikolwe vya mitindu ino ikaamwa na mazina yao.

¹⁵ Simeoni wakweti ana aonsi mutanda. Pali Yemueli, Yamini, Oadi, Yakini, Zowali, na Syauli, umwana umonsi uwavilwe mu mwanaci mwina Kenani. Yakwene ali vikolwe vya mitundu ino ikaamwa na mazina yao.

¹⁶ Levi wakweti ana aonsi yatatu. Pali, Gelisyoni, Koati, na Melali. Yakwene ali vikolwe vya mitundu ino ikaamwa na mazina yao. Levi watenzi imyaka umwanda onga na makumi yatatu na cinimbali.

¹⁷ Gelisyoni wakweti ana yaili aonsi. Pali, Libini na Syimei, nga nayo yakweti amu mupanda avule.

¹⁸ Koati wakweti ana yani aonsi. Pali Amulamu, Izali, Hebuloni, na Uzieli. Koati watenzi imyaka umwanda onga na makumi yatatu na itatu.

¹⁹ Melali wakweti ana yaili aonsi. Pali Maali, na Musi. Yakwene ili mitundu yakwe Levi kulingana na mazina yao.

²⁰ Amulamu watwite Yokebedi, kaci wakwe isi, uwamuvyalile Aaloni na Mose. Amulamu watenzi imyaka umwanda onga na makumi yatatu na cinimbali.

²¹ Izali wakweti ana yatatu aonsi. Pali Kola, Nefegi na Zikili.

²² Uzieli nawe kwene wakweti ana yatatu aonsi. Pali Misyaeli, Elizafani, na Sitili.

²³ Aaloni watozile Elisyeba, umwana wa kaci wakwe Aminadabu, nupya uwali kaci wakwe Nasyoni. Wene wamuvyalile Nadabu, Abiu, Eleaza, na Itamali.

²⁴ Kola wakweti ana yatatu aonsi. Pali Asili, Elikana, na Abiasafu. Yakwene ali vikolwe vya mitundu ino iyapalukine mu mutundu wakwe Kola.

²⁵ Eleaza umwana umonsi wakwe Aloni, watwite umwana wenga uwamu ana yakaci yakwe Putieli, uwamuvyalile Pineasi. Yakwene ali vikolwe vya mitundu ino ikaamwa na mazina yao, mu mutundu wakwe Levi, uluko nu luko.

²⁶ Aaloni na Mose ali yano Yawe wavwanzile kunoyali ati, “Katungululini aina Izlaeli ukufuma mu Eguputo ukulingana ni mitundu yao.”

²⁷ Alio kwene yanenyile Falao umwene waku Eguputo ate aina Izlaeli yapite antungwa.

Yawe wapeela Ilamulo kuli Mose na Aloni

²⁸ Pa wanda uno Yawe wavwanzile kuli Mose mu Eguputo,

²⁹ wamunenyile ati, “Nene indi Yawe. Kanene Falao umwene waku Eguputo vyonsi vino namakunena.”

³⁰ Lelo Mose aasuka ati, “Wamanya ukuti ntamanya kuvwanga ningo. Uzye Falao wene anganguvwa?”