Kufuma 5 - Amazwi Yakwe Leza 2013

Mose na Aaloni yalolana na Falao

¹ Pacisila ca vintu vii, Mose na Aaloni yaya kwi sano kuli Falao nga yamunena yati, “Yawe, Leza wa ina Izlaeli, watavwanga ati, ‘Ta antu yane yapita, pakuti yangaya yakacite uzevyo wa cimulo ca kuncindika mu lwanga.’ ”

² Lelo Falao auzya ati, “Uzye Yawe aweni wakuti ninguvwa kunoli kuti inte aina Izlaeli yapite? Nemo ntamumanyile Yawe wiyo, nupya nkukunena vino ntalata aina Izlaeli yapite.”

³ Lyene Mose na Aaloni yaasuka yati, “Leza wa Ayebulai umwisikulu wataloleka kunotuli. Wemo ule utuzumilizye kuti tupite ulwendo lwa manda yatatu mu lwanga kuti tukapeele impolelwa kuli Yawe, Leza witu. Ndi tutangacita vii, alatukoma ni mpungo nanti nu lupanga.”

⁴ Lelo umwene waku Eguputo auzya Mose na Aaloni ati, “Uzye mwalozya mwi pakuleka antu yatazyele imilimo yao? Mwensi kwene pano swililini ku milimo inu!

⁵ Mwe ina Izlaeli mwatimuvula cuze mu mpendwa ukuluta aina Eguputo. Lyene we Mose na Aaloni mukulonda musye antu yatatwalilila ukuomba vwile!”

⁶ Lyene uwanda kwene ulya umwene wilya apeela ilamulo kuli yakangalila akalale aina Eguputo na kuli yakapitao aina Izlaeli ati,

⁷ “Mute ukupeela antu insaawa zino yakuomvya pa kutama injelwa. Muyaleke yaya yakuilondela aisikulu.

⁸ Lelo muleke yatama impendwa ya njelwa ilya kwene ino yakatama amanda yonsi, yatasya nanti longa. Antu yaa, akasu. Iciloleka ukuti yatakweti imilimo ivule yakuomba. Cikwene icati cilenga kuti yize yalukundilila kuti njate yapite ku kupeela impolelwa kuli Leza wao.

⁹ Mutayapeela umweko pa milimo, pakuti yatakwata kasita ka kuvwa vino yakuyatumpoka.”

¹⁰ Caleka yakangalila akalale aina Eguputo nga na yakapitao aina Izlaeli iyaya ku ina Izlaeli, nga yayanena yati, “Falao watavwanga ukuti atakutuma yamwi yamuletele insaawa.

¹¹ Watavwanga ukuti mweisikulu mulinzile mwaya mukuilondela insaawa kuli konsi kuno mungazizana. Lelo mulinzile mwatama impendwa ya njelwa ilya kwene ino mukatama lyonsi.”

¹² Caleka aina Izlaeli yonsi yasapalala konsikonsi mu Eguputo mukulonda insaawa.

¹³ Yakangalila akalale ya ina Eguputo yayakulizya yala yakuyanena ukumala kutama injelwa kulingana ni mpendwa ilya kwene ino yatamanga cila wanda, ndi vino yacitanga lino yayapeelanga insaawa.

¹⁴ Yakangalila akalale aina Eguputo iyatandika ukuuma yakapitao aina Izlaeli angalilanga auze pa milimo. Nga yayuzya yati, “Uzye pacani cino mwe ina Izlaeli mutakutama impendwa ya njelwa ilya kwene ino mwatamanga?”

¹⁵ Lyene yakapitao aina Izlaeli yiiza yailizyanya kuli Falao, yati, “Mwene wakwisaci, uzye pacani cino ukucita cii kunotuli swe aomvi yako?

¹⁶ Yasikutupela insaawa, nga lelo yacili yakutunena kuti twatama injelwa! Lola, ndakai swe aomvi yako tukuumwa. Mwene wakwisaci antu yako aliyo yaluvyanya.”

¹⁷ Lelo Falao ayaasuka ati, “Mutakulonda ukuomba, mwemwe yakasu. Cico kwene icikulenga kuti mwaiza kunondi nu kunganola kuti imuzumilizye ukupita nu kuyapeela impolelwa kuli Yawe.

¹⁸ Ndakai swililini ku kuomba imilimo. Mutakupelwanga insaawa, lelo mulinzile kutama impendwa ya njelwa ilya kwene ino mukatama lyonsi.”

¹⁹ Alino yakapitao aina Izlaeli iiluka ukuti yali mu ntazi lino yayanena ukuti yalinzile yatama impendwa ya njelwa ilya kwene ino yatamanga lyonsi.

²⁰ Lino yakapitao yalya yakufuma kwi sano iyazana Mose na Aaloni umu nzila ala yakuyalolela.

²¹ Nga yanena Mose na Aaloni yati, “Yawe watalola vino mwatimucita nupya alamuvunuka pakulenga Falao na yacilolo yakwe kuti yatupate. Vino mwatimucita cili wa kuyapeela lupanga mu minwe kuti yatukome.”

Mose wailizyanya kuli Yawe

²² Lyene Mose aya ku kupepa kuli Yawe, nga apepa ati, “Yawe, uzye pacani cino ukucuzya antu yako? Uzye pacani cino wantumile kuno?

²³ Pano ukufuma lino naile kuli Falao ku kumunena amazwi yako, Falao acili akucuzya antu yako. Lelo wemo utatala wacita nanti cimwi kuti uyakulule!”