Kufuma 40 - Amazwi Yakwe Leza 2013

Kwimika nu kupaatulwa kwi Taalu lya Ukongano

¹ Lyene Yawe anena Mose ati,

² “Pa wanda wakutandika uwa mwezi wakutandika, ukimike Itaalu lya Ukongano.

³ Mbokosi ya Upangano umuli amawe ya umboni uwike muno kwene, nupya Mbokosi ya Upangano iyo uivimbe ni nsalu pakuti uicingilile.

⁴ Mwi Taalu wikemo tebulo nga papela yi tebulo wikepo viombelo vyonsi, nupya wikemo cakutekapo inyali ni nyali zyakweco.

⁵ Lyene wike kavuwa kakwe zaabu ka kocelapo ubani ku nkolelo ya Mbokosi ya Upangano. Pa mulyango wi Taalu lyakwe Leza ukowekepo insalu zyakucingilikizya.

⁶ Wike kavuwa ka kupelelapo uwila wakoca pa mulyango ku nkolelo yi Taalu lya Ukongano.

⁷ Wike muyeza uwakufulalila pakasi ki Taalu lya Ukongano na kavuwa nga witilemo amanzi.

⁸ Upange umusolo kuzingulusya Itaalu, nu kukoweka insalu zyakucingilikizya pa mpongolo ya musolo.

⁹ “Pacisila cakwe vii utoole amafuta akusolwela nga upaatule Itaalu lyakwe Leza na vyonsi ivili mwenemo. Lyene limaya ilyamuzilo.

¹⁰ Lyene nupya upaatule na kavuwa ka kupelelapo uwila wakoca pamwi ni viombelo vyonsi vyakako. Kavuwa kako kamaya akamuzilo.

¹¹ Upaatule muyeza uwakufulalila pamwi ni citende cakwe mu musango uli onga kwene.

¹² “Pacisila cakwe vii wize na Aaloni pamwi na ana yakwe kwene aonsi pa mulyango wi Taalu lya Ukongano, nga uyaswefye.

¹³ Aaloni mumuzwike vyakuzwala vyamuzilo. Umupake amafuta nupya umupaatule, apakuti aye a simapepo wa kuntumikila nene.

¹⁴ Ana yakwe nayo kwene uyalete nga uyazwike malaya.

¹⁵ Lyene uyapake amafuta wakwe vino wapasile isi wao kuti yaye yasimapepo akuntumikila. Kupakwa amafuta kuko kulalenga kuti yaye yasimapepo pa nkulo ni nkulo.”

¹⁶ Mose acita vyonsi wakwe vino Yawe wamupeezile ilamulo.

¹⁷ Caleka pa wanda wakutandika uwa mwezi wakutandika mu mwaka wakwe ciili pacisila ca kufuma mu Eguputo, Itaalu lya Ukongano ilimikwa.

¹⁸ Pakwimika cifulo cici, Mose ateeka vikalilo pansi, alino akatusya amafulemu ayanyepelela ni mpanda zyakweco, nga akatusya ni ncesi zyakweco.

¹⁹ Pacisila cakwimika Itaalu papela alivimba ni cakuvimbila, nupya avimba nacuze cakuvimbila kunzi papelapela, wakwe vino Yawe wapeezile ilamulo.

²⁰ Lyene atoola vipampa vya mawe yaili ya masunde akoweka mu Mbokosi ya Upangano. Asomeka mipingilo mu vilemelo vya mbokosi, lyene aika ni ntupiko papela ya Mbokosi ya Upangano.

²¹ Lyene aika Mbokosi ya Upangano mu Cifulo Camuzilo, nga aika ni nsalu zyakucingilikizya. Mu musango kwene uu, acingilila Mbokosi ya Upangano wa umboni, wakwe vino Yawe wamupeezile ilamulo.

²² Lyene mwi Taalu lya Ukongano aikamo tebulo, lwaku katutu, kunzi ya nsalu yakucingilikizya.

²³ Lyene papela yakwe tebulo aikapo mukate, wakwe vino Yawe wamupeezile ilamulo.

²⁴ Mwi Taalu lya Ukongano mumwa aikamo cakutekapo ilampi, vilolesyanya ni tebulo lwaku kaeya ka Ncende Yamuzilo.

²⁵ Lyene pa cakutekapo inyali cici aikapo inyali kuti zyayaka pa manso yakwe Yawe, wakwe vino umwisikulu wapeezile ilamulo kuli Mose.

²⁶ Mwi Taalu lya Ukongano aikamo kavuwa kakwe zaabu, ku nkolelo ya nsalu ya kucinga,

²⁷ nga yafutikila ubani wa cinunkilo cisuma pa kavuwa, wakwe vino Yawe wapeezile ilamulo.

²⁸ Pa mulyango wa cifulo camuzilo aikapo insalu yakucingilikizya.

²⁹ Lyene aika kavuwa ka kupelelapo uwila wakoca pa mulyango wi Taalu lya Ukongano, nga apeelapo uwila wakoca nu wila wa cakulya, wakwe vino Yawe wapeezile ilamulo.

³⁰ Lyene aika muyeza uwakufulalila pakasi ki Taalu lya Ukongano na kavuwa, alino aitilamo amanzi yakufulala.

³¹ Alino Mose, Aaloni nga na ana yakwe aonsi yafulala makasa nga ni ngazo.

³² Nsita ili yonsi ndi yamaingila mwi Taalu lya Ukongano, nanti kuya ku kavuwa, yafulala, wakwe vino Yawe wapeezile ilamulo kuli Mose.

³³ Mose apanga musolo kuzinguluka Itaalu na kavuwa. Nupya aika insalu yakucingilikizya pa mpongolo ya musolo. Avino Mose wamalilile imilimo yonsi iyo.

Ikumbi pi Taalu lya Ukongano

³⁴ Lyene ikumbi livimba Itaalu lya Ukongano, nu luswepo luyengese lwakwe Yawe luyengesa mwi Taalu.

³⁵ Mose aposiwa kwingila mwi Taalu lya Ukongano pamulandu wakuti ikumbi lyali mumu kwene, nupya uluswepo luyengese lwakwe Yawe ala iluzuula mwi Taalu.

³⁶ Pa maulendo yao yonsi, ikumbi ndi lyasenka pi Taalu aina Izlaeli nayo iyatenuka yafuma pano yaali.

³⁷ Lelo ndi kumbi litasensile, aina Izlaeli nayo kwene yatangatenuka yafume papo. Lelo yalolela mpaka kufika pa wanda uno ikumbi lyasenka.

³⁸ Mu nsita ya kululumba kwao konsi, aina Izlaeli yalolanga ikumbi lyakwe Yawe papela yi Taalu mu nsita ya musanya, alino mu nsita ya usiku yalola umoto ukwaka papela yi Taalu.