Kufuma 4 - Amazwi Yakwe Leza 2013

Leza wapeela Mose maka akucita vizungusyo

¹ Lyene Mose aasuka Yawe ati, “Nga ndi aina Izlaeli yatantaile, yakana nu kuvwa vino ndayanena, ndi yavwanga yati, ‘Yawe atalolike kunuli.’ Uzye ndacita cani?”

² Caleka Yawe auzya Mose ati, “Uzye ulemile cani?” Nawe aasuka ati, “Ndemile intuwa.”

³ Yawe amunena ati, “Sumba intuwa pansi.” Lino Mose wasumba intuwa pansi isanguka inzoka, nga asempuka.

⁴ Lyene Yawe anena Mose ati, “Inama uleme inzoka ku musinda.” Caleka Mose ainama alema inzoka ku musinda nga lilyo kwene isanguka iya intuwa nupya.

⁵ Alino Yawe anena Mose ati, “Ukacite cii kuti aina Izlaeli yakasininkizye ukuti Yawe, Leza wa vikolwe vyao, Leza wakwe Abulaamu, Leza wakwe Isaki, na Leza wakwe Yakobo wataloleka kunuli.”

⁶ Nupya Yawe anena Mose ati, “Ingizya ikasa lyako mu mwingila wako.” Mose ayela ilamulo, lelo lino wafumya ikasa lyakwe mu mwingila azunguka pa kulola ukuti ikasa lyakwe ilyali nu ulwale, liloleka litiswe mpee wa mula.

⁷ Lyene Yawe anena Mose ati, “Ingizya ikasa lyako mu mwingila wako nupya.” Caleka Mose acita vivyo kwene. Nga lino Mose wafumyamo ikasa lyakwe nupya, alola ukuti lyatilipola, liya wa mwili wakwe onsi.

⁸ Yawe avwanga ati, “Ndi yatalakutaila nanti kusininkizya pa cizungusyo cankolelo ukuti nene nakutuma, lyene cizungusyo cii cene cilasininkizya kunoyali.

⁹ Pa vizungusyo vii vyoili napo kwene ndi yatalakutaila, nupya ndi yaca yakana kuvwa vino ulayanena, lyene uce usembe amanzi mu Luzi lwa Nailo nu kwita pansi. Amanzi yalasanguka uwazi.”

¹⁰ Lelo Mose anena Yawe ati, “Awe Yawe, utantuma. Nemo ntamanya kuvwanga ningo ukufuma mpiti, nanti aepa kwene pano utandikile kuvwanga nani. Lulimi lwane lwanyoma nupya nkatitisya.”

¹¹ Yawe auzya Mose ati, “Uzye aweni akapeela umuntu mulomo? Uzye aweni akalenga kuti umuntu aye ciulu nanti cipuuli? Uzye aweni akalenga kuti umuntu alola nanti aye impafu? Uzye asi anene ne Yawe?

¹² Acino ndakai pitanga! Ndalenga kuti uvwange nupya ndakunena ivyakuvwanga.”

¹³ Lelo Mose aasuka ati, “Awe Yawe, napapata tuma umuntu muze.”

¹⁴ Lino Yawe uvwa kuvwanga kwakwe Mose, asoka nga avwanga ati, “Uzye fwandi ukwelenganya uli pa munyonko Aloni, Mwinalevi? Manyile ukuti wene angavwanga ningo. Endi, wene ali munzila akwiza ndakai ku kukukomenkanya, nga alazanga wakwe cimwi pa kukulola.

¹⁵ Uce uvwange kunoli umunene ivyakuvwanga. Mweili kwene ndalenga kuti muvwange, nupya ndamunena vyakucita.

¹⁶ Aaloni alaakuvwangila ku antu mu cifulo cako. Wemo kunoli ulaya wakwe Leza, ule ukumunena ivyakuvwanga.

¹⁷ Senda intuwa ii, pano ali ino ulaomvya pa kucita vizungusyo.”

Mose waswilila ku Eguputo

¹⁸ Pacisila cakwe vii Mose aswilila kuli Yetulo, sivyala, nga amunena ati, “Napapata nzumilizye nswilile ku akazi kane ku Eguputo kuti nkalole ndi yali mutende.” Yetulo amuzumilizya nga amupakasya nu kuti apite mutende.

¹⁹ Lino Mose acili mu mpanga ya Midyani, Yawe amunena ati, “Swilila ku Eguputo, pano yano yonsi alondanga ku kukoma yatiyafwa.”

²⁰ Caleka Mose atoola umuci na ana yakwe aonsi, ayakwezya pali punda, nga yonsi pamwi yakatuka ulwendo lwakuswilila ku Eguputo, ala asenzile intuwa ino Leza wamunenyile kusenda.

²¹ Nupya kwene Yawe anena Mose ati, “Ndakai lino ukuswilila ku Eguputo, ukasininkizye ukuti wacita pa manso yakwe Falao vizungusyo vyonsi vino nakupeela maka kuti ucite. Lelo ndalenga kuti Falao akome umwenzo nupya atalaleka antu yapite.

²² Lyene ulinzile ukuyanena Falao ukuti Nene, ne Yawe navwanga nati, ‘Izlaeli umwana wane umonsi iyeli.

²³ Nakunenyile ukunena umwana wane umonsi iyeli apite pakuti angampepa, lelo wemo wakanyile. Cisuma! Ndakai namakoma umwana wako umonsi nupya iyeli.’ ”

²⁴ Pacisila cakwe vii, Yawe akomenkanya Mose pa cifulo pano yaizi uwanda onga lino yayanga ku Eguputo. Lyene Yawe alonda kuti akome Mose.

²⁵ Lelo Zipola umuci wakwe Mose atoola iwe likalipe, asilamula umwana wakwe umonsi. Alino atoola inkowa ya usilamu aikumya ku vyanzwalo vyakwe Mose. Alino Zipola avwanga ati, “We Mose pamulandu wakuti nazwisya uwazi, cumi lyene wemo waya wakazi kane kupitila mu utwazi.”

²⁶ Caleka Yawe atakomile Mose.

²⁷ Pa nsita kwene ilya Yawe alanga wanena Aaloni ati, “Pita mu lwanga ku kukomenkanya Mose.” Caleka Aaloni apita, nga akomenkanya Mose pa mwamba wakwe Leza, nga amutonsola.

²⁸ Lyene Mose anena Aaloni vyonsi vino Yawe wavwanzile lino wamunenyile kuswilila ku Eguputo. Amulondolwela ni vizungusyo vino Yawe wamupeezile ilamulo kuti avicite.

²⁹ Caleka Mose na Aaloni iyaya ku mpanga ya Eguputo, nga yakonganika intunguluzi zyonsi zya ina Izlaeli pamwi.

³⁰ Aaloni nawe anena intunguluzi zizi vyonsi vino Yawe wanenyile Mose. Lyene Mose nawe acita vizungusyo vivi vyonsi pa manso ya antu.

³¹ Lino antu yalola vizungusyo vii iyataila. Nupya lino yuvwa ukuti Yawe wataiza kunoyali, nu kuti watalola vino yakuyasunga mu kukalala, iyafukama pansi yafupime, nga yapepa Yawe.