Kufuma 39 - Amazwi Yakwe Leza 2013

Kupanga vyakuzwala vyakwe yasimapepo

¹ Lyene yapanga vyakuzwala vyakwe pamba vya cifungo, viyenzulukile ni viyenzu vyakwe yasimapepo vipikulwe, vyakuzwala lino yakutumikila mu Ncende Yamuzilo. Yapanga ni vyakuzwala vyamuzilo vyakwe Aaloni wakwe vino Yawe wapeezile ilamulo kuli Mose.

² Yapanga cakuzwala ca efodi ni nsalu yakwe zaabu, ya cifungo, iyenzulukile ni iyenzu nga na yakwe bafuta mutelepe nupya mupangwe ningo.

³ Yasula zaabu, yamupapatalika, nga yaputolaputola tumpilinsya mpilinsya tuto uti uusavu kuti yatupikwile kumwi na pamba wa cifungo, muyenzulukile nu muyenzu nga na wakwe bafuta mutelepe nupya mupangwe ningo.

⁴ Lyene yapanga tumakwelelo twapa viye twa cakuzwala ca efodi, yatulundinkanya ku mbali ziili zya cakuzwala kwene cii.

⁵ Nupya paali nu musipi, uuluke usaka, wakunyepela efodi, walukilwe kuli kumwi ni cakuzwala ca efodi, iciya icintu conga. Musipi uwo nao kwene wali wa nsalu yakwe zaabu, ni nsalu ya cifungo, iyenzulukile, ni iyenzu nga na bafuta mutelepe nupya mupangwe ningo, wakwe vino Yawe wapeezile ilamulo kuli Mose.

⁶ Lyene yateyanya amawe ya onikisi, nga yika amawe yaa mu vyakwikamo vyakwe zaabu. Alino yalemba wakwe vino yamusyanyi yakalemba pa mawe amutengo, yalemba ningo ningo mazina yonsi ya ana aonsi yakwe Izlaeli.

⁷ Alino yayanyepelela ku tumakwelelo twapa viye pa cakuzwala ca efodi, pakuti mazina yaa yaye ciusizyo ca ana aonsi yakwe Izlaeli, wakwe vino Yawe wapeezile ilamulo kuli Mose.

Kupanga cakuzwala ca pacisao

⁸ Pacisila cakwe vii yapanga cakuzwala ca pacisao nu usaka cuze, wakwe vino yapanzile cakuzwala ca efodi. Yacipanga ni nsalu yakwe zaabu, ni nsalu ya cifungo, iyenzulukile, iyenzu nga na yakwe bafuta mutelepe nupya mupangwe ningo.

⁹ Cali icili conga mu mbali zyonsi. Mu utali wa cakuzwala ca pacisao mwali masentimita 22, mu wipi namo mwali masentimita 22, nupya cali cipetwe lili.

¹⁰ Lyene yatantikapo milongo ini ya mawe amutengo ukulu. Pa mulongo wakutandika yika amawe yakwe lubi, topazi na belulo.

¹¹ Pa mulongo wakwe ciili yika amawe yakwe emalodi, safilo na daimondi.

¹² Pa mulongo wakwe citatu yika amawe yakwe asinti, agate na ametusto.

¹³ Lyene pa mulongo wakwe cini yika amawe yakwe belulo, onikisi na yaspele. Amawe yaa yaika mu vyakwikamo vyakwe zaabu.

¹⁴ Pali amawe ikumi na yaili yano yalemvilepo mazina ya mitundu ya ina Izlaeli. Amawe ikumi na yaili yalemvilwe wakwe vino yamusyanyi yakalemba pa mawe amutengo nupya cila iwe lyali ni zina lya mutundu onga.

¹⁵ Yapanga tuminyololo twa cakuzwala ca pacisao twakwe zaabu musuma cuze, tupyatwe usaka ngati umwando.

¹⁶ Yapanga vyakwikamo viili vyakwe zaabu, ni vilemelo viili vyakwe zaabu, alino yanyepelela vilemelo vivyo viili ku masempele ku nkolelo ya cakuzwala ca pacisao.

¹⁷ Lyene imyando iili yakwe zaabu, iyailundinkanya ku vilemelo viili vivi.

¹⁸ Mpela ya myando iili yainyepa ku vyakwikamo. Vii avino yatulundinkinye ku tumakwelelo twapa viye twa cakuzwala ca efodi.

¹⁹ Lyene yapanga tumipeto twiili twakwe zaabu alino yatunyepelela ku mpela ya mbali ziili zya cakuzwala ca pacisao, kwi sempele lwa mukasi ya cakuzwala cico, pipi ni cakuzwala ca efodi.

²⁰ Nupya yapanga tumipeto twiili twakwe zaabu yatulundinkanya ku nkolelo lwa mwisika ya tumakwelelo twapa viye twa cakuzwala ca efodi, pipi nu musumo, papela ya musipi uno wapikulwa usaka, wa cakuzwala cakwe efodi.

²¹ Lyene yalundinkanya cakuzwala ca pacisao nu tumipeto twaciko ku tumipeto twa vilemelo vya cakuzwala ca pacisao ku vilemelo vya cakuzwala ca efodi. Yalundinkinye na kamwando ka cifungo pakuti cakuzwala ca pacisao caikala papela ya musipi uno wapikulwa usaka, wa cakuzwala ca efodi, nupya utasapuka, wakwe vino Yawe wapeezile ilamulo kuli Mose.

Yapanga vyakuzwala vyuze vyakwe yasimapepo

²² Wapanzile nu mwingila wa nsalu yakwe pamba wa cifungo, wakuzwala mwisika ya cakuzwala ca efodi.

²³ Mwingila wali ni cipongo pa kupisya umutwe, cipongo cakoline ni cipongo cilaya. Mu mbali ya cipongo mwali musumilile ningo kuzingulusya monsi pakuti mwingila uwo utalepuka.

²⁴ Pa cikonze ca pisika pansi ya mwingila yapanga iviseekwa vya pomegeleneti, vya nsalu yakwe pamba ya cifungo, iyenzulukile, iyenzu nga na yakwe bafuta mutelepe nupya mupangwe ningo.

²⁵ Nupya yapanzile inyenjele zyakwe zaabu musuma cuze. Inyenjele iyaziika pakasi ka cila cintu cikoline ni viseekwa vya pomegeleneti kuzingulusya cikonze ca pansi ya mwingila.

²⁶ Lyene yapanzile vikoline ni nyenjele ni vikoline ni ciseekwa ca pomegeleneti, nga yika cila nyenjele ukulondenkanya pali cila pomegeleneti, kuzingulusya cikonze consi ca pansi mwisika ya mwingila, uno yasimapepo yazwalanga pa kuomba mulimo wa usimapepo, wakwe vino Yawe wapeezile ilamulo kuli Mose.

²⁷ Lyene Aaloni na ana yakwe yayapangile malaya yakwe bafuta,

²⁸ alino yayapangile na tulibani ni cisote ca ucindami na yakaputula, vyonsi vivyo vyapanzilwe ni nsalu yakwe bafuta mutelepe nupya mupangwe ningo.

²⁹ Nupya yayapangile citambala cakuzwala mu nsingo ni nsalu yakwe bafuta mutelepe nupya mupangwe ningo nga ni nsalu yakwe pamba wa cifungo, iyenzulukile, iyenzu nga na yakwe bafuta mutelepe nupya mupangwe ningo, yaciyemvya ni vipikolezye, wakwe vino Yawe wapeezile ilamulo kuli Mose.

³⁰ Lyene yapanga ingala yakwe zaabu musuma cuze. Ingala kwene ii yali cimanyililo camuzilo, nupya yalembapo wakwe vino musyanyi akalemba pa vyela amazwi yakuti, “Camuzilo kuli Yawe.”

³¹ Lyene yatoola kanyepelo ka nsalu ya cifungo, yanyepelela ingala kwene iyo kuli tulibani, wakwe vino Yawe wapeezile ilamulo kuli Mose.

Kumalila kwa mulimo

³² Vii avino imilimo yonsi yakukuula Itaalu lya Ukongano yasizile. Aina Izlaeli iyacita vyonsi wakwe vino Yawe wapeezile ilamulo kuli Mose.

³³ Pacisila cakwe vii, yaleta vyonsi kuli Mose. Itaalu ilyali nu kuya ng'anda yakwe Leza, pamwi ni viombelo vyonsi vya mwi Taalu, tukoweko twaliko, amafulemu yaliko, mpanda zyaliko, ncesi zyaliko, nga ni vikalilo vyonsi kwene.

³⁴ Nupya yaleta cakuvimbila ca mukwela wa mfwele civumvunye mwi langi liyenzu, cakuvimbila ca mukwela wa mbuzi, insalu zyakucingilikizya,

³⁵ Mbokosi ya Upangano pamwi ni vimuti vyakweyo, alino ni ntupiko ya Mbokosi ya Upangano.

³⁶ Nupya kwene yaleta tebulo pamwi ni viombelo vyaliko, nga yika penepo umukate uwapeelwa kuli Leza,

³⁷ cakutekapo ilampi cakwe zaabu musuma cuze, inyali ni viombelo vyakwezyo,

³⁸ kavuwa kakwe zaabu, amafuta akusolwela, ubani wa cinunkilo cisuma, insalu yakucingilikizya pa mulyango wi Taalu.

³⁹ Yaleta na kavuwa ka mukuwa pamwi nu lwangayo lwa mukuwa lupikolezye, mipingilo pamwi ni viombelo vyonsi vyakako, na muyeza uwakufulalila pamwi ni citende cakwe.

⁴⁰ Yaleta insalu zyakucingilikizya musolo pamwi ni ncesi ni vikalilo vyakwezyo, insalu yakucingilikizya pa mpongolo ya musolo pamwi ni myando ni mpopo zyaiko, nupya yaleta viombelo vyonsi vya kuomvya mwi Taalu lyakwe Yawe.

⁴¹ Nupya yaleta vyakuzwala vipikulwe vyakuzwala yasimapepo akutumikila mu Ncende Yamuzilo, nga ni vyakuzwala vyamuzilo vyakwe Aaloni simapepo, alino ni vyakuzwala vya ana yakwe aonsi vino yalinzile kuzwala pa kuomba imilimo ya usimapepo.

⁴² Caleka aina Izlaeli yaomba imilimo yonsi wakwe vino Yawe wapeezile ilamulo kuli Mose.

⁴³ Lyene Mose aceceta vyonsi vino vyapanzilwe nga lyene asininkizya ukuti iyavipanga wakwe vino Yawe wapeezile ilamulo. Lilyo kwene Mose apolelela antu onsi.