Kufuma 38 - Amazwi Yakwe Leza 2013

Kupanga kavuwa ka kupelelapo uwila wakoca

¹ Pacisila cakwe vii, yapanga kavuwa ka kupelelapo uwila wakoca ka mbao zya muti wa akasya. Kali kalingane mbali zyonsi zini. Mu utali wa kavuwa mwali amamita 2 na masentimita 20. Mu wipi mwali cili cimwi, amamita 2 na masentimita 20. Ciimo ca kavuwa cali mita wenga na masentimita 30.

² Yapanga vikozile mpembe papela ya matungi yani ku kavuwa, impembe na kavuwa viya icintu conga. Alino kavuwa konsi yakengelela nu mukuwa.

³ Nupya viombelo vyonsi vya kavuwa yavipanga nu mukuwa, ukuli kuti vyakuponelamo itwi, yafosyolo, ingeso zya kukanyizizya, yafoloko akulu alino na malwangayo akupalilapo umoto.

⁴ Lyene yapanga cililata ca mukuwa ca kavuwa, cipikule wisumbo, pisika ya mpela yakako. Lyene yaciika mwisika ya lung'umba lwa kavuwa kuti cifike pakasi na pakasi ka kavuwa.

⁵ Yapanga vilemelo vini, alino yavilundinkanya ku matungi yani a lwangayo lwa mukuwa lupikolezye kuti yasomeke mipingilo.

⁶ Yapanga mipingilo ya muti wa akasya, yayengelela nu mukuwa.

⁷ Lyene pa kupinga kavuwa kaka yasomekanga mipingilo mu vilemelo vyamu mbali zyoili zya kavuwa. Kavuwa kapanzilwe ni mbao nupya yakafonsya mukasi.

Yapanga muyeza wa mukuwa

⁸ Lyene yapanga muyeza wa mukuwa uwakufulalila, pamwi ni citende cakwe ukufuma ku vilola vya anaci yano yatumikilanga pa mulyango wi Taalu lya Ukongano kuno Yawe wakomenkananga na antu yakwe.

Musolo wi Taalu lya Ukongano

⁹ Lyene yapanga musolo wi Taalu. Insalu zyakucingilikizya musolo uwo lwaku kaeya ka musolo zyali zyakwe bafuta mutelepe nupya mupangwe ningo, nupya mu utali wa nsalu mwali amamita 44.

¹⁰ Ncesi zyaziko zyali amakumi yaili ni vikalilo vya ncesi navyo vyali amakumi yaili, vyonsi vyali vya mukuwa. Lelo tukowelo twaku ncesi pamwi ni ncesi vyali vyakwe siluva.

¹¹ Ku ntunga yaku katutu kwali insalu zyakucingilikizya, mu utali wa nsalu mwali amamita 44, ni ncesi amakumi yaili, ni vikalilo vya ncesi navyo vyali amakumi yaili, vyonsi vyali vya mukuwa. Lelo tukowelo twaku ncesi pamwi ni ncesi vyali vyakwe siluva.

¹² Ku ntunga yaku uwondaka kwali insalu zyakucingilikizya, mu utali wa nsalu mwali amamita 22, ni ncesi nazyo zyali ikumi nga ni vikalilo navyo ikumi. Tukowelo pamwi ni ncesi vyali vyakwe siluva.

¹³ Ku ntunga ya ufumondaka kuno kuli mpongolo nako kwene kwali insalu yakucingilikizya, mu utali wa nsalu mwali amamita 22.

¹⁴ Ku mbali yonga ya mpongolo kwali insalu zyakucingilikizya, nu mu utali wa nsalu mwali amamita 6 na masentimita 60, nga pali ncesi zitatu ni vikalilo vya ncesi vitatu.

¹⁵ Pa mbali yuze napo kwene pali cili conga kwene. Pali insalu zyakucingilikizya, mu utali wa nsalu mwali amamita 6 na masentimita 60, nga pali ncesi zitatu ni vikalilo vya ncesi vitatu.

¹⁶ Insalu zyonsi zyakucingilikizya kuzinguluka musolo zyali zyakwe bafuta mutelepe nupya mupangwe ningo.

¹⁷ Vikalilo vya ncesi vyapangilwe nu mukuwa. Lelo tukowelo twa ku ncesi nga ni vyakulundinkanyizizya incesi, nga ni nsongo zya ncesi vyonsi vyali vyakwe siluva.

¹⁸ Insalu yakucingilikizya pa mpongolo ya musolo ulya yayemviwe ni vipikolezye vya cifungo, viyenzulukile, viyenzu nga na vyakwe bafuta mutelepe nupya mupangwe ningo. Mu utali wa nsalu mwali amamita 9, ciimo ca nsalu cali amamita 2, wa nsalu zyakucingilikizya umusolo.

¹⁹ Insalu zizi yazikoweka ku vimuti vini ivyakweti ni vikalilo vino vyapangilwa nu mukuwa. Tukowelo twa ku vimuti, ni vyakwika papela ya vimuti nga ni mpanda, vyonsi vyali vyakwe siluva.

²⁰ Lelo impopo zi Taalu lyakwe Yawe nga ni mpopo zya nsalu zyakucingilikizyaa umusolo, zyonsi zyali zya mukuwa.

Viombelo vya vyela vyakuomvya mwi Taalu

²¹ Ii, iili mpendwa yakwe zaabu, siluva, nu mukuwa vino yaombile imilimo mwi Taalu lyakwe Yawe, mumo muno vipampa vya mawe apalemvilwe Masunde vyasungwa wakwe vino Mose wapeezile ilamulo. Aina Levi ali yano yali nu ulasi wa kuvipenda, nupya uwayatungululanga a Itamali umwana wakwe Aaloni simapepo.

²² Lyene Bezalele umwana wakwe Uli, mwizikulu wakwe Huli uwamu mutundu wakwe Yuda apanga vyonsi vino Yawe wapeezile ilamulo kuli Mose kuti apange.

²³ Kaazwa wakwe a Ooliyabu, umwana wakwe Aisamaki, uwamu mutundu wakwe Dani, uwamanyile kulemba wakwe vino yamusyanyi yakalemba pa mawe amutengo, kulemba mapulani, kupanga insalu zyakupikula, zyakwe pamba wa cifungo, muyenzulukile nu muyenzu, nga ni nsalu yakwe bafuta mutelepe nupya mupangwe ningo.

²⁴ Zaabu wensi wino yaomvizye pakupanga Itaalu lyamuzilo wali a zaabu wino antu yapile ukufuma pa wila wa kuswelula, nupya wanyomile makilogalamu izimbi lyonga, kulondela cipimilo caku ng'anda yakwe Leza.

²⁵ Na siluva ukufuma kwi uvi lyonsi lya antu wanyomile makilogalamu 3,430, kulondela cipimilo caku ng'anda yakwe Leza.

²⁶ Muntu ali wensi wapeezile beka wenga (kuli kuti magalamu mutanda kulondela cipimilo caku Ng'anda ikulu yakwe Leza.) Antu yonsi alemvilwe mu kupendwa yali 603,550 aonsi yatupu a myaka amakumi yaili nanti ukuluta.

²⁷ Siluva munyome makilogalamu 3, 400 yapangile vikalilo umwanda onga vya mwi Taalu lyamuzilo ni vya nsalu yakucingilikizya. Cikalilo icili consi capangilwe na siluva munyome makilogalamu 34.

²⁸ Makilogalamu asyala amakumi yatatu iyaomvya pa kupanga tukowelo twa pa vimuti, nu kwengelela ku nsongo ya vimuti, nga nu kupangila cakuvimba nsongo zizyo.

²⁹ Mukuwa uno yapeezile ukufuma pa wila wakuswelula onsi pamwi walingine makilogalamu 2, 425.

³⁰ Lyene yatoola mukuwa kwene uwo yapanga vikalilo vyapa mulyango wi Taalu lya Ukongano. Nupya yapanga kavuwa ka mpolelwa nga nu lwangayo lwa mukuwa lupikolezye pamwi ni viombelo vyonsi vyakako,

³¹ vikalilo vya ncesi zya musolo onsi kuzinguluka ni vyapa mpongolo. Alino ni mpopo zyonsi zi Taalu lyakwe Yawe ni zya musolo onsi kuzinguluka.