Kufuma 37 - Amazwi Yakwe Leza 2013

Mipangile ya Mbokosi ya Upangano

¹ Pacisila cakwe vii, Bezalele apanga Mbokosi ya Upangano ni mbao zya muti wa akasya. Mu utali mwali masentimita 110, mu wipi namo mwali masentimita 66, ciimo ca Mbokosi ya Upangano naco ciye masentimita 66.

² Lyene Mbokosi ya Upangano yonsi aipomela na zaabu musuma cuze, mukasi nu kunzi kwene, nupya yika musipi wakwe zaabu kuzingulusya Mbokosi ya Upangano yonsi.

³ Apanga mipeto ini yakwe zaabu yakunyemwila nga ainyepelelela ku makulu yani ya Mbokosi ya Upangano, kumwi ni mipeto iili ku mbali yonga nu ku mbali yuze iili.

⁴ Apanga mipingilo ini ya mbao zya muti wa akasya, alino ayengelela na zaabu.

⁵ Lyene mipingilo iyo aisomeka mu vilemelo vivi, mu mbali zyoiili zya Mbokosi ya Upangano.

⁶ Nupya apanga ntupiko yakwe zaabu musuma cuze. Mu utali wa ntupiko mwali masentimita 110, mu wipi namo mwali masentimita 66.

⁷ Ku mpela zya ntupiko apanga yakelubi yaili yakwe zaabu musule,

⁸ kelubi umwi ku nu muze ku. Yakelubi yayo ayapangila kumwi ni ntupiko.

⁹ Maapa yakwe yakelubi ayavungulwila papela ya ntupiko, yavimba ntupiko ya Mbokosi ya Upangano. Yakelubi yalolenkine aisikulu, ni vinso vyao vilola pa ntupiko ya Mbokosi ya Upangano.

Mipangile yakwe Tebulo wa mukate wamuzilo

¹⁰ Nupya Bezalele apanga tebulo wa mbao zya muti wa akasya, mu utali wakwe tebulo mwali masentimita 88, mu wipi namo mwali masentimita 44, lyene ciimo cakwe tebulo cali masentimita 66.

¹¹ Lyene amupomela na zaabu musuma cuze, nupya aika musipi wakwe zaabu kuzingulusya tebulo.

¹² Lyene apanga fulemu kuzingulusya tebulo, mu wipi amamilimita 75 nupya apanga kayembelo kakwe zaabu kuzingulusya fulemu lilyo.

¹³ Lyene apanga mipeto ini yakwe zaabu nga aipampamila ku vinkonci vini ulunga na makulu yakwe tebulo.

¹⁴ Mipeto yakusomekamo mipingilo yakupingila tebulo yisilwe pipi ni fulemu.

¹⁵ Apanga mipingilo ya mbao zya muti wa akasya yakupingila tebulo, nga aengelela na zaabu.

¹⁶ Nupya apanga viya vyakwe zaabu musuma cuze vya pi tebulo lilyo ivili wa mbale, imbakuli ni ngeso, vya kuombela imilimo pa kupeela amawila ya vyakumwa.

Yapanga cakutekapo ilampi

¹⁷ Pacisila cakwe vii, yapanga cakutekapo ilampi cakwe zaabu musuma cuze. Cikalilo nga nu mulundi wakweco wali wakwe zaabu, nupya vyonsi vyali visule ni nondo. Ingako, kuli kuti intombo nu tumapambo, na maluwa, yavipanzile viya icintu conga cakweco.

¹⁸ Mu mbali zyoili mwali misambo mutanda, ku mbali yonga misambo itatu nu ku yuze itatu.

¹⁹ Cila musambo pa misambo mutanda wakweti maluwa yatatu apangwa wa maluwa ya muti uwakolana na makole, yali ni ntombo na maluwa yakwezyo. Ku musambo uze nako kwene kuye viyembo vitatu vyapangwa na maluwa ya muti uwakolana na makole. Kuye ni ntombo nu tumapambo. Misambo yonsi mutanda iya cakutekapo ilampi iye vivyo kwene.

²⁰ Pa cakutekapo ilampi pali ngako zini, kuli kuti intombo nu tumapambo, tukolane na maluwa ya muti uwakolana na makole. Kwali ni ntombo nu tumapambo.

²¹ Pali lutombo longa mwisika ya cila misambo iili pa misambo yonsi mutanda iyatambilile ukufuma pa cakutekapo ilampi.

²² Intombo pamwi ni misambo ilya vyapangilwe kumwi ni cakutekapo ilampi. Consi cali icintu conga cakwe zaabu musuma cuze musule.

²³ Lyene apanga malampi cinimbali yapa cakutekapo ilampi, nupya apanga lumano nga ni vyakuzyolela itwi vyakwe zaabu musuma cuze.

²⁴ Pa kupanga cakutekapo ilampi pamwi ni viombelo vyakweco vyonsi yaomvizye makilogalamu amakumi yatatu na yasano yakwe zaabu musuma cuze.

Yapanga kavuwa kakocelapo ubani

²⁵ Kavuwa kakocelapo ubani yakapanga ni mbao zya muti wa akasya. Kali akalingane mbali zyonsi, mu utali wa kavuwa kali masentimita 45. Mu wipi namo kwene kali masentimita 45, alino ciimo kali masentimita 95. Impembe zyakako zyapangilwe kumwi na kavuwa kako.

²⁶ Apomela kavuwa kako na zaabu musuma cuze, papela nu mu mbali zyonsi zini, nga na pa mpembe zyakako. Kuzingulusya kavuwa konsi yika musipi wakwe zaabu.

²⁷ Apanga vilemelo viili vyakwe zaabu vyakunyemwila kavuwa, nga yavinyepelela mumbali zyoili zya kavuwa lwa mwisika ya musipi kuti yasomekemo mipingilo yakupingila kavuwa.

²⁸ Apanga mipingilo ni mbao zya muti wa akasya, nga ayengelela na zaabu.

Yapanga amafuta akupakala nga nu ubani

²⁹ Nupya apanga amafuta yamuzilo akusolwela, nga nu ubani wacinunkilo cisuma nupya uswefiwe. Mipangile ya vintu vii, yacisile wakwe vino umuntu wino akapanga amafuta acinunu cisuma akacita.