Kufuma 35 - Amazwi Yakwe Leza 2013

Amalamulo yi Sabata

¹ Mose aama iuvi lyonsi lya ina Izlaeli nga alinena ati, “Yawe watapeela ilamulo ukuti mulinzile

² mwaomba imilimo inu mu manda mutanda. Lelo uwanda uwalenga cinimbali, uwanda wi Sabata, wene uwanda winu wa kupuza, uwapaatwilwa kuli Yawe. Muntu ali wensi uwaomba imilimo pa wanda kwene uu alakomwa.

³ Pa wanda kwene uu wi Sabata mutapemba nu moto kwene mu mikalo inu ili yonsi.”

Amawila yi Taalu Lyamuzilo

⁴ Mose anena iuvi lyonsi lya ina Izlaeli ati, “Yawe watapeela ilamulo ukuti,

⁵ ‘Mwapeela amawila kuli Yawe. Lyene ali wensi wino ali nu mwenzo wakupeela aiza na mawila yaa: zaabu, siluva, nu mukuwa,

⁶ pamba wa cifungo, muyenzulukile, nu muyenzu. Nupya mwaleta ni nsalu isuma yakwe bafuta nga ni nsalu zyapangilwa na mavumbu ya mbuzi,

⁷ mikwela yakwe yasuuku ino yaombeka mu viyenzu, mikwela inyuke, imbao zya muti wa akasya,

⁸ amafuta yamwi lampi, vyamununko usuma vya kupangila amafuta akusolwela, alino ni vya kupangila ubani wa cinunkilo cisuma,

⁹ amawe yakwe onikisi ni viyembelo vyuzye vyakwika pa cakuzwala cakwe Simapepo Mukulu cakwe efodi ni ca pacisao.’

Viombelo vya mwi Taalu lya Ukongano

¹⁰ “Antu yonsi aamanya imilimo yize alino yapange vyonsi vino Yawe wapeezile ilamulo kuti tupange.

¹¹ Yapange Itaalu lya Ukongano, cakuvimba pi Taalu, nga ni cakuvimba kunzi, tukoweko, amafulemu, impanda, vimuti pamwi ni vikalilo kwene.

¹² Nupya yapange Mbokosi ya Upangano ni mipingilo yakweyo, intupiko ya Mbokosi ya Upangano nga ni nsalu zyakucingilikizya Mbokosi ya Upangano.

¹³ Tebulo, pamwi ni mipingilo yaliko, ni viombelo vyaliko vyonsi, nga nu mukate uwapeelwa kuli Leza.

¹⁴ Yapange cakutekapo ilampi ni viombelo vyakweco, malampi yakupeela uluswepo na mafuta yayako,

¹⁵ kavuwa ka kufutikilapo ubani ni mipingilo yakako. Yapange na mafuta akusolwela, ubani wa cinunkilo cisuma alino nupya ni nsalu zyakucingilikizya zya pa mulyango wi Taalu lyakwe Yawe.

¹⁶ Nupya yapange kavuwa ka kupelelapo uwila wakoca pamwi nu lwangayo lwa mukuwa lupikolezye, mipingilo ya kavuwa pamwi ni viombelo vyakako, muyeza uwakufulalila pamwi ni citende cakwe,

¹⁷ insalu zyakucingilikizya musolo, vimuti pamwi ni vikalilo vyaikyo, insalu zyakucingilikizya pa mpongolo ya musolo,

¹⁸ impopo pamwi ni myando yi Taalu lyakwe Yawe nga ni zya kuomvya pa kucinga musolo.

¹⁹ Nupya yaleta vyakuzwala vipikulwe vyakuzwala yasimapepo akutumikila mu Ncende Yamuzilo, nga ni vyakuzwala vyamuzilo vyakwe simapepo Aloni, alino ni vyakuzwala vya ana yakwe aonsi vino yalinzile kuzwala pa kuomba imilimo ya usimapepo.”

Antu yaleta amawila

²⁰ Lyene iuvi lyonsi lya ina Izlaeli ilifumapo, ilisya Mose.

²¹ Alino cila muntu kulingana muno umwenzo wakwe ukulondela iyaleta kuli Yawe amawila ya vintu vyakupangila Itaalu lya Ukongano. Yaleta vyonsi vyakuombela imilimo lino yakutumikila na vyonsi vyakupangila vyakuzwala vyamuzilo.

²² Alino yonsi akasi yiiza, aonsi na anaci kwene. Cila muntu kulingana nu kulonda kwakwe aleta vyakuyemvya vyakuzwala, amaelena, vilemelo, ukasi wakuzwala mu nsingo, ni viyembelo vyuze vyakwe zaabu. Cila muntu aleta vyakwe zaabu vino wapaatwile wa wila wakuswelwila Yawe.

²³ Cila muntu wino wali na pamba wa cifungo, muyenzulukile, nu muyenzu, ni nsalu yakwe bafuta ni nsalu zya mavumbu ya mbuzi, mikwela ya mfwele ivumvunye mu viyenzu ni mikwela ya mbuzi, aleta kuli Yawe. Ali wensi aleta vino ali navyo.

²⁴ Antu yonsi yano yakweti siluva, nanti mukuwa, vyonsi vivyo yaleta kuli Yawe. Muntu wensi wino wakweti imbao zya muti akasya zyakuomvya pa milimo ya kukuula, nawe kwene aleta.

²⁵ Anaci yonsi amanya mulimo wakupikula nayo yaleta insalu zino yapikwile zyakwe pamba wa cifungo, muyenzulukile, nu muyenzu. Nupya yaleta bafuta wakwe pamba mutelepe cuze.

²⁶ Nga anaci yonsi yano yakweti umanyililo wa kupikula yapanga insalu zya mavumbu ya mbuzi.

²⁷ Lyene intunguluzi zileta amawe ya onikisi na mawe yauze akwika pa cakuzwala ca efodi alino na pa cakuzwala ca pacisao.

²⁸ Nupya yaleta vyamununko usuma na mafuta yi ilampi, amafuta akusolwela, alino nu ubani wa cinunkilo cisuma.

²⁹ Caleka aina Izlaeli yonsi aonsi na anaci kwene yano yalondanga kupeela vintu vyao nu mwenzo wao onsi ku milimo ino Yawe wapeezile ilamulo kupitila muli Mose, yaleta amawila yao akuitemelwa kuli Yawe.

Aomvi ya kukuula Itaalu lya Ukongano

³⁰ Pacisila cakwe vii, Mose anena aina Izlaeli ati, “Yawe wasolola Bezalele umwana wakwe Uli, mwizikulu wakwe Huli, uwamu mutundu wakwe Yuda.

³¹ Yawe watazuzya Bezalele nu Mupasi wakwe Leza, kuti aye fundi wa mano, nupya mulamoke mu milimo yonsi ya vyakupanga wakwe ii,

³² kusika ivyakuyemvya, ukuomvya zaabu, siluva nu mukuwa.

³³ Nupya kuti amanye kuwaza amawe akuyemvya, kuwaza imbao nu kuomba imilimo yonsi ya ufundi.

³⁴ Yawe watapeela amano ku muntu wii, nga na kuli Ooliyabu umwana wakwe Aisamaki, uwamu mutundu wakwe Dani, kuti yasambilizya antu yauze imilimo ino yamanya.

³⁵ Antu yaa yapeelwa ukwiluka nu kumanya kukulu pakuti yaombe imilimo ipusanepusane yonsi ino yafundi ya milimo yakaomba, ino acenjele pa milimo yakaomba, akapanga insalu zya cifungo zyakwe pamba mutelepe cuze. Mucumi yamanya ukuomba imilimo yonsi, nupya yangelenganya pa milimo yonsi ya ufundi.