Kufuma 34 - Amazwi Yakwe Leza 2013

Vipampa vya mawe yauze yaili apalemvilwe masunde

¹ Yawe nupya anena Mose ati, “Waza vipampa vya mawe yauze yaili wakwe yalya yaili akutandika nga nani ndalembapo amazwi yano yali pa vipampa vya mawe akutandika, vino watamile.

² Ukaiteyanye katondotondo, alino insita ya katondo kwene ukakwele Mwamba wa Sinai pakuti ukankomenkanye papela pa mwamba.

³ Kusi kwiza na umwi ali wensi, nupya kusi umwi wakulolekela mu ncende ya mwamba ili yonsi. Mutaleka imfwele nanti ng'ombe zyalya mwisika ya mwamba ulya.”

⁴ Caleka Mose awaza vipampa vya mawe yauze yaili wakwe yalya akutandika. Lyene lino waca katondo, Mose aya akwela Mwamba wa Sinai, wakwe vino Yawe wamupeezile ilamulo. Katondotondo Mose alavya vipampa vya mawe viwaze viili.

⁵ Lyene Yawe aika mwi kumbi, aimilila pipi na Mose alino alumbula zina lyakwe lyakuti Yawe.

⁶ Apita ku nkolelo yakwe Mose nga apunda ati, “Nene Yawe, Yawe, Leza wa luse na mizu, asisoka zuwa, uwazula nu kutemwa kwa manda pe, uwatailwa na antu yakwe.

⁷ Ndatwalilila kutemwa kwane ku antu mazimbi amu mazimbi ku nkulo zyonsi nu kwelela ukakasi wao, uyi wao, na maifyo yao. Lelo ntalapanya yakaifya. Ndavunuka ana na izikulu pamulandu wa maifyo yakwe ya isi, kufika nu ku nkulo yakwe citatu na yakwe cini.”

⁸ Zuwazuwa Mose afukama pansi afupime nga apepa.

⁹ Avwanga ati, “Yawe, ndi ukazangila munondi, nkukulenga kuti upite naswe. Antu yaa, yakomya imyenzo, lelo wemo utwelele inkota zitu na maifyo itu nupya utupokelele kuti tuye antu yako.”

Yawe wacita upangano nupya na antu yakwe

¹⁰ Lyene Yawe anena Mose ati, “Ndakai natinacita upangano na ina Izlaeli. Ndacita vintu vikulu pa manso yao ivitatala vyacitika mu luko nanti longa lwa munonsi. Antu yonsi yamalola vintu vikulu vino Ne Yawe ningacita, pano namacita vintu vya ngofyo kunuli.

¹¹ Mwayela amasunde yano nakupeela ilelo. Ndamuzingila aina Amoli, aina Kenani, aina Hiti, aina Pelizi, Hivi, nga na ina Yebusi lino mukuya kunoyali.

¹² Mutacita cipangano na antu ya, ku mpanga ino mukuyako, pano limwi mungaiteya lukose lwakulenga kuti mwaifya kuli Yawe.

¹³ Mwawisya tuvuwa twao, monone amawe yao amuzilo yano iimika, nupya muwisye incesi zyakwe Asyela.

¹⁴ “Mutapepa leza muze ali wensi, pano Yawe wino izina lyakwe a cauzuwa, a Leza wa uzuwa mucumi.

¹⁵ Mutacita cipangano na antu amu mpanga ilya pamulandu wakuti lino yakupepa yaleza yao, yakayafyulila impolelwa, nga limwi yangamwama kuti mulye nayo cakulya ca mpolelwa zyao.

¹⁶ Nupya limwi ana inu aonsi yangatwala ana yao anaci, nga nayo yangalenga kuti yamfutatile nu kupepa tuluwi twao.

¹⁷ “Mutaipangila tuluwi twakwengulula nu kutupepa.

¹⁸ “Mwazevya Cimulo ca Mukate usi na Citutumusi, wakwe vino namupiile ilamulo. Mwalya umukate usi na citutumusi pa manda cinimbali mu mwezi wakwe Abibu, pano mu mwezi kwene uu, ali lino mwafumile mu Eguputo.

¹⁹ “Mwana wensi iyeli umonsi, nu mwana wi yeli wa citeekwa, sawe, suuku nanti cipambasi, wene uwakwane.

²⁰ Lelo mwakulula umwana wi yeli wakwe punda, pakupeela suuku mu cifulo cakwe. Mwavuna mwana punda insingo ndi mwaposiwa kumukulula. Mwakulula umwana wensi wi yeli umonsi. Kusi umuntu nanti wenga wakwiza ku kulolekela ku manso yane kwaula cimwi mu minwe ca mawila.

²¹ “Mwaomba imilimo mu manda mutanda, lelo pa wanda uwalenga cinimbali, mutaomba mulimo uli onsi, nanti pa nsita ya kulima nanti pa nsita ya kuzombola.

²² “Mwazevya Cimulo ca Uzombozi lino mukuzombola vizao vyankolelo vya ngano, nu kuzevya Cimulo ca Nsakwe lino mukukoozya uzombozi winu apa mpela ya mwaka.

²³ “Aina Izlaeli aonsi, yonsi yaiza pa manso yane, ne Yawe Simwandalali, Leza wa ina Izlaeli, maila yatatu pa mwaka.

²⁴ Pacisila cakuzinga imitundu mu mpanga nga nu ku kuuzya impanga ilya, kusi umuntu nanti wenga aleezya kumulwisya nu kupokolola impanga inu pa nsita ya kuzevya vimulo vitatu pa mwaka.

²⁵ “Mutaapela kunondi umukate umuli icitutumusi lino mukupeela impolelwa. Inyama ili yonsi ya mpolelwa yapa Cimulo ca Ucilo mutaisunga kufika ku katondo ka wanda walondelela.

²⁶ “Mwaleta iviseekwa vyankolelo vya uzombozi winu visuma ku ng'anda yakwe Yawe, Leza winu. “Mutaelekela umwana wa mfwele nanti umwana wa mbuzi mwi ziya lyakwe nyina.”

²⁷ Yawe anena Mose ati, “Lemba amazwi kwene yaa, pamulandu wakuti kulondela amazwi kwene yaa, kuli kucita upangano pakasi kane nawe nga na ina Izlaeli yonsi.”

²⁸ Lyene Mose aikala pamwi na Yawe kuku kwene amanda amakumi yani, musanya nu usiku, kwaula ukulya nanti cimwi. Lyene Yawe alemba pa vipampa vya mawe yaya yaili amazwi yonsi a upangano, kuli kuti amasunde ikumi.

Mose wika Mwamba

²⁹ Lino Mose akwika Mwamba wa Sinai, ala asenzile ni vipampa vya mawe yaya yaili vya umboni, atamanyile ukuti mpumi yakwe ikuyengesa pamulandu wa kuvwanga na Yawe.

³⁰ Lino Aaloni na antu yonsi yalola Mose, yalola ukuti mpumi yakwe ikuyengesa. Lyene yuvwa intete, yakana kupalama kunoli.

³¹ Lelo Mose ayama, nga Aaloni pamwi ni ntunguluzi zya ina Izlaeli yaya kunoli, alino Mose atandika kuvwanga kunoyali.

³² Pacisila cakwe vii, aina Izlaeli yonsi yapalama pipi, alino Mose ayapeela amasunde yano Yawe wamupeezile pa Mwamba wa Sinai.

³³ Lino Mose wamala kuvwanga kunoyali, avimba impumi yakwe ni nsalu.

³⁴ Insita zyonsi lino Mose wingila mwi Taalu ku kuvwanga na Yawe avimbula insalu ku manso, mpaka kufika na lino amaiza afume. Lyene ndi wafuma mwi Taalu, anena aina Izlaeli vyonsi vino Yawe watamupeela ilamulo kuti anene antu.

³⁵ Antu yalola ukuti impumi yakwe ikuyengesa. Lyene avimba insalu ku manso mpaka kufika insita yuze lino alingila mwi Taalu lya Ukongano ku kuvwanga na Yawe.