Kufuma 33 - Amazwi Yakwe Leza 2013

Yawe wapeela ilamulo ku ina Izlaeli lya kufuma ku Mwamba wa Holebu

¹ Pacisila ca vintu vii Yawe anena Mose ati, “Ufume kuno pamwi na antu yano wizile nayo ukufuma ku Eguputo uye ku mpanga ino nalavile ukuti indapeela Abulaamu, Isaki na Yakobo. Pa nsita, kwene ilya nayanenyile antu yalya inti, Mpanga kwene ii indaipela ku amu mupanda wao.

² Ndatuma mungeli kuti akukolelele, nupya ndazinga aina Kenani, aina Amoli, aina Hiti, aina Pelizi, aina Hivi, na ina Yebusi.

³ Mukuya ku mpanga ivunde cuze. Lelo nemo ntakupita namwe pamulandu wakuti mwemwe antu akome myenzo cuze, nupya limwi ningamonona mu nzila.”

⁴ Lino antu yuvwa amazwi yano Yawe wavwanga iyatandika kulosya nupya patali nanti umuntu wenga uwazwite vyakuzwala visuma.

⁵ Kuli kuti Yawe ala watapeela ilamulo kuli Mose ati, “Nena aina Izlaeli uti, ‘Mwemwe antu akome myenzo. Nemo ndi napisile pamwi namwe, nanti pa kasita kanono sile, ningamonona kayala ng'anda. Ndakai zulini viyembelo vinu, nupya namaelenganya vyakucita namwe.’ ”

⁶ Caleka ukufuma lino aina Izlaeli yafumile ku Mwamba wa Holebu yatazwalanga viyembelo.

Itaalu lyamuzilo muno Yawe wakomenkanyanga antu yakwe

⁷ Lyonsi lino aina Izlaeli yakukuula insakwe yao Mose nawe aya aimika Itaalu lyamuzilo katalamukila kunzi ya nsakwe. Lyene yalitemela izina lyakuti, “Itaalu lya Ukongano.” Ali wensi wino akulonda kuyauzya cimwi kuli Yawe afuma mu nsakwe aya kwi Taalu lya Ukongano.

⁸ Insita zyonsi ndi Mose watapita ukuya kwi Taalu antu yonsi yimilila. Ali wensi aimilila pa mulyango wi taalu lyakwe ala akulolekesya Mose kuno akuya, mpaka aingila mwi Taalu lya Ukongano.

⁹ Mose ndi wingila mwi Taalu lili ikumbi liiza likala pa mulyango wi Taalu, alino Yawe atandika kuvwanga na Mose ukufuma mwi kumbi.

¹⁰ Lyene antu ndi yalola ikumbi pa mulyango wi Taalu, yafukama pansi yapepa, cila muntu pa mulyango wi taalu lyakwe.

¹¹ Avino Yawe wavwanganga na Mose manso na manso wakwe vino umuntu wensi akavwanga na cuza wakwe. Lyene pacisila cakwe vii Mose aswilila ku nsakwe kuno walafumile. Lelo mulumendo umwi, zina lyakwe Yoswa umwana umonsi wakwe Nuni, wino wali kaazwa wakwe Mose asyala mwi Taalu.

Yawe walaya ukuya pakasi ka antu yakwe

¹² Mose anena Yawe ati, “Lyonsi ukanena kuti ntungulule antu yaa ku mpanga ilya, lelo utanena wino ulatuma kuti mpite nawe. Lelo nupya watuvwanga uti, ‘Nakumanya ningo, nupya ukazangila munondi.’

¹³ Acino ndakai nkukulenga kuti ndi ukazangila munondi undangilile nzila zyako pakuti ntwalilile kukutumikila nu kukuzanzya. Nupya iusya ukuti umutundu uu, wa antu wewe wausolola ukuya wakwako.”

¹⁴ Lyene Yawe avwanga ati, “Nene nemwisikulu namapita nawe, nupya nkalenga kuti uye nu mutende.”

¹⁵ Mose anena Yawe ati, “Napapata utaleka tufume pa cifulo cii, ndi cakuti utakupita naswe.

¹⁶ Ndi cakuti wewe wapita naswe, ali wensi amamanya ukuti ukazangila mu antu yako pamwi nani. Cii cilalanga ukuti twaiyela ku antu amu nsi, ndi wewe wapita naswe.”

¹⁷ Lyene Yawe anena Mose ati, “Cisuma pamulandu wakuti nakumanya ningo nupya nkazangila munuli, namacita wakwe vino wavwanga.”

¹⁸ Lyene Mose alenga kuli Yawe ati, “Si leka ndole uluswepo lwa lulumbi lwako.”

¹⁹ Lilyo kwene Yawe aasuka ati, “Namalenga kuti ulole usuma nu ucindami wane, nupya pa manso yako namalumbula zina lyane lyamuzilo lyakuti, Yawe. Nkalanga mizu nu luse kuli yano nasolola.”

²⁰ Yawe atwalilila kuvwanga ati, “Lelo utanga undole pamulandu wakuti pasi umuntu angandola aye nu umi nupya.”

²¹ Lyene Yawe atwalilila kuvwanga ati, “Pipi na panondi paa, pali ciliwe, apano wimilile.

²² Lino namaiza mpite nu luswepo lwane luyengese, namakwika mu ninga alino nkuvimbe ni kasa lyane, kufika na lino napuzya.

²³ Lyene imfumye ikasa lyane alino ulole itundu lyane sile, impumi yane yene foo.”