Kufuma 32 - Amazwi Yakwe Leza 2013

Ing'ombe kacipambasi kakwe zaabu

¹ Lino antu yalola ukuti Mose walengela kwika ku mwamba atawezile, iyakongana kuli Aloni. Alino yamunena yati, “Iza kuno utupangile leza wakuti atutungulula, pamulandu wakuti tutamanyile cino cati ciponela Mose wino uwatutungulwile pa kufuma mu Eguputo.”

² Lyene Aaloni anena antu ati, “Zulini amaelena yakwe zaabu ku matwi ya aci inu, ku matwi ya ana inu aonsi, nu ku yana yinu anaci yonsi, alino mwize navyo kunondi.”

³ Caleka antu yonsi yazula amaelena yao nga yaleta kuli Aloni.

⁴ Lyene Aaloni apokelela amaelena yakwe zaabu ukufuma kunoyali, alino ayasungulula, apanga unkolanya wa mwana wa ng'ombe mu cikombole. Lyene antu iyatandika kupunda yati, “Mwe ina Izlaeli, Leza witu auwi wino watufumizye mu Eguputo.”

⁵ Aaloni lino walola vii, apanga kavuwa ku nkolelo ya mwana wa ng'ombe wakwe zaabu. Lyene Aaloni auma imbila ati, “Mutondo kulaya kuzevya kwa kucindika Yawe.”

⁶ Caleka uwanda walondelela katondotondo yapeela impolelwa amawila yakoca nga yapeela na mawila autandano. Lyene antu iikala pansi iyatandika ukulya nu kumwa, alino nu kucina kwa uzelele.

⁷ Lilyo kwene Yawe anena Mose ati, “Kalaufya, ika ku mwamba swilila pamulandu wakuti antu yako yano watungulwile pa kuyafumya mu Eguputo, yatiyaifya nupya yatiyankana.

⁸ Pakwene yatiyafuma umu nzila ino napiile ilamulo kuti yalondela. Yatiyasungulula zaabu nu kupanga mutepa wa mwana wa ng'ombe. Awino yakupepa nu kupeela impolelwa kunoli. Nupya yakuvwanga yati, ‘Mwe ina Izlaeli, leza witu auwi wino watufumizye mu Eguputo.’ ”

⁹ Lyene Yawe atwalilila kuvwanga ati, “Namanya antu kwene yaa, yene yakoma imyenzo cuze.

¹⁰ Caleka ndakai utandesya kuti njonone, pamulandu wakuti nene musoke cuze, lyene wemo na amu mupanda wako ndalenga kuti muye luko lukulu.

¹¹ Lelo Mose apapata kuli Yawe ati, “Mwe Yawe, pacani cino mwasokela antu inu musango uu, antu yano mwafumizye mu uzya mu Eguputo, ku maka inu akulu nu kwi kasa linu lya maka?

¹² Uzye mukulonda kuti aina Eguputo yakavwange yati, wayafumizye mu Eguputo nu uteyanyo wakuti ukayakome ku myamba nu kuyonona yonsi pyu? Wezya umwenzo wako, utonona antu yako lelo uyelele.

¹³ Iusya aomvi yako Abulaamu, Isaki na Yakobo nupya iusya na vino wayalavile nu kulapa pi zina lyako lino wayanenyile ukuti ulayapeela aizikulu avule cuze, avule wa ntanda zya mwiyulu, nu kuti ulapeela aizikulu yao impanga yonsi ino walavile. Mpanga kwene ii ilaya impanga yao amanda pe.”

¹⁴ Caleka Yawe awezya umwenzo atalenzile kuti uzanzo ucitike uno wakasi kuti acite pa antu yakwe, aina Izlaeli.

¹⁵ Mose aika ku mwamba aswilila ala asenzile vipampa vya mawe yaili apalemvilwe amasunde mbali zyonsi zyoili.

¹⁶ Uwapanzile amawe yaa a Leza umwisikulu nu kulembapo amasunde mu musango wa kufukula.

¹⁷ Lyene Yoswa auvwa antu yakupunda, nga anena Mose ati, “Natinuvwa congo ca nkondo kuko ku nsakwe.”

¹⁸ Lelo Mose aasuka ati, “Congo kwene cico, citakuvwika wa congo ca muntu wino watacimvya, nupya cisi congo ca muntu wino iyacimvya. Nkuuvwa congo ca kwimba.”

¹⁹ Lino Mose wafika pipi ni nsakwe nu kulola umwana wa ng'ombe nga na antu yakucina, asoka cuze cakuti asumba vipampa vya mawe vino vyali mu minwe yakwe vitamika. Cii cacitike mwisika ya mwamba.

²⁰ Lilyo kwene aya atoola umwana wa ng'ombe wino Aaloni wapanzile aoca, amusungulula amusyunola wa usu, nga amusumbila mu manzi. Alino alenga kuti aina Izlaeli yamwe amanzi kwene yaya.

²¹ Lyene auzya Aaloni ati, “Uzye antu kwene yaa yacisile cani kunuli pakuti uyalenge kuti yacite iifyo iliipisye vii?”

²² Aaloni aasuka ati, “Musambazi, utansokela. Wamanya ukuti antu yaa yatemwa ukucita iviipe.

²³ Antu yaa yanenyile yati, ‘Tupangile leza wakuti atutungulula, pamulandu wakuti tutamanyile cino cati ciponela Mose wino uwatutungulwile pa kufuma mu Eguputo.’

²⁴ Lyene nani njanena nti, ‘Ali wensi wino akweti amaelena yakwe zaabu alete kunondi.’ Alino yano yakweti amaelena na zaabu iyampeela. Nani njasumbila mu moto, alino impanga unkolanya wa mwana wa ng'ombe.”

²⁵ Mose alola ukuti Aaloni uwalenzile kuti antu yavulungane, pamulandu wakuti Aaloni wayalekelizye yasuka yamunenola na pa manso ya anisi yao.

²⁶ Caleka Mose aimilila pa mpongolo ya nsakwe, alino apunda avwanga ku antu ati, “Wensi wino akulonda Yawe aize kunondi!” Acino aina Levi yaya yakongana kunoli.

²⁷ Alino Mose anena aina Levi yano yakongine kunoli ati, “Yawe, Leza wa ina Izlaeli, wavwanga wati, ‘Ali wensi muli mwemwe atoole lupanga, nga muye ku nsakwe nu kwingila mu mpongolo zyonsi. Alino ali wensi muli mwemwe akome mwina wakwe, nanti cuza wakwe, nanti mwinipamba.’ ”

²⁸ Aina Levi yaya iyacita wakwe vino Mose wapeezile ilamulo. Fwandi aonsi aakomilwe pa wanda kwene ulya yali mazimbi yatatu.

²⁹ Alino Mose anena aina Levi ati, “Uwanda wi lelo mwaipaatula mwenga kuti muye yasimapepo akutumikila Yawe, pakukoma ana inu pamwi na akazi kinu. Caleka Yawe wamupolelela pa wanda wi lelo.”

³⁰ Uwanda walondelela Mose anena antu ati, “Mwacisile iifyo iliipe cuze. Lelo ndakai namaswilila kuli Yawe ku mwamba, limwi ningamucitila ulutambi lwa kufuta amaifyo. Limwi angamwelela iifyo linu.”

³¹ Lyene Mose aswilila kuli Yawe aya avwanga ati, “Antu yaa, yatiyacita iifyo lipe cuze. Yene yaipangila leza wakwe zaabu nu kumupepa.

³² Lelo ndakai napapata uyelele iifyo lyao. Napapata ndi wakana ukuyelela, lyene ufute izina lyane mu lupapulo luno walembamo mazina ya antu yako.”

³³ Lyene Yawe aasuka Mose ati, “Suka sile wiyo wino wacita iifyo kunondi, awino ningafuta izina lyakwe mu lupapulo lwane.

³⁴ Ndakai pitanga utungulule antu yayo ku mpanga ino nakunenyile. Waiusya ukuti mungeli wane akaakutungulula, lelo uwanda uliza uno ndavunuka antu yayo pamulandu wi iifyo lyao.”

³⁵ Caleka Yawe alenga kuti indwala ipone pa antu yayo pamulandu wakuti yalenzile kuti Aaloni ayapangile unkolanya wa mwana wa ng'ombe.