Kufuma 31 - Amazwi Yakwe Leza 2013

Yafundi akupanga Itaalu lya Ukongano

¹ Pacisila cakwe vii Yawe atwalilila ukunena Mose ati,

² “Nasolola Bezalele umwana wakwe Uli mwizikulu wakwe Huli, uwamu mutundu wakwe Yuda.

³ Wiyo, natindenga Mupasi wane kuti azule munoli. Natindenga kuti aye a fundi wa mano nupya mulamoke mu milimo yonsi wakwe vii.

⁴ Akaelenganya imipangile ya vintu mu kuomvya zaabu, siluva nu mukuwa.

⁵ Nupya kuti amanye kuwaza amawe nu kuwaza imbao nu kuomba imilimo yonsi ya ufundi onsi.

⁶ Nupya nasolola na Ooliyabu umwana wakwe Aisamaki, uwamu mutundu wakwe Dani, kuti amwazwilizya. Nupya yafundi yonsi ndalenga kuti yaye na mano avule cuze, cakuti yatange yaposiwe kupanga icintu icili consi cino ningakupeela ilamulo kuti antu yao yapange.

⁷ Yapange Itaalu lya Ukongano, Mbokosi ya Upangano, intupiko ya Mbokosi ya Upangano, pamwi ni viya vya mwi Taalu,

⁸ tebulo ni viombelo vyaliko, cakutekapo ilampi cakwe zaabu musuma cuze pamwi ni viombelo vyakweco, kavuwa ka kufutikila ubani,

⁹ kavuwa ka kupelelapo uwila wakoca pamwi ni viombelo vyakako, muyeza uwakufulalila pamwi ni citende cakwe,

¹⁰ vyakuzwala vipikulwe, nga ni vyakuzwala vyamuzilo vyakwe simapepo Aaloni alino ni vyakuzwala vya ana yakwe aonsi vino yalinzile kuzwala pa kuomba imilimo ya usimapepo,

¹¹ amafuta akusolwela alino nu ubani wa cinunkilo cisuma, vyonsi vivyo vyaikala mu Ncende Yamuzilo. Yakapange vintu vii vyonsi wakwe vino napeela ilamulo kunoli.”

Sabata uwanda wakupuza

¹² Nupya Yawe anena Mose ati,

¹³ “Nena aina Izlaeli ukuti yalinzile yasunga Sabata, uwanda wane wakupuza, pamulandu wakuti wene cimanyililo ca manda pe pakasi kane namwe nga na izikulu inu, cakulanga ukuti nene indi Yawe wino akamuzilizya.

¹⁴ Caleka mwasunga uwanda wi Sabata pamulandu wakuti wene uwanda wamuzilo kunomuli. Muntu ali wensi atakusunga uwanda uu, akomwe. Ali wensi uwaomba imilimo pa wanda kwene uu, wene alinzile kusukulwa munomuli.

¹⁵ Muntu aombe imilimo yakwe yonsi mu manda mutanda, lelo uwanda uwalenga cinimbali uwanda wi Sabata wa kupuza, uwanda wamuzilo uno wapaatulwa kunondi. Ali wensi uwaomba imilimo pa wanda kwene uu, akomwe.

¹⁶ Aina Izlaeli yalinzile yasunga uwanda wi Sabata, nupya mu mikulo yao yonsi yalinzile yasunga uwanda uu uwa upangano wa manda pe.

¹⁷ Cikwene cii, icimanyililo ca manda pe pakasi kane na ina Izlaeli, pano ne Yawe naumvile iyulu ni nsi mu manda mutanda, alino impuuza pa wanda uwalenga cinimbali.”

¹⁸ Lino Yawe wamala kuvwanga na Mose pa Mwamba wa Sinai, apeela Mose vipampa vya mawe yaili, vivi kwene vino Leza umwisikulu walemvilepo amasunde ni ikasa lyakwe.