Kufuma 30 - Amazwi Yakwe Leza 2013

Kavuwa ka kocelapo ubani

¹ “Lyene uleke yapange kavuwa ka kocelapo ubani. Upange kavuwa kaa ni mbao zya muti wa akasya.

² Kaye akalingane mbali zyonsi, mu utali kaye masentimita amakumi yani na yasano mu wipi namo kwene kaye masentimita amakumi yani na yasano, alino utali wa papeela kaye masentimita amakumi fundimbali. Impembe zyakako zipangilwe kumwi na kavuwa kako.

³ Ukapomele na zaabu musuma cuze, papeela nu mumbali zyonsi zini nga na pa mpembe zyakako. Alino kuzingulusya kavuwa wike umusipi wakwe zaabu.

⁴ Upange vilemelo viili vyakwe zaabu vyakunyemwila kavuwa, nga uvinyepelele mbali zyoili zya kavuwa mwisika ya musipi, pakuti yasomekemo mipingilo yakupingila kavuwa.

⁵ Mipingilo kwene iyo uipange ku muti wa akasya, nupya uyengelele na zaabu.

⁶ Kavuwa kako ukateke kunkolelo ya nsalu yakucingilikizya Mbokosi ya Upangano, pa nkolelo ya ntupiko ino ili papeela ya Mbokosi ya Upangano. Pa ncende kwene ii ali pano ndakomenkana nawe.

⁷ Cila katondo konsi Aaloni afutikila ubani wa cinunkilo cisuma, nupya insita kwene iyo aateyanya malampi yaili.

⁸ Lyene lino akukozya malampi yayo manguzi, nupya afutikila ubani. Vivyo kwene kuye kufutikila kwaula kuta pa manso yakwe Yawe mu mikulo inu yonsi.

⁹ Pa kavuwa kako utafutikilapo ubani uli onsi uno utazumiliziwa, nanti kupelelapo uwila wakoca uli onsi, nanti uwila wa usu. Nupya pa kavuwa kako utapongolwelapo uwila wa vyakumwa.

¹⁰ Cila mwaka Aaloni akaacita lutambi lwa kufuta amaifyo pa mpembe zya kavuwa kako iila lyonga. Akaaswefya kavuwa iila lyonga pa mwaka nu wazi wa nyama zya mawila ya kufuta amaifyo. Vintu vii vikacitwa mu nkulo zikwiza zyonsi. Kavuwa kwene kaa kalaya kamuzilo cuze, nupya kene kapaatulwa kuli Yawe.”

Uwila wa kukulula umi

¹¹ Yawe atwalilila ukunena Mose ati,

¹² “Lino ukupenda ana aonsi aina Izlaeli, umuntu wensi alinzile ukulipa kuli Yawe ca kukulwila umi wakwe, pakuti pataya mpungo ya ndwala pano yali lino kupenda kukucitika.

¹³ Ali wensi wino ali mu mpendwa yakupenda kuko apeele kulingana nu mutengo uno ukulondwa. Kuli kuti impiya zya masyekele zinyome kulingana na magalamu mutanda, kulondela cipimilo caku ng'anda yakwe Leza (syekele wenga alingine na magela amakumi yaili). Impiya kwene zii izyakupeela uwila kuli Yawe.

¹⁴ Ali wensi wapendwa mu kupendwa kuko uwa myaka amakumi yaili nanti ukuluta, apeele uwila uu kuli Yawe.

¹⁵ Mukama atapeela ukuluta auze, nupya mupina atapeela kucefyako pa mutengo uno wapimwa lino mukupeela kuli Yawe uwila wa kukulula umi winu.

¹⁶ Impiya zya kukulwila umi ukufuma ku ina Izlaeli, muziomvye ku milimo ya mwi Taalu lya Ukongano. Zyene zilaya zyakuti Yawe aiusizyako aina Izlaeli, nga zilaya zya kukulwila umi winu.”

Yapanga muyeza wa mukuwa

¹⁷ Lyene Yawe anena Mose ati,

¹⁸ “Upange muyeza wa mukuwa uwakufulalila, nupya citende cakwe ciye ca mukuwa. Umuteke pakasi ki Taalu lya Ukongano na kavuwa, alino witilemo amanzi.

¹⁹ Aaloni na ana yakwe aonsi yafulala makasa nu kufulala ingazo zyao mu manzi yayo kwene.

²⁰ Lyonsi lino yingila mwi Taalu lya Ukongano, yene yalinzile kufulala pakuti yatafwa. Vivyo kwene pakuya ku kavuwa ku kuomba imilimo yao ya kutumikila pa kutwala amawila akocela Yawe,

²¹ yene yalinzile kufulala makasa ni ngazo zyao kuti yatafwa. Likwene lili lamulo lino antu yao na amu mupanda wao yalinzile kulondela amanda pe.”

Mafuta akupakala

²² Yawe anena Mose ati,

²³ “Utole vyamununko usuma kulingana makilogalamu yatatu yakwe mule nanti vya musango wakwe kinamoni, makilogalamu yatatu a visali vinunkile ningo,

²⁴ makilogalamu mutanda yakwe akasya (vyonsi vii kulondela cipimilo caku Ng'anda ikulu yakwe Leza). Nupya mungilizye amafuta amu olivi akulingana malita yani.

²⁵ Lyene vyonsi vii, upangile amafuta yamuzilo akusolwela. Uvitikinkanye pamwi wakwe vino umuntu wino akapanga amafuta acinunu cisuma akacita. Mafuta kwene yayo yaye amafuta yamuzilo, akusolwela.

²⁶ Upake Itaalu lya Ukongano na mafuta kwene yayo. Nupya upake Mbokosi ya Upangano,

²⁷ tebulo ni viya vyonsi, cakutekapo ilampi pamwi ni viombelo vyakweco, kavuwa ka kufutikilapo ubani,

²⁸ kavuwa ka kupelelapo uwila wakoca pamwi ni viombelo vyakako, alino na muyeza uwakufulalila pamwi ni citende cakwe.

²⁹ Vyonsi vii uvipaatule mu musango kwene uu, nupya viye vyamuzilo ukuluta. Nupya icili consi icilakumya vintu kwene vii naco kwene cilaya camuzilo.

³⁰ Lyene upake Aaloni amafuta pamwi na ana yakwe aonsi nu kuyapaatula kuti yaye yasimapepo akuntumikila.

³¹ Lyene aina Izlaeli uyanene uti, ‘Yakwene yaa aliyo yamaya amafuta yane amuzilo akusolwela yano yalaomviwa mu kuntumikila mu nsita yonsi ino ikwiza.

³² Mutapaka antu sile asi yasimapepo, nupya mutapanga amafuta yauze akolane na yaa. Mafuta yaa amuzilo cuze.

³³ Muntu ali wensi wino alapanga amafuta acinunu cisuma yauze akolane na yaa, nanti kupaka muntu ali wensi wino asi simapepo, wene alinzile kusukulwa mu antu yane.’ ”

Mipangile ya ubani

³⁴ Lyene Yawe anena Mose ati, “Tola vipimilo vilingane vya vintu vinunkile ningo wakwe vii: sitakate, onika, galibanumu, nu ubani wa mpomvu.

³⁵ Utikinkanye vyonsi vii, alino upange ubani wakwe vino umuntu wino akapanga amafuta acinunu cisuma akacita. Utikinkanyemo musilya alino nao umaya usanguluke nupya wamuzilo.

³⁶ Usyute umwi, utonyole cuze, alino utapulepo umwi nu kwika ku nkolelo ya Mbokosi ya Upangano mwi Taalu lya Ukongano, lya kukomenkanilamo na antu yane. Ubani kwene uu, kunomuli uye uwamuzilo cuze.

³⁷ Lyene ubani uno ungapanga kulondela mipangile kwene ii, utaya wakwinu foo, lelo uye uwakwe Yawe wenga sile.

³⁸ Muntu umwi ndi wapanga ubani ukolane na uu, kuti auvwe mununko wauko usuma, wene alinzile kusukulwa mu antu yane.”