Kufuma 29 - Amazwi Yakwe Leza 2013

Kupaatula Aaloni na ana yakwe kuti yaye yasimapepo

¹ Yawe anena Mose ati, “Lino wapaatula Aloni, vii avino ucite ku ana yakwe aonsi kuti yaye yasimapepo akuntumikila: Utoole kacipambasi konga, nga na yasuuku yaili aula ulema.

² Nupya utoole umukate usi na citutumusi, makeke asi na citutumusi atikinkanye na mafuta, nga ni mikate ya mpanda ipapatale ipakwe amafuta. Vyonsi vii, uvipange nu usu wa ngano utonyoleke.

³ Uviike mu cimponda alino ulete kunondi lino ukupeela impolelwa, kacipambasi nga na yasuku yaili.

⁴ “Wize na Aaloni ku mulyango wi Taalu lya Ukongano pamwi na ana yakwe aonsi,

⁵ lyene uzwike Aaloni vyakuzwala vya usimapepo, ikoti nu mwingila uwikilila umwisika ya cakuzwala cakwe efodi, nga ni cakuzwala kwene ca efodi, alino ni cakuzwala pacisao. Lyene unyepe musipi upikule usaka mu musana wakwe.

⁶ Umuzwike tulibani ku mutwe, nga ni ciyembelo camuzilo pali tulibani.

⁷ Lyene utoole amafuta akusolwela nga umupongolwele pa mutwe wakwe kuti umulasike.

⁸ “Pacisila cakwe vii, utoole ana yakwe aonsi uyazwike malaya yaya.

⁹ Nupya uyazwike ni cisote ca ucindami nga na tulibani Mu musango uu yaya yalaya ayasimapepo yane pakulondela ilamulo lyane lya manda pe. Mu musango uu ali muno umapaatwila Aaloni na ana yakwe aonsi.

¹⁰ “Pacisila cakwe vii, ulete kacipambasi pa mulyango wi Taalu lya Ukongano. Lyene Aaloni na ana yakwe yike makasa yao pa mutwe wakwe kacipambasi kako.

¹¹ Pacisila cakwe vii, mufyule ing'ombe iyo pa manso yane pa mulyango wi Taalu lya Ukongano.

¹² Utoole uwazi umwi wa ng'ombe iyo upake nu munwe wako pa mpembe zya kavuwa. Lyene uwazi wasyala witile pisika lya kavuwa.

¹³ Pacisila cakwe vii, utoole amafuta yonsi andatila vyamunda, ni ciputulwa cisuma cuze ca kwitima kumwi ni imfyo alino uvyocele pa kavuwa.

¹⁴ Lelo inyama yakwe cipambasi, mukwela nga ni vyamunda ukavyocele kunzi ya nsakwe. Ukwene uli wila wa kwelela amaifyo yakwe yasimapepo.

¹⁵ “Utole wenga pali ya suuku yaili yaya, alino Aaloni na ana yakwe aonsi yike makasa yao pa mutwe wakwe suuku wiyo.

¹⁶ Lyene mumufyule alino utoole uwazi nu kusansa mbali zyonsi zya kavuwa.

¹⁷ Suuku wiyo umuputoleputole, alino ndi wafula mala ni myendo yakwe suuku wiyo, uviike papela pa mutwe nga napa tuputulwa tuze.

¹⁸ Lyene woce suuku wiyo wensi pa kavuwa. Wene uwila wakocela Yawe, nupya u mununko usuma wakuzanzya ne Yawe. Ukwene uli wila wakocela Yawe.

¹⁹ “Lyene utoole suuku muze wilya, nga Aaloni na ana yakwe yike makasa yao pa mutwe wakwe suuku.

²⁰ Mumufyule, alino mutole uwazi umwi wakwe suuku wiyo nu kupaka pa nsongo yi kutwi lyakwe Aaloni ilya kwi kasa lyakwe lilunji nga na pa cikando ca kwi kasa lyakwe lilunji ucite icili conga ku ana yakwe Aloni. Uwazi uze ukanyile kavuwa kukazingulusya.

²¹ Utoole uwazi umwi pa kavuwa alino na mafuta yamwi akusolwela nga usanse pali Aaloni na pa vyakuzwala vyakwe, na pa ana yakwe Aaloni nga na pa vyakuzwala vyao. Lyene Aaloni na ana yakwe yamapaatwilwa kunondi pamwi ni vyakuzwala vyao.

²² “Utole amafuta yakwe suuku, musinda unone, amafuta andatila vyamumala, ciputulwa cisuma ca kwitima, imfyo zyoili na mafuta yakwezyo alino nu mwendo wa kwi lunji, pamulandu wakuti suuku wii impolelwa ya pakutulwa.

²³ Mu cimponda ca mukate usi na citutumusi cino capeelwa kunondi, utoole umukate onga, utikinkanye na mafuta nga nauze musi amafuta, alino nu mukate onga upapatale.

²⁴ Cakulya consi cii uciike mu makasa yakwe Aaloni nu mu makasa ya ana yakwe, alino yao kwene yauswelwile pa manso yakwe ne Yawe wa wila wakuswelula.

²⁵ Lyene utoole vyonsi vivyo ukufuma mu makasa yao, alino uvyocele pa kavuwa kumwi nu wila wakoca kuti viye ivya mununko usuma ukazanzya Yawe. Ukwene uli wila wakocela Yawe.

²⁶ “Utole inganga yakwe suuku wino yakomile pa kupolelela Aloni, alino uiswelwile pa manso yakwe Yawe wa wila wakuswelula. Ikwene aino imaya ciputulwa ca nyama yako.

²⁷ Pacisila cakwe vii, upaatule viputulwa vya mfwele zyapezilwe pa kupaatulwa kwakwe Aaloni na ana yakwe, kuli kuti inganga yakupeela wa ca mawila capaatulwa, alino umwendo wakupeela wa ca mawila capaatulwa.

²⁸ Pali vino aina Izlaeli yakapeela, vikwene vii viye vyakwe Aaloni nga na ana yakwe Aaloni aonsi amanda pe. Yasimapepo aliyo yapokelele vyonsi vii, ukufuma pa mawila autandano ya ina Izlaeli, pakuti ali mawila ya ina Izlaeli kuli Yawe.

²⁹ “Vyakuzwala vyamuzilo vyakwe Aaloni vilasyala vya ana yakwe aonsi lino alafwa, pakuti yavizwala lino yakupaatulwa pa kukuziwa pali usimapepo.

³⁰ Mwana wakwe Aaloni wino wapyana mu cifulo cakwe kuti aye a simapepo, alinzile azwala vyakuzwala kwene vii amanda cinimbali, lino akwingila mwi Taalu lya Ukongano ku kutumikila mu Ncende Yamuzilo.

³¹ “Lyene utoole suuku wino waomvizye pa kupaatulwa kuli usimapepo, uweleke mu Ncende Yamuzilo.

³² Alino Aaloni nga na ana yakwe aonsi yalye inyama yakwe suuku wiyo, pamwi nu mukate uwamu cimponda, yaviliile pa mulyango wi Taalu lya Ukongano.

³³ Yakalye amawila yonsi yano yapile kunondi pakufuta amaifyo, pakuyapolelela na pa kuyapaatula. Muntu sile asi simapepo atalya, pamulandu wakuti amawila yayo amuzilo.

³⁴ Inyama ndi yasyala, nanti umukate wasyala kufika katondo, uvyoce, yatalya vintu vii pano ivyamuzilo.

³⁵ “Malamulo yonsi yano nakunena, unene Aaloni na ana yakwe aonsi. Ukacite lutambi lwa kuyapaatula pa manda cinimbali.

³⁶ Cila wanda ulinzile ukupeela cipambasi uwa wila wa kwelela amaifyo pakuti maifyo yayo yelelwe. Uswefye kavuwa pa kutwalapo uwila wa kufuta amaifyo. Lyene ukapake amafuta pakuti kaye kamuzilo.

³⁷ Pa manda cinimbali uwapeelela kavuwa impolelwa. Lyene kavuwa kalaya kamuzilo ukuluta, nga na consi cino cilakumya kavuwa kako naco cilononwa nu muzilo wakako.

Amawila ya manda yonsi

³⁸ “Pa kavuwa ka mpolelwa uwatwalapo nu kupeela vii nsita zyonsi. Cila wanda uwatwalapo nu kupeela ana ya mfwele yaili ali nu mwaka onga.

³⁹ Mwana wa mfwele umwi uwamutwala katondo, nu muze manguzi.

⁴⁰ Pamwi nu mwana wa mfwele wakutandika, uwatwalapo nu kupeela kilogalamu wenga wa usu utonyoleke wa ngano, uuminkanye na lita wenga wa mafuta asuma cuze, alino na lita wenga wakwe waini wakutwala wa wila wa vyakumwa.

⁴¹ Lyene uwatwala umwana wa mfwele wakwe ciili manguzi. Pamwi nu mwana wa mfwele nupya kwene uwatwala uwila wa usu nga ni cawila wa vyakumwa, ndi vino cili ku vintu vyamu katondo kuti viye amawila yakoca na kuti viye ivya mununko usuma ivyakuzanzya Yawe. Ukwene uli wila wakocela Yawe.

⁴² Mu mikulo yonsi insita zyonsi mwapeela pa manso yane Ne Yawe uwila uu wakoca pa mulyango wi Taalu lya Ukongano. Kuku akuno ndakomenkana na antu yane nu kulanda nayo.

⁴³ Kuku kwene akuno ndakomenkana na ina Izlaeli, nupya incende kwene iyo ilaya iziliziwe nu ucindami wane.

⁴⁴ Itaalu lya Ukongano indalilenga kuti liye lyamuzilo pamwi na kavuwa kwene. Aaloni ndamupaatula pamwi na ana yakwe aonsi pakuti yaye yasimapepo yane akuntumikila.

⁴⁵ Ndikala pakasi ka aina Izlaeli, nupya ndaya Leza wao.

⁴⁶ Yalamanya ukuti Nene indi Yawe Leza wao, wino wayafumizye mu Eguputo pakuti nikale pakasi kao. Nene indi Yawe Leza wao.