Kufuma 28 - Amazwi Yakwe Leza 2013

Kupanga vyakuzwala vyakwe yasimapepo

¹ Yawe apeela ilamulo kuli Mose ati, “Tuma akwama munyonko Aaloni pamwi na ana yakwe aonsi, Nadabu, Abiu, Eleaza, nga na Itamali. Ali antu yano natinsolola ukufuma mu ina Izlaeli pakuti yangantumikila wakwe yasimapepo.

² Uleke yasumile munyonko Aaloni vyakuzwala vyamuzilo, ivya kumucindamika nu kumuyemvya.

³ Ama antu yonsi amanya kusuma, yano napeela amano, kuti yasumile Aaloni vyakuzwala pakuti angapaatulwa wakwe simapepo uwamu mulimo wane.

⁴ Vyakuzwala vino yali nu kusuma aivi. Cakuzwala ca pacisao, cakuzwala ca efodi, mwingila, ikoti lyapetwa mumbali ningo, tulibani wakuzwala ku mutwe nga nu musipi wa nsalu. Yasume vyakuzwala vya usimapepo vya munyonko Aaloni nga ni vya ana yakwe, pakuti yangatumikila wakwe yasimapepo.

⁵ Antu yano yamanya kusuma, yaomvye usavu wakwe zaabu, wa cifungo, wacifuvya, uyenzu nga na bafuta mutelepe nupya mupangwe ningo.

⁶ Cakuzwala ca efodi yacipangile na zaabu, insalu ya cifungo, yacifuvya, iyenzu, alino na bafuta mutelepe mupangwe ningo nupya mupetwe usaka.

⁷ Uleke yasumilile tumakwelelo twapa viye twiili ku mpela ya cakuzwala ca pacisao. Tumakwelelo tuu utwakunyepela cakuzwala ca efodi.

⁸ Nupya yalinzile kupikula musipi usaka usumililwe kunkolelo ya cakuzwala ca efodi pakuti ciloleke icintu conga. Musipi uwo, wa ciputulwa conga nao kwene uye wa nsalu yakwe zaabu, ya cifungo, uyenzu nga na yakwe bafuta mutelepe mupangwe ningo.

⁹ Uleke yatole amawe yaili ya onikisi alino yalembepo mazina ya ana yakwe Izlaeli.

¹⁰ Piwe lyonga ulembepo mazina mutanda alino na pi iwe lyuze ucite icili conga kwene. Ulembe mazina yayo kulingana muno yalondekana mu kuvyalwa kwao.

¹¹ Wakwe vino musyanyi akalemba pa vyela vya mutengo avino nawe kwene ukalembe mazina ya ana yakwe Izlaeli pa mawe yaili nga ukike amawe yayo mu vyakwikamo vyakwe zaabu.

¹² Wike amawe kwene yaili yaa pa tumakwelelo twapa viye twa cakuzwala ca efodi, wa ciusizyo ca ana yakwe Izlaeli. Mu musango kwene uu Aaloni alasenda mazina yao paviye vyakwe pakuti ne Yawe, naiusya antu yane amanda pe.

¹³ Uleke yapange vyakusimpamo viili, vyakwe zaabu,

¹⁴ ni minyololo iili yakwe zaabu musuma cuze, mupyate uti mwando, alino unyepelele minyololo ku vyakusimpamo.”

Kupanga cakuzwala ca pacisao

¹⁵ Yawe anena Mose ati, “Uleke yasumile Simapepo Mukulu cakuzwala ca pacisao cakumanyilako ukulonda kwakwe Leza, ciye icipikulwe usakausaka, ciye wa mipangilwe ya cakuzwala ca efodi. Cili nu kupangwa na zaabu nga ni insalu ya cifungo, iyenzu nga na yakwe bafuta mutelepe mupangwe ningo.

¹⁶ Kukula kwa nsalu ii, kuye icili conga mbali zyonsi, nupya iye yakupeta paili. Mu utali wa nsalu muye masentimita amakumi yaili na yaili mu wipi namo kwene muye icili conga.

¹⁷ Utantike milongo ini ya mawe amutengo ukulu. Pa mulongo wakutandika paye amawe yakwe lubi, topazi, na belulo.

¹⁸ Pa mulongo wakwe ciili paye amawe yakwe daimondi, safilo na emalodi.

¹⁹ Pa mulongo wakwe citatu paye amawe yakwe yasinti, agate nga na ametusto.

²⁰ Pa mulongo wakwe cini paye amawe yakwe belulo, onikisi nga na yaspele, alino vyonsi vivyo viikwe mu vyakusimpamo vyakwe zaabu.

²¹ Amawe kwene yaa yaye ikumi na yaili, kulingana na mazina ya mitundu ya ina Izlaeli. Amawe yalembwe wakwe vino musyanyi akalemba mazina pa mawe yamutengo ukulu. Iwe lyonsi liye ni zina lya mutundu onga.

²² Uleke yapange tuminyololo twakwe zaabu musuma cuze pa cakuzwala ca pacisao, tupyate usaka ngati imyando.

²³ Upange nupya tumipeto twiili twakwe zaabu, alino yatunyepelele ku masempele ku nkolelo ya cakuzwala ca pacisao.

²⁴ Yanyepe imyando iili yakwe zaabu ku tumipeto toili utuli pa vinkonci vya cakuzwala ca pacisao.

²⁵ Alino mpela ya myando iili iinyepe ku vyakwikamo, yailundinkanye ku tumakwelelo twapa viye ku cakuzwala cakwe efodi.

²⁶ Nupya uleke yapange tumipeto twiili twakwe zaabu alino yatulundinkanye ku mpela ya mbali ziili zya cakuzwala ca pacisao, kwi sempele lwa mukasi ya cakuzwala cico, pipi ni cakuzwala ca efodi.

²⁷ Nupya yapange tumipeto twiili twakwe zaabu alino yatunyepelele ku mpela ya mbali ziili zya tumakwelelo twapa viye, kwi sempele lwa mukasi ya cakuzwala cico, pipi ni cakuzwala ca efodi.

²⁸ Lyene yasuntinkanye tumipeto twa cakuzwala ca pacisao ku tumipeto twa cakuzwala ca efodi nga nu ku kanyepelo ka nsalu ya cifungo kuti cakuzwala ca pacisao ciye papela ya musipi uno wapikulwa usaka. Alino cakuzwala ca pacisao cisuntinkanyiziwe ningo ku cakuzwala ca efodi.

²⁹ Lino Aaloni akwingila mu Ncende Yamuzilo aazwala cakuzwala ca pacisao cino calembwapo mazina yonsi ya ana yakwe Izlaeli, pakuti ne Yawe naiusya antu yane amanda pe.

³⁰ Mu cakuzwala ca pacisao cico uwaikamo vintu vyamuzilo vyakwe Yawe vino vikaamwa ukuti Ulimu na Tumimu, kuti vintu vivyo vyaya pa cakuzwala ca pacisao cakwe Aaloni pakuya kuli Yawe. Avino Aaloni akaaya ku manso yakwe Yawe insita zyonsi, akakwata vyakumwazwa kupingula ningo aina Izlaeli.”

Yapanga vyakuzwala vyuze vyakwe yasimapepo

³¹ Yawe apeela ilamulo kuli Mose ati, “Uleke yapange mwingila wa nsalu ya cifungo wakuzwala mwisika ya cakuzwala ca efodi.

³² Pakasi ka mwingila uwo yasye cipongo pa kupisya umutwe. Cipongo cikolane ni cipongo ci laya. Mumbali ya cipongo muye musumilile ningo kuzingulusya pakuti mwingila uwo utalepuka.

³³ Pa cikonze ca pisika ca mwingila uwo yapange vintu vikoline ni viseekwa vya pomegeleneti vya cifungo, viye wakwe pamba muyenzulukile nga nu muyenzu, kuzingulusya mwingila onsi. Pakasi ka vintu vikoline ni viseekwa vya pomegeleneti paye inyenjele zyakwe zaabu.

³⁴ Vivyo kwene paye cizao ca pomegeleneti conga ni nyenjele yonga, nupya cizao ca pomegeleneti conga ni nyenjele yonga kuzingulusya pa cikonze ca pisika ca mwingila consi.

³⁵ Lyene Aaloni aazwala mwingila uwo lino akutumikila vya usimapepo. Pakwingila mu Ncende Yamuzilo pa manso yakwe Yawe nanti lino akufuma kuku, ukulila kwa nyenjele zizi kulauvwika, kuti atakomwa.

³⁶ “Upange iciyembelo cakwe zaabu musuma cuze, ulembepo wakwe vino musyanyi akalemba pa vyela, amazwi yakuti ‘Camuzilo kuli Yawe.’

³⁷ Ucinyepelele na kanyepelo ka cifungo kuli tulibani wakwe Aaloni, nupya ciyele lwa kunkolelo yakwe tulibani.

³⁸ Aaloni akazwala pa mpumi yakwe, pakuti mu musango uu, Aaloni aliwe asende maifyo ya ina Izlaeli yano yacita lino yakupeela amawila kunondi. Nani ndapokelela amawila yao. Aaloni aazwala ciyembelo pali tulibani wakwe insita zyonsi.

³⁹ “Uleke yasumile Aaloni ilaya lyakwe bafuta musuma, alino yakapange tulibani wakwe bafuta musuma alino nu musipi uupikolezye ningo.

⁴⁰ “Ana yakwe Aaloni aonsi yayasumile malaya, misipi nga na tulibani kuti yaloleka acindame nupya ayembe.

⁴¹ Vyakuzwala kwene vii, uzwike munyonko Aaloni na ana yakwe aonsi, lyene uyapake amafuta nu kuyalasika, nga uyapaatule kuti yantumikila wakwe yasimapepo.

⁴² Uyasumile yakaputula akufika muli mpunzya kuti yatasyala tupu.

⁴³ Aaloni na ana yakwe yazwala vikwene vii lyonsi lino yakwingila mwi Taalu lya Ukongano, nanti lino yapalamila ku kavuwa ku kuntumikila mu Ncende Yamuzilo, koopa kuti limwi angacita maifyo nu kufwa. Ilamulo kwene lii lyapeelwa kuli Aaloni nga nu ku amu mupanda wakwe amanda pe.”