Kufuma 27 - Amazwi Yakwe Leza 2013

Kupanga kavuwa ka kupelelapo uwila wakoca

¹ “Upange kavuwa ka mbao zya muti wa akasya. Kaye kalingane mbali zyonsi zini. Mu utali wa kavuwa muye amamita 2 na masentimita 20. Mu wipi muye icili cimwi, amamita 2 na masentimita 20. Ciimo ciye mita wenga na masentimita 30 na mamilimita 7.

² Upange vikozile impembe papela ya matungi yani, vilundinkanyiziwe ku kavuwa, impembe na kavuwa viya icintu conga, alino kavuwa konsi yakengelele nu mukuwa.

³ Upange viya vyakuomvya pa kavuwa, ukuli kuti yapani yakuponelamo itwi, yafosyolo, ingeso zya kukanyizizya, yafoloko akulu, alino na malwangayo yakusendelamo itwi. Viya vyonsi ivya kavuwa viye vya mukuwa.

⁴ Upange cililata ca mukuwa cipikule wi sumbo, nga ucipangilile ni mipeto ya mukuwa pa matungi yani yakweco.

⁵ Lyene uciike mwisika lya lung'umba lwa kavuwa kuti cifike pakasi na pakasi ka kavuwa.

⁶ Upange mipingilo yakupingila kavuwa ya muti wa akasya, nupya mipingilo iyo uyengelele nu mukuwa.

⁷ Pakupinga kavuwa kaka, mipingilo yaisomeka mu mipeto ya mumbali zyoili zya kavuwa, pa kukasenda

⁸ Nupya mukasi ya kavuwa ukasye mufonke wakwe vino natinkulangilila pakwene pa mwamba.

Yapanga insalu yakucingilikizya musolo wi Taalu

⁹ “Upange insalu yakucingilikizya kuzinguluka musolo wi Taalu. Ku kaeya kuye insalu zyakucingilikizya zyakwe bafuta mutelepe nupya mupange ningo. Kutalimpa kwa mbali yonga kuye amamita 44.

¹⁰ Ncesi ziye amakumi yaili nga ni vikalilo amakumi yaili, vya mukuwa. Lelo tukowelo twakwe siluva twaku ncesi, pamwi ni vyakulundinkanyizizya incesi vyonsi viye vyakwe siluva.

¹¹ Vivyo kwene ku ntunga yaku katutu wike insalu zyakucingilikizya. Mu utali wa nsalu muye amamita amakumi yani na yani, ni ncesi amakumi yaili. Insalu zizyo zinyepelelwe pa ncesi amakumi yaili zino zilasimpwa, lelo tukowelo twaku ncesi nga ni ncesi kwene viye vyakwe siluva.

¹² Mu wipi wa musolo ku ntunga yaku uwondaka kuye insalu zyakucingilikizya, navyo ikumi. Mu utali wa nsalu muye amamita amakumi yaili na yaili, incesi nazyo ziye ikumi nga ni vikalilo ikumi.

¹³ Ku ntunga yaku ufumondaka, kuno kuli mpongolo, nako kwene kuye insalu yakucingilikizya nu mu utali wa nsalu muye amakumi yaili na yaili.

¹⁴ Ku mbali yonga ya mpongolo kuye insalu zyakucingilikizya amamita mutanda na masentimita amakumi mutanda, incesi zitatu nga ni vikalilo vya ncesi vitatu.

¹⁵ Cili conga kwene nu ku mbali yuze kuye insalu zyakucingilikizya. Kutalimpa kwa nsalu kuye amamita mutanda na masentimita amakumi mutanda, kuye ni mpanda zitatu nga ni vikalilo vya ncesi vitatu.

¹⁶ Pa mpongolo ya musolo paye insalu yakucingilikizya ya cifungo, iya cifuvya, iyenzu nga na yakwe bafuta mutetepe mupangwe ningo nupya ipetwe usaka. Kutalimpa kwa nsalu kuye amamita fundimbali. Insalu inyepelelwe ku ncesi zini izisimpwe mu vikalilo vini.

¹⁷ Ulinzile kwika vyakulundinkanyizizya incesi vyakwe siluva alino tukowelo twaku mpanda nato kwene tuye twakwe siluva. Lelo vikalilo vyakusimpamo incesi vyene viye vya mukuwa.

¹⁸ Mu utali wa musolo uwo muye amamita amakumi yani na yani. Mu wipi wauko muye amamita amakumi yaili na yaili. Ciimo naco ciye amamita yaili na masentimita amakumi yaili. Insalu zizyo zyakucingilikizya ziye zyakwe pamba musolwe ningo cuze, nupya mupikulwe. Vikalilo vya ncesi viye vya mukuwa.

¹⁹ Viya vyonsi vyakuomvya mu milimo ya mwi Taalu pamwi ni mpopo zya kwi Taalu nga ni mpopo zyonsi zyamu musolo vyonsi viye vya mukuwa.

Utunguluzi wapa misungile yi lampi

²⁰ “Upeele ilamulo ku ina Izlaeli kuti yakuletele amafuta ya miolivi ayengwe ningo, akukozezya ilampi kuti lyaaka amanda pe.

²¹ Aaloni na ana yakwe aonsi yakakozya ilampi kunzi ya nsalu icinge ino yapaatula Cifulo Camuzilo ni Cifulo Camuzilo ukuluta kuno kukaikala Mbokosi ya Upangano. Lyene ilampi mwi Taalu lya Ukongano likaaka pa manso yane kutandika manguzi mpaka kufika katondo. Aina Izlaeli nga na amu mupanda wao yalinzile yasunge ilamulo lii amanda pe.”