Kufuma 26 - Amazwi Yakwe Leza 2013

Itaalu lya Ukongano

¹ Yawe avwanga ati, “Upange Itaalu uomvye insalu ikumi zya cifungo zipangwe ningo, nupya ni nsalu zyacifuvya, nga ni ziyenzulukile na wulu muyenzu. Pa nsalu zikwene upikulepo yakelubi.

² Mu utali wakwe cila nsalu yakucingilikizya muye amamita ikumi na yaili alino mu wipi muye pipi na mamita yaili. Zyonsi zizyo ziye zikolane.

³ Usume insalu zyakucingilikizya zisano ziye insalu yonga, nupya ucite icili conga kwene ni nsalu zyuze zisano.

⁴ Usumilile tumikowelo twa nsalu ya cifungo mu mbali ku mpela ya nsalu yonga. Ucite icili conga kwene nu ku nsalu yuze.

⁵ Lyene usumilile tumikowelo amakumi yasano twa pa nsalu yakutandikila alino natuze amakumi yasano twa pa nsalu yakwe cili, pakuti tumikowelo tuu, tulolenkane.

⁶ Nupya upange tukoweko twakwe zaabu amakumi yasano, utwakulundinkanyizizya insalu zyakucingilikizya ziili kuti zipange Itaalu lyonga.

⁷ “Upikule insalu zyakucingilikizya ikumi na yonga zya mavumbu ya mbuzi, zyakuvimba papela pi Taalu.

⁸ Mu utali wakwe cila nsalu yakucingilikizya muye amamita ikumi na yatatu, alino mu wipi wakwe cila nsalu muye pipi na mamita yaili. Insalu zyakucingilikizya zyonsi ziye zikolane mu cipimilo.

⁹ Usume insalu zyakucingilikizya zisano ziye insalu yonga, nupya ucite icili conga kwene ni nsalu zyuze mutanda. Upete kapande kalenga mutanda maila yaili ku nkolelo yi Taalu.

¹⁰ Usumilile tumikowelo amakumi yasano mu mbali ya nsalu yonga, nu tumikowelo amakumi yasano usumilile ku nsalu yuze.

¹¹ Upange tukoweko amakumi yasano twa mukuwa. Ukovye mu tumikowelo twa nsalu ziili kuti zipange ca kuvimbila pi Taalu conga.

¹² Citika wa nsalu yakucingilikizya wino wasyala mukopokezye ku lukungu lwi Taalu.

¹³ Masentimita yano yapitilila mu mbali mu utali wi Taalu mbali zyoili, uyakopokezye mu mbali kuti yavimbe Itaalu.

¹⁴ “Upange vya kuvimba pi Taalu navyuze viili. Cimwi ca mukwela wa mfwele uno yavumvunya mu viyenzu, cuze naco ca mukwela unyuke ca kuvimba papela yakwe vyonsi.

¹⁵ “Upange amafulemu a kwi Taalu lyamuzilo ni mbao zya muti wa akasya.

¹⁶ Mu utali wakwe cila fulemu muye amamita yani na citika, alino mu wipi muye masentimita amakumi mutanda na mutanda.

¹⁷ Imbao ili yonsi iye ni vya kulundinkanyizizya viili, kuti vilundinkanye amafulemu pamwi. Avino upangile amafulemu yonsi vyakulundinkanyizizya vii.

¹⁸ Upange amafulemu amakumi yaili, aku ntunga yaku kaeya ki Taalu.

¹⁹ Alino upange vyakusimpamo incesi vyakwe siluva amakumi yani vya mafulemu amakumi yaili. Pansi yi fulemu lyonsi paye vikalilo viili, viye ni vyakulundinkanyizizya kwi fulemu.

²⁰ Ku ntunga yaku katutu ki Taalu nako upange amafulemu amakumi yaili,

²¹ nga ni vikalilo vya mafulemu amakumi yani vyakwe siluva. Cila fulemu liye ni vikalilo viili.

²² Upange amafulemu mutanda, aku lukungu lwi Taalu lwaku uwondaka

²³ nga na mafulemu yaili amu matungi.

²⁴ Amafulemu yaa, yaili amu matungi yaya alekane pansi yalundinkanyiziwe papela kufika kutukowelo twa kutandika tutu. Vii, avino amafulemu yaili yaye yano yapanga matungi yaili.

²⁵ Caleka kuye amafulemu cinani, nga ni vikalilo vyakwe siluva ikumi na mutanda, vikalilo viili kuli cila fulemu.

²⁶ “Upange mpanda zya mbao zya muti wa akasya, zisano ziye ku mafulemu aku mbali yonga yi Taalu.

²⁷ Zisano nazyo ziye ku mafulemu aku mbali yuze. Nupya paye mpanda zisano zya mafulemu ku uwondaka, ku lukungu lwi Taalu.

²⁸ Lupanda lwa pakasi, lwikwe pakasi na pakasi ya mafulemu, lutungilile amafulemu yonsi, ukufuma ku mbali yonga yi Taalu mpaka ku mbali yuze.

²⁹ Amafulemu yonsi uyapomele na zaabu, nupya uyasomeke mu mipeto yakwe zaabu pakuti yatungilile mpanda zizi. Alino ni mpanda kwene ziye izipomelwe na zaabu.

³⁰ Caleka upange Itaalu lyane ndi vino nkukulangilila pano pa mwamba.

³¹ “Upange insalu yakucingilikizya ya cifungo, iyenzulukile nga na wulu muyenzulukile. Alino pa nsalu iyo yapikule yakelubi.

³² Uikoweke pa ncesi zini zya muti wa akasya uipomele na zaabu, ale ili nu tukowelo twakwe zaabu ni vikalilo vini vyakwe siluva.

³³ Ukoweke insalu yakucingilikizya ku tukoweko alino kwi tundu ya nsalu yakucingilikizya wike Mbokosi ya Upangano mukasi ino ikweti vipampa vya mawe yaili. Insalu iyo yakucingilikizya ilapaatukanya Ncende Yamuzilo ni Ncende Yamuzilo kuluta.

³⁴ Wike intupiko pa Mbokosi ya Upangano mu Ncende Yamuzilo kuluta.

³⁵ Kunzi ya Ncende Yamuzilo ukuluta wike tebulo ku katutu ki Taalu, alino wike cakutekapo ilampi ku kaeya.

³⁶ “Pa mulyango wa kwingilila mwi Taalu wikepo insalu yakucingilikizya ya cifungo, yacifuvya, iyenzu, nga na yakwe bafuta mutelepe, ipangwe ningo, nupya ipetwe ningo mumbali usaka.

³⁷ Upange incesi zisano zya muti wa akasya zyakuti yakowekapo insalu yakucingilikizya. Zilinzile zipomelwe na zaabu, nupya tukowelo twaziko tuye twakwe zaabu. Alino upange vikalilo visano vya mukuwa vya ncesi kwene zizyo.”