Kufuma 25 - Amazwi Yakwe Leza 2013

Amawila ya kukuulila Itaalu lyamuzilo

¹ Yawe anena Mose ati,

² “Nena aina Izlaeli kuti yapeele amawila yao kunondi. Lyene upokelele ca wila uli onsi uno cila muntu akulonda ukupeela.

³ Amawila yano ulinzile kupokelela ukufuma kunoyali aeya. Zaabu, siluva, nga nu mukuwa,

⁴ insalu zya cifungo, ni ziyenzulukile, nga ni nsalu ziyenzu zyakwe pamba, insalu zyapangilwa na mavumbu ya mbuzi.

⁵ Mikwela yakwe yasuuku ino yaombeka mu viyenzu, mikwela inyuke, imbao zya muti wa akasya,

⁶ amafuta yamwi lampi, vyamununko usuma vya mafuta akusolwela nga ni vya ubani wa cinunkilo cisuma.

⁷ Nupya upokelele amawe ya onikisi nga ni viyembelo vyuze vyakwika pa cakuzwala cakwe Simapepo Mukulu cakwe efodi alino na pa cakuzwala ca pacisao.

⁸ Antu yalinzile kunkuulila itaalu lyamuzilo pakuti ningaikala pakasi kao.

⁹ Ulipange mu mwata ndi uno namakulangilila, kumwi ni mipangile ya viya vyonsi vya mwi taalu.”

Mbokosi ya Upangano

¹⁰ Yawe avwanga ati, “Nena antu yapange mbokosi ya mbao zya muti wa akasya. Mu utali muye masentimita umwanda onga ni kumi na yani, mu wipi muye masentimita amakumi mutanda na mutanda, mu utali wa papela wa Mbokosi ya Upangano iye masentimita amakumi mutanda na mutanda.

¹¹ Uipomele na zaabu musuma cuze, mukasi nu kunzi kwene. Uwike kamusipi kuzingulusya mbokosi yonsi.

¹² Upange mipeto iini yakwe zaabu nu kuinyepelela ku makulu yani a mbokosi, ku mbali yonga iili nu ku mbali yuze iili.

¹³ Nupya upange mipingilo ya mbao zya muti wa akasya, alino mipingilo iyo uyengelele na zaabu.

¹⁴ Mipingilo kwene iyo ukaisomeke mu mipeto iyo, mbali zyoili zya Mbokosi pakuti yapingila Mbokosi.

¹⁵ Mipingilo ii, yaikala mu mipeto, kusi kusomola foo.

¹⁶ Mu Mbokosi amuno ulika vipampa vya mawe yaili yano yalembwapo amasunde.

¹⁷ “Upange ni ntupiko yakwe zaabu musuma cuze. Mu utali iye masentimita umwanda onga ni kumi lyonga, mu wipi muye masentimita amakumi mutanda na mutanda.

¹⁸ Mbali zyoili zya ntupiko iyo, upange yakelubi yaili yakwe zaabu musule,

¹⁹ kelubi umwi ku nu muze ku. Yakelubi yayo uyapampamile pa ntupiko.

²⁰ Mapa yakwe yakelubi yayo yakavungulukile papela ya ntupiko nu kuvimba ntupiko ya Mbokosi ya Upangano. Yakelubi yace yalolenkane aisikulu, ni vinso vyao ale vikulola pa ntupiko ya Mbokosi ya Upangano.

²¹ Ukike ntupiko papela ya Mbokosi ya Upangano, alino mu Mbokosi kwene iyo ya Upangano amuno ukike vipampa vya mawe ivya masunde vino ndakupeela.

²² Ndakomenkana nawe kuku kwene, nupya papela ya ntupiko, pakasi kakwe yakelubi, indakunena malamulo ya antu yane aina Izlaeli.

Mipangile yakwe tebulo wa mukate wamuzilo

²³ “Upange tebulo wa mbao zya muti wa akasya. Mu utali wakwe tebulo muye masentimita 88, mu wipi namo muye masentimita 46, lyene ciimo cakwe tebulo ciye 66.

²⁴ Lyene ulipomele na zaabu musuma cuze, nupya upange kayembelo kakwe zaabu kuzingulusya tebulo.

²⁵ Upange fulemu kuzingulusya tebulo, mu wipi masentimita cinimbali na citika, nupya upange kayembelo kakwe zaabu kuzingulusya fulemu lilyo.

²⁶ Upange mipeto ini yakwe zaabu, lyene uvinyepelele ku vinkonci vini ulunga na makulu yakwe tebulo.

²⁷ Mipeto ya kusomekamo mipingilo yakupingila tebulo iikwe pipi ni fulemu.

²⁸ Upange mipingilo ya mbao zya muti wa akasya yakupingila tebulo, lyene uyengelele na zaabu.

²⁹ Upange imbale ni ngako ni misazi ni ngeso vyakuomvya pa kupeela amawila ya vyakumwa. Vyonsi vii, vilinzile kupangwa na zaabu musuma cuze.

³⁰ Pi tebulo uwaikapo umukate uwapeelwa kuli Leza.

Yapanga cakutekapo ilampi

³¹ “Upange cakutekapo ilampi cakwe zaabu musuma cuze. Cikalilo nga nu mulundi wakweco viye vyakwe zaabu, nupya visule ni nondo. Intombo, tumapambo, na maluwa yakweco, uvipange viye icintu conga cakweco.

³² Mu mbali zyoili mukaye misambo mutanda, ku mbali yonga misambo itatu nu ku yuze itatu.

³³ Cila musambo pa misambo mutanda, ukwate maluwa yatatu, apangwa wa maluwa ya muti uwakolana na makole. Kuye ni ntombo na maluwa yakwezyo. Ku musambo uze, nako kwene kuye viyembo vitatu vyapangwa wa maluwa ya muti uwakolana na makole. Kuye ni ntombo nu tumapambo. Misambo yonsi mutanda iya cakutekapo ilampi iye vivyo kwene.

³⁴ Pa cakutekapo ilampi pakaye intombo zini nu tumapambo, tukolane na maluwa ya muti uwakolana na makole. Kuye ni ntombo nu tumapambo.

³⁵ Palaya ulutombo longa mwisika ya cila misambo iili pa misambo yonsi mutanda iyatambilila ukufuma pa cakutekapo.

³⁶ Intombo pamwi ni misambo ilya vikapangilwe kumwi ni cakutekapo ilampi, vikaye icintu conga cakwe zaabu musuma cuze musule.

³⁷ Upange inyali cinimbali nu kuyika pa cakutekapo ilampi pakuti yapeela uluswepo ku nkolelo.

³⁸ Malumano pamwi ni vyakuzyolelamo itwi viye vyakwe zaabu musuma cuze.

³⁹ Pakupanga cakutekapo ilampi pamwi ni viombelo vii vyonsi uomvye makilogalamu amakumi yatatu na yasano yakwe zaabu musuma cuze.

⁴⁰ Usakamale pakuti ukapange vyonsi vii mu mwata uno nakulangilila pano pa mwamba.”